AMAKURU

UKWEZI
ubumwe

Mu mahoteli basanga umukozi uhawe ‘tip’ adakwiye kuyirya wenyine

Mu mahoteli basanga umukozi uhawe ‘tip’ adakwiye kuyirya wenyine
26-10-2019 saa 18:58' | By Nsanzimana Ernest | Yasomwe n'abantu 5364 | Ibitekerezo 2

Abakora mu mahoteli n’ abayobozi bayo bavuga ko umuco w’ abakiriya bamwe na bamwe wo guha amafaranga umukozi wa hoteli wabakiriye ari umuco mwiza uteza imbere imitangire ya serivise, gusa ngo uhawe aya mafaranga yitwa ‘tip’ ntakwiye kuyarya wenyine.

Abaganiriye na UKWEZI ni abo mu mugi wa Musanze, umugi w’ ubukerarugendo ubonekamo amahoteli arenga 30. Bavuga ko umuco wo gutanga tip ahanini ufitwe n’ abanyamahanga n’ abandi bantu bamenyereye kujya mu mahoteli.

Solange Ingabire ukora muri La Palme hoteli avuga ko iyo umukiriya amuhaye tip yumva bimushimishije kuko ngo aba abonye ko serivise yatanze yagenze neza

Agira ati “Ndishima kuko ntekereza ko namuhaye serivise nziza kuko anshimiye. Tip si itegeko sinanavuga ngo ikwiye kuvaho kubera ko iyo umukiriya yishimye agira uko agaragaza amarangamutima ye. Hari ukubwira ngo wakoze, hari uwigendera ntacyo akubwiye ariko kuba yakwishima akagira ikintu aguhereza numva nta kintu byahungabanya”.

Sibomana Emmanuel, Umuyobozi wungirije wa Virunga Hotel ikoresha abakozi 36 avuga ko tip ari umuco wihariye ku bantu bamenyereye kujya muri hoteli zitandukanye. Gusa ngo kuri we si umuco mubi.

Agira ati “Uyitanze mbona ari uburyo bwo kugaragaza amarangamutima ye kubijyanye n’ uko yakiriye service yahawe. Uyihawe bimutera akanyabugabo kuko abona ko yatanze service neza”.

Sibomana Aimable, Turyaheibwa Everest, na Isabwe Janviere bavuga ko muri iyi hoteli iyo hari umukozi uhawe tip ayishyikiriza ubuyobozi bwa hoteli bukazayigabanya abakozi bose.

Ngo impamvu habaho gusaranganya tip yabonetse ikagera ku bakozi bose ni uko iyo serivise yatanzwe neza biba byagizwemo uruhare n’ abakozi benshi kuva ku watetse, uwogeje, uwashashe, uwakoropye kugera ku watanze serivise ya nyuma.

Umwe mu baturage baganiriye na UKWEZI yavuze ko we asanga tip ishobora kubangamira imitangire myiza ya serivise kuko uyitanga ashobora guhabwa serivise nziza kurenza utayitanga.

Muyizere Emmanuel ucururiza mu isoko rya Musanze yagize ati “Tip ni kwa kundi umuntu aguha serivise nziza ukamuhereza akantu(amafaranga). Abantu bayitanga inyungu babigiramo bituma bahabwa serivise nziza kuko ntabwo umuntu yaba yaraguhaye tip ngo ubutaha nagaruka ntumukorere neza nk’ ukuntu abyifuza.”.


Sibomana Aimable

Sibomana avuga ko guhabwa tip cyangwa kutayihabwa bidakwiye kugira icyo bihindura ku mukozi kuko aba yazinduwe n’ akazi agomba gukora agatanga serivise neza kuko aricyo aba ahemberwa.

Ndagijimana Felicien, ushinzwe gutanga ibinyobwa muri la Palme hoteli avuga ko tip ari umuco ufitwe cyane n’ abanyamahanga. Ahamya ko tip kuyihabwa cyangwa kutayihabwa ntacyo bihungabanya ku mitangire ya serivise. Gusa ngo abanyamahanga n’ iyo atanyuzwe na serivise atanga tip.

Agira ati “Umuzungu niyo mutabasha kumvikana neza wenda wamuhaye nk’ ibyo kurya ntabikunde ukabona arabisigaje kuko yasanze bitetswe bitandukanye n’ uko yarazi kandi yatanze iyo komande arabyishyura na tip akayiguha”.

Umuyobozi wa La Palme hoteli Mpawenimana Fulgence, avuga ko kera agitangira gukora muri hoteli hari ubwo yamaraga ukwezi atarakoresha amafaranga y’ umushakahara we kubera guhabwa tip nyinshi n’ abakiriya.

Avuga ko muri hoteli ayoboye nta tip ikunda kuhaba kuko abakiriya benshi bagira ari abahakorera inama kurenza abakiriya bajya kwigurira.

Ati “Abaza mu nama nibo bakiriya benshi tugira. Babandi baza kwifata neza ntabo tugira, ntabwo natinya kukubwira ko abantu ba hano muri Musanze batinya aya mahoteli akomeye. Bamukerarugendo burya bo batanga ka tip ariko ntabwo baza kenshi cyane. Nonese abo baza mu nama batanga tip ko nabo aba ari abanyeshuri?”.

Mpawenimana avuga ko na katip gake kabonetse batagasaranganya mu bakozi gusa yemera ko habayeho kugasaranganya byaba byiza kurushaho.

Umuyobozi w’Ishami rishinzwe ikurikizwa ry’amabwiriza agenga ubukerarugendo mu Kigo cy’ igihugu cy’ iterambere RDB Emmanuel Nsabimana avuga ko badashishikariza abakiriya gutanga tip.

Agira ati “Ibintu bya tip ntabwo tubishishikariza abantu kuko umukozi aba yarahawe akazi ahembwa kandi icyo ahemberwa ari ugutanga serivise”.

Akomeza agira ati “Mubijyanye n’ ubukerarugendo usanga tip ari umuco, ariko ibyo ntibyakagombye kugira icyo bihungabanya kuri serivise kuko n’ ubundi umukozi akazi ke ni ugutanga serivise”.


INKURU ZA :
Tanga Igitekerezo
Ibitekerezo 2
g Kuya 28-10-2019

Oya, tip igomba kuba iy’uwakiriye umukiriya; None se niba nashimye uburyo yanyakiriye, uburyo yanganirije, uburyo yanyitayeho kuri buri cyose na musabye,(kumutuma for exemple) , uwo mu gikoni, uwo mu icungamutungo, ukoropa, bo bazamo bate? Nabo baharanire kubona izo tip maze service igende neza muri rusange. Ari ibyo hari abajya bikorera uko bishakiye ntakenge cg atege bashyizemo kuko n’ubundi ya tip azayibona. Uramutse unabaganyije, uwabaye nyirabayazana wayo na muha 60% ku ijana, andi agahabwa abo bandi.

Musera Kuya 27-10-2019

Tip niyuwakoze Service kanaka ntabwo ariyaba boss yewe na boss iyo ayibonye ntashobora kuyikoraho kuko yabihanirwa namategeko. Harigihe baba batamureba nawe yayifata kuko ntawanga fr ariko camera yamubonye yaba agize ingorane.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...