AMAKURU

UKWEZI
ubumwe

Minisitiri Munyakazi yatangirije icya Leta mu ishuri umwami Ndahindurwa yizemo asaba abakandida kwirinda uburiganya

Minisitiri Munyakazi yatangirije icya Leta mu ishuri umwami Ndahindurwa yizemo asaba abakandida kwirinda uburiganya
12-11-2019 saa 12:55' | By Nsanzimana Ernest | Yasomwe n'abantu 2086 | Ibitekerezo

Umunyabanga wa Leta muri Minisiteri y’ uburezi ushinzwe amashuri abanza n’ ayisumbuye yasabye abanyeshuri batangiye ibizami bya Leta bisoza ikiciro rusange tronc commun n’ abatangiye ibizami bya Leta bisoza amashuri yisumbuye kwirinda umuco wo gukopera we yise ’ubujura n’ uburiganya’.

Yabitangarije mu ishuri rya Groupe Scolaire Officiel de Butare kuri uyu wa 12 Ugushyingo 2019, ubwo yatangizaga ibi bizami ku mugaragaro.

Dr Isaac Munyakazi yavuze ko ibizami bya Leta bisoza amashuri abanza birangiye nta munyeshuri n’ umwe ufatiwe mu cyaha cyo gukopera. Yavuze ko gutsindwa no gusiba cyangwa gukererwa ibizamini, abanyeshuri bakwiye kubifata nka kirazira.


Yagize ati “Kirazira kwiba. Ndagira ngo mbabwire ko turangije ibizami bya Leta bisoza amashuri abanza nta mwana n’ umwe mu Rwanda ruzima twigeze dufata akopera kandi umwaka ushize barabikoraga. Uwo muhigo rero twihaye turifuza ko ukomeza, namwe murakuze muzi icyo bivuze gutakaza indangagaciro zo gukora neza no kwirinda uburiganya”.

Uyu muyobozi yavuze ko abanyeshuri bakoze ibizami bya Leta uyu mwaka bafite amahirwe ataragizwe n’ abababanjirije kuko bo ngo bagize amahirwe menshi yo kwitegura ikizami cya Leta.

Uyu mwaka abanyeshuri mu gihugu hose bakoze ibizami byo mu ishuri bisa mu gihugu hose mu gihe ubusanzwe ibizami byo mu ishuri byategurirwaga mu kigo.

Ati “Ibizamini mugiye gukora birasa na bya bindi tumaze iminsi tubaha. Biriya bizamini tumaze iminsi tubaha ku rwego rw’ igihugu twagira ngo tubatoze uko ikizamini kidateguwe n’ amashuri yanyu kiba gikoze.”

Nkusi Davis, umwe mu banyeshuri barangije tronc commun kuri GSOB yatangarije UKWEZI ko icya Leta bakiteguye ndetse avuga ko ku giti cye yumva azagira nka 80/100 mu kizami cy’ imibare bahereyeho.

Yagize ati “Ikizami twagiteguye neza rwose twarize kuva kera, urumva nta kuntu umuntu atagitsinda rwose. Iki cy’ imibare urebye nzagira nka 80 kuzamura”.

Umunyeshuri witwa Umunyana Marie Thereze nawe yavuze ko ikizami bakiteguye neza ati “Iki kizami nkiteguye neza ndumva nzagira akakoni kamwe (I)”.

Ishuri rya GSOB indwatwa n’ Inkesha ryatangirijwemo ikizami cya Leta ni ishuri rifite amateka akomeye kuko ryatangiye mu 1929 ryigwamo n’ abana b’ abatware. Iri shuri umwami Kigeli V Ndahindurwa yaryizemo rikitwa Groupe Scolaire Astrida ritarahinduka Groupe Scolaire Officiel de Butare).

Minisitiri Munyakazi yavuze ko iri shuri nubwo rifite amateka akomeye mu gihugu risa ni iryadohotse gusa ngo ku bufatanye bw’ ubuyobozi bushya n’ akarere n’ ubuyobozi bw’ iri shuri biyemeje kongera gushyiramo imbaraga ngo iri shuri risubirane ubushongore ryahoranye.

Mu bizami bya Leta by’ umwaka ushize iri shuri ryari rifite abakandida 139 ba tronc commun, abatsinze neza bagashyirwa mu kiciro cya mbere ni 133. Ibi byatumye iri shuri riza ku myaka wa 26 mu gihugu nyamara ryarigeze kujya riba irya mbere.

Umuyobozi wa GSOB Padiri Charles Hakizimana avuga ko iri shuri muri rusange ridahagaze nabi. Ati "Guhera muri 2012 courbe yo gutsina igenda izamuka. Imbararaga rero ni ukuzikomereza aho ngaho ariko birumvikana abayobozi baba badusaba gukomeza iyo nzira no gutsinda kurushaho"

Umuyobozi w’ akarere ka Huye Ange Sebutege yifurije amahirwe masa abanyeshuri batangiye ibizamini bya Leta ababwira ko ibizamini byoroshye ati “Niba mwariteguye neza murabitsinda”

Uyu mwaka wa 2019 abanyeshuri bateganyijwe kwitabira ibizimi bya Leta bisoza ikiciro rusange tronc commun ku rwego rw’ igihugu ni 119 932, umwaka ushize bari 99 898 bivuze ko biyongereyeho 20%.

Abateganyijwe kwitabira ibizami bya Leta bisoza amashuri yisumbuye ni 51 291, umwaka ushize bari 46 024 bivuze ko biyongereye ku kigero cya 11%.


Aha hari icyumba kigiye hejuru niho umwami yararaga


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...