AMAKURU

UKWEZI
Canal+ christmax

Mu rubanza rw’uwahoze ari Umuyobozi wa Gereza ya Mageragere humvikanye ingingo nshya yatumye abaregwa bataburana

Mu rubanza rw’uwahoze ari Umuyobozi wa Gereza ya Mageragere humvikanye ingingo nshya yatumye abaregwa bataburana
18-09-2021 saa 12:07' | By Martin | Yasomwe n'abantu 3117 | Ibitekerezo 1

Kuri uyu wa Gatanu tariki 17 Nzeri 2021 ubwo byari biteganyijwe ko Urukiko rw’Ibanze rwa Nyarugenge rutangira kuburanisha mu mizi urubanza ruregwamo abarimo CSP Kayumba Innocent wahoze ari Umuyobozi wa Gereza ya Nyarugenge ; umwe mu baregwa yatanze inzitizi yifuza ko arekurwa bituma iki gikorwa cyari giteganyijwe kidatangira.

CSP Kayumba Innocent yunganiwe na Me Ngirinshuti Jean Bosco ; Mutamaniwa Ephraim yunganiwe na Udahemuka Tharcise mu gihe SP Eric Ntakirutimana we yagaragaye mu rukiko nta mwunganizi afite.

Abaregwa bose bakurikiranyweho ibyaha birimo kwinjira mu makuru abitse muri mudasobwa n’icyaha cy’ubujura. Bose barahakana ndetse bagasaba urukiko kurekurwa bagasanga imiryango yabo kuko muri gereza ari habi.

Mu iburanisha rya none, Umucamanza yategetse ko humvwa inzitizi zatanzwe na Mutamaniwa Ephraim wasabye Urukiko rw’Ibanze rwa Nyarugenge kumurekura akaburana ari hanze.

Yavuze ko muri uru rubanza atakiri gatozi ahubwo asigaye ari umufatanyacyaha kuko hari uwiyemereye ubwe uko yibye umunyamahanga bari bafunganywe muri Gereza ya Nyarugenge.

Mutamaniwa yasabye kurekurwa by’agateganyo kuko ubwo yafatwaga bwa mbere no mu mabazwa yose yabajijwe nka gatozi muri uru rubanza.

Yagize ati “Urubanza rugeze mu rukiko dutangiye kuburana mu mizi haboneka gatozi witwa Amani Olivier nk’uko yabyiyemereye ubwe mu rukiko atanga ubuhamya bw’uko yibye akoresheje ikoranabuhanga ; ko ariwe mucurabwenge mu bujura bwakorewe Kassem Ayman Mohamed ufungiye muri Gereza ya Nyarugenge wibwe miliyoni zisaga 9 Frw.’’

Nyuma yo kwiyemerera ko yibye uwo munyamahanga, urukiko rwafashe icyemezo ko Amani Olivier abaye umuburanyi nk’abandi aho kuba umutangabuhamya w’Ubushinjacyaha.

Mutamaniwa wahoze ashinzwe Ubutasi muri Gereza ya Nyarugenge yabwiye urukiko ko yatunguwe no kubona muri dosiye yarabaye icyitso.

Ati “Nyakubahwa mucamanza ndasaba ko narekurwa by’agateganyo, hariya hantu dufungiye ni habi cyane kandi ndanababaye.’’

Me Udahemuka Tharcisse wunganira Mutamaniwa Ephraim yasabye urukiko gufungura umukiliya we agakurikiranwa ari hanze.

Yabwiye urukiko ko Mutamaniwa ariwe watanze amakuru bwa mbere ko muri Gereza hari gukorerwa ubujura bukoresheje ikoranabuhanga.

Yabibwiye Komiseri Mukuru wa RCS kandi icyo gihe abivuga byafashweho icyemezo. Ati “Ayo makuru yatanzwe ku wa 14 Nzeri 2020.’’

Yavuze ko uwo yunganira yateye akamo abayobozi be, ababwira ko CSP Kayumba Innocent afitanye imikoranire ya hafi na Amani Olivier yari igamije kwiba.

Yagize ati “Ntabwo yari gutanga ayo makuru ngo agaruke akorane nabo. Nyakubahwa mucamanza, ndasaba ko Mutamaniwa yarekurwa by’agateganyo.’’

Urukiko rwahaye umwanya Ubushinjacyaha ngo buvuge icyo butekereza ku busabe bwa Mutamaniwa, busaba ko yaguma gufungwa kugeza rufashe icyemezo ku rubanza akarekurwa cyangwa agakatirwa.

Nyuma y’impaka ndende zamaze amasaha abiri, Urukiko rwanzuye ko ubusabe bwo kurekuwa by’agateganyo kwa Mutamaniwa Ephraim bugiye gusuzumwa icyemezo kikazafatwa ku wa 21 Nzeri 2021.

Ingingo ya 97 mu gitabo cy’amategeko ahana y’u Rwanda ivuga ko iyo hatanzwe inzitizi mu rubanza runaka, inteko y’abacamanza iba isubitse iburanisha ikabanza gusuzumwa rugakomeza nyuma.

Umucamanza yavuze ko nyuma yo gusuzuma inzitizi za Mutamaniwa Ephraim iburanisha mu mizi rizakomeza ku wa 24 Nzeri 2021.


INKURU ZA :
Tanga Igitekerezo
Ibitekerezo 1
irima Kuya 19-09-2021

nibabafunge, nonese Amani ysgeze kuri iyo computer ari ikimanuka, ntabwo byakunda, ahubwo gufunga amani birababaje, abo bagabo bakwiye kongerwaho icysha cyo gushora undi mu bujura mu nyungu zabo

IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA