AMAKURU

UKWEZI
ubumwe

Umugabo wa Perezidante wa korari Abarinzi wapfiriye mu mpanuka yatanze ubuhamya

Umugabo wa Perezidante wa korari Abarinzi wapfiriye mu mpanuka yatanze ubuhamya
17-09-2019 saa 23:20' | By Nsanzimana Ernest | Yasomwe n'abantu 9614 | Ibitekerezo 6

Umugabo wa Mushimiyimana Rachel, wapfiriye mu mpanuka y’ imodoka ya korari Abarinzi yavuze ko Imana yari yaragiye ibereka ko Rachel ari hafi gupfa.

Ubu buhamya bwatangiwe mu muhango wo gushyingura Rachel wari Perezidante wa Korari Abarinzi waguye mu mpanuka yabaye ku wa Gatandatu tariki 14 Nzeri 2019, ubwo iyi korari yari igiye mu ivugabutumwa mu karere ka Ruhango.

Umugabo we yatangiye avuga ko gushingura umugore we ari umunsi w’ibirori Imana yateguye itabagishije inama. Bari bamaranye imyaka itandatu bafitanye abana bane.

Avuga ko bamenyanye igihe gito kingana n’amezi umunani mbere y’uko babana kuko uko yageragezaga kubwira umukobwa ko amukunda Imana yamubwiraga ko ikiri gutegura uwe kugeza igihe bahuriye yamubwira ko amukunda nawe ati narimbizi.

Ati “Nabwiye Imana nti kuki utaretse ngo tubanze dukundane nange numve umunyenga w’urukundo iransubiza iti tuza.”

Avuga ko urukundo yakundanaga n’umugore we atari urwo abantu bashingira ku bintu cyangwa kuba baritsiritanyeho ahubwo ko ari urw’Imana yabateretsemo.

Yavuze ko umugore we yari yarize ariko agashyira imbaraga mu gukorera Imana kuruta gukorera urugo.


Umugabo wa Rachel avuga ko Rachel yari umunyamahoro cyane

Ngo mbere gato y’uko yitaba Imana yajyaga asenga Imana ikamubwira iti ‘Nguhaye intebe y’icyubahiro’, nguhaye ikibanza kiza ariko kubera ko bari bafite inzara n’inyota y’akazi bo bibwiraga ko ari nko kuba agiye kubona akazi ahantu hakomeye ariko ntibasobanukirwe ko ari intebe yo mu ijuru.

Sibi gusa kuko ngo Rachel yari aherutse kubwira umugabo we ko yarose yakoze ubukwe ariko nta mukwe bari kumwe, ibi bigahurirana n’ uko hari umwana yari aherutse kwita Bride bivuga umugeni. Bamwe mu bakirisitu bizera ko umugeni bishushanya ko bari umuntu ugiye kwitaba Imana.

Mushimiyimana Rachel yavutse tariki 16 Kamena 1985, yitaba Imana tariki 14 Nzeri 2019.

Umugabo wa Rachel avuga ko mbere ho umunsi umwe ngo impanuka ibe, umugore we yamwambitse impeta amusubiriramo amagambo avugwa mu gusezeranya abageni. Avuga ko yari amaze iminsi ajya kukazi atambaye impeta.

Mu rukerera rw’ umunsi impanuka yabereyeho, ngo umugore yarabyutse nka saa cyenda arasenga amaze gusenga baranganira bibukiranya ku byaranze umunsi w’ ubukwe bwabo.

Umugabo yagiye ku kazi nk’ uko bisanze, bigeze saa sita ahamagarwa n’ umuririmbyi uba muri korari Abarinzi abereye Parrain aramubwira ati ‘Nziko usanzwe uri umugabo kandi usanzwe ugira impano yo kwihangana, ngiye kukubwira ibintu bikomeye ubyakire.’

Yamubwiye ko bakoze impanuka kandi ko umugore we Maman Merci yahise apfa. Umugabo ati ‘Ntakundi’. Ngo yahise yicara hasi yumva acitse umugongo. Ahamagara umukoresha we amubwira ibibaye, ubundi arataha ajya kwitegura kujya mu magepfo aho impanuka yabereye.

Avuga ko bitewe n’ uburyo we n’ umugore we bisanzuranagaho abantu bashobora kuba bagira ngo yari umugore w’ umunyamahane ariko ngo siko byari bimeze ati “Yari umugore w’ umunyamahoro”.

Visi Perezida w’ iyi korari Kabera Jean de Dieu , umwe mu barokotse iyi mpanuka yavuze ko atazi uko byagenze gusa ngo yashidutse aryamye mu gisenge cy’ imodoka kuko imodoka yaguye ikiyubika.


Visi Perezida wa Korari Abarinzi avuga ko amaze kuvamo ari muzima yahise atangira gufasha abandi barimo bataka cyane nubwo nawe nta mbaraga yari afite

Umubyeyi wari wicaranye na Rachel ubwo iyi mpanuka yabaga yavuze ko Rachel yahise apfa ako kanya adakomeretse kuko ngo yakubise ibipfukamiro hasi intebe yo mu modoka imukubita mu gatuza ahita ashiramo umwuka.

Nyakwigendera Mushimiyimana Rachel yasize abana bane n’ umugabo bari bamaze imyaka 6 bakoze ubukwe. Pasiteri bari kumwe avuga ko imodoka yakoze impanuka yahagurutse saa mbili z’ igitondo. Abaririmbyi babanje kwihana ibyaha babisabwe n’ umuyobozi wabo Rachel.

Yabashyize mu byiciro abagabo ukwabo n’ abagore ukwabo ati ’twiyezereze urugendo Imana itaza kutubonaho umugayo’


Nyakwigendera Mushimiyimana Rachel ubwo yari yarangije Kaminuza muri ULK


Byari amarira n’ agahinda mu gushyingura Rachel wari Perezidante wa Korari Abarinzi


Iyi coaster niyo yari itwaye abaririmbyi ba korari Abarinzi


INKURU ZA :
Tanga Igitekerezo
Ibitekerezo 6
Epiphanie Kuya 18-09-2019

Dusabinema yo kuzapfa neza

Dumburi Kuya 18-09-2019

Icyifuzo "Icyampa nanjye nkazapfa nkuko abakiranutsi bapfa nkagenda niyijeje nkasoza uru rugamba n mu mahoro kandi nejejwe nta rubanza rundiho nkagera imbere y’Imana ndi umwere" Rwose Rachel ashoje urugamba neza mu mahoro. Imana imwakire Pe!

Iwimana Yvonne Kuya 18-09-2019

Icyampa nkazapfa nkuko abakiranutsi bapfa iherezo ryanjye rikaba nkiryabo

Iwimana Yvonne Kuya 18-09-2019

Icyampa nkazapfa nkuko abakiranutsi bapfa iherezo ryanjye rikaba nkiryabo

Niyonzima Kuya 18-09-2019

Imani ikomeze abasiga nibobabaje nahundiwe yaruhutse imiruho nimiha yisi imana imwakire

Sempabuka Denis Kuya 18-09-2019

Imana imuhe iruhuko ridashira kandi abasigaye Imana ibahe umutima wo kwihangana

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...