konka coffee
KONKA

AMAKURU

UKWEZI
Minijust

Nyanza: Abikorera n’ abahavuka batangije Sosiyete y’ ishoramari izubaka uruganda

Nyanza: Abikorera n’ abahavuka batangije Sosiyete y’ ishoramari izubaka uruganda
6-02-2019 saa 10:19' | By Nsanzimana Ernest | Yasomwe n'abantu 861 | Ibitekerezo

Minisitiri w’ Ubucuruzi n’ inganda Soroya Hakuziyaremye yitabiriye umuhango wo gutangiza Ikigo cy’Ishoramari cyitwa Nyanza Investiment group (NIG) cyatangijwe n’ abikorera batuye mu Karere ka Nyanza ndetse n’abahakomoka kigamije guteza imbere umujyi wa Nyanza.

Umujyi wa Nyanza wahoze amenyerewemo ubucuruzi bw’ imyenda ya caguwa myaka yashize, NIG izatangira icuruza imyenda iva hanze kugira ngo isimbure caguwa yari ihamenyerewe. Aba bashoramari bafite icyerecyezo ngo cyo kuzubaka uruganda rukora imyenda mu myaka iri imbere.

NIG igamije kuzamura iterambere ry’Akarere ka Nyanza binyuze mu bikorwa by’ubucuruzi, bakazatangirira ku bucuruzi bw’imyenda iva hanze nka Dubai, mu Bushinwa n’ahandi.

Kayitesi Immaculee usanzwe acururiza mu karere ka Nyanza akaba na nyir’Uruganda rwa Zirakamwa Meza Diary yavuze ko iyi sosiyete izabungukira bidatinze.

Yagize ati “Tuzi ko ubundi iyo ushoye imari ubundi bivugwa ko utangira kunguka mu myaka itanu. Iri rero riratandukanye, tuzatangira kunguka twatangiye gukora inyungu izaba yinjira nyuma y’umwaka tugabane inyungu tuyishore cyangwa se twongere imigabane.”

Kamali Emmanuel ukorera mu mujyi wa Kigali akaba n’umwe mu batangije inyubako izwi ku izina rya CHIC nawe afite icyizere ko NIG izunguka.

Yagize ati “Ni umushinga uva kurangura uhita uza gushyira ku isoko kuko nta shoramari rindi bidusaba nko kubanza kubaka, kubanza gukora ibikorwaremezo tuzabanza gukoreramo akaba ari yo mpamvu mbona ko harimo inyungu nyinshi.”

Umuyobozi w’akarere ka Nyanza Ntazinda Erasme yizeza ubufatanye iyi sosiyete, cyane ko ari kimwe bizagirira akamaro aka karere mu nzego zitandukanye birimo no gutanga akazi ku batuye muri aka Karere

Yagize ati “Nyanza mu minsi yashize yari izwi ho ubucuruzi cyane cyane bushingiye ku myenda; ubu rero kuba iyi sosiyete yahisemo gutangirira ku bucuruzi bw’imyenda ariko nanone igana cyane ku gushinga uruganda imyenda ni ikintu cyiza cyane kuko hari ubucuruzi buzamura ubukungu ariko noneho uruganda byiyogeraho ko rwo rutanga n’akazi.”

Umuyobozi w’isoko ry’imari n’imigabane Pierre Celestin Rwabukumba yakanguriye ibitabiriye iki gikorwa ndetse n’abandi bose gukorera hamwe binyuze mu migabane nka bumwe mu buryo bwabafasha kugera ku ntego zabo byihuse.

Ati “Ingingo ya mbere y’ingenzi ni igitekerezo cyiza kibyara inyungu kandi kizweho naba nyiracyo bakaba bagihuriyeho. Ibi bituma bagera ku ntego zabo byihuse.”

Soraya Hakuziyaremye, Minisitiri w’ubucuruzi n’inganda akaba n’imboni y’akarere ka Nyanza avuga ko biteguye gushyigikira iki kigo (NIG)binyuze mu bujyanama , kubashakira amasoko ndetse no kuborohereza mubyo amategeko abasaba.

Yakomeje ashishikariza ashishikariza abikorera gukomeza gushora imari mu bikorerwa mu Rwanda ’Made in Rwanda’.

Ati “Hari ibikorwa byinshi Minisiteri ifasha kugira ngo ikomeze iherekeze yaba abanyenganda, abacuruzi kugira ngo ibyo bakora nibijya ku isoko bibe bifite ubuziranenge ndetse ikabafasha no kubashakira amasoko ku buryo ibyo bakora bihaza isoko ry’igihugu ndetse n’iryo hanze. Kuko Minisiteri yacu ariyo ifite ibya ‘Made in Rwanda’ tuzaba hafi y’aba banyenyanza mu rwego rwo guteza imbere iby’iwacu.”

Kuba umunyamuryango wa ‘’Nyanza Investment Group’’bisaba gutanga umugabane ungana n’amafaranga 20.000. Imigabane myinshi umuntu yemerewe kugura ku ikubitiro ikaba ari 1000 bivuze itarengeje agaciro ka miliyoni 20.

Biteganyijwe ko NIG izatangira ubu bucuruzi bitarenze mu kwezi kwa 6 uyu mwaka bakazatangira baranguza ibicuruzwa birimo imyenda inkweto n’amasakoshi biva mu Bushinwa na Dubai bikazajya biranguzwa ku bacuruzi bo mu Rwanda. Ubu bucuruzi bukazatangira mu gihe bazaba bagize imigabane ifite agaciro ka miliyoni 200.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...