AMAKURU

UKWEZI
ubumwe

Ruhango: Abageni bangiwe gusezerana ngo umukobwa aratwite

Ruhango:  Abageni bangiwe gusezerana ngo umukobwa aratwite
12-07-2019 saa 13:57' | By Nsanzimana Ernest | Yasomwe n'abantu 5491 | Ibitekerezo 7

Mu murenge wa Kinazi mu karere ka Ruhango, itorero rya ADEPR ryanze gusezeranya abagenzi bari gusezerana uyu munsi tariki 12 Nyakanga 2019 kuko umukobwa atwite. Iyi ngingo yo kwanga gusezeranya abageni ngo umukobwa aratwite ntabwo ivugwaho rumwe.

Uyisenga Ildephonse na Banamwana Sadako bari gushyingirwa uyu munsi imbere y’ Imana, nyuma y’ uko basezeranye imbere y’ amategeko tariki 25 Mutarama 2019.

Aba bageni bagiye kwipimisha ngo harebwe ko umukobwa adatwite, itorero rizabone uko ribasezeranya basanga umukobwa atwite inda y’ ukwezi kumwe.

Uyisenga yavuze ko itorero rikimara kwanga kubasezeranya byabababaje ndetse agashaka kwiyahura ariko ngo nyuma we n’ umukunzi we baje kubyakira.

Yabwiye Kigalitoday ko nubwo gusezerana mu rusengero byahagaze, ngo indi mihango yari iteganyijwe uyu munsi irimo gusaba no gukwa irakomeza.

Ngo nyuma yo gusaba no gukwa aratahana umugeni we abazanye impano bazitange ubundi bage kwibanira, nyuma azage gusaba imbabazi mu itorero. Uyisenga avuga ko amaze imyaka myinshi muri ADEPR ndetse ngo yari n’ umuririmbyi muri korare ya paruwasi.

Uyisenga na Banamwana ntabwo aribo bageni ba mbere ADEPR yanze gusezeranya bazira ko umukobwa atwite.

Muri Mutarama uyu mwaka wa 2019, iri torero ryanze gusezeranya Sinarimbizi Jean Damascene wo mu karere ka Bugesera wagombaga gusezerana na Uwizeyimana Fortunée, kubera ko Uwizeyimana yari atwite.

Sinarimbizi yabwiye Ikinyamakuru UKWEZI ko byamubabaje, gusa nabo bahise bafata icyemezo cyo kwibanira badasezeranye mu rusengero.
Bamwe mu bapasiteri bavuga ko iyo umuntu yiyemeje gusezerana mu idini rifite amahame yo kudasezeranya umukobwa utwite agombwa kubyirengera igihe bimubayeho.

Pasiteri Antoine Rutayisire umwe mu bapasiteri banzwi cyane mu Rwanda avuga ko mu idini ayobora ry’ Abangilikani basezeranya abageni n’ iyo umukobwa yaba atwite.

Yagize ati “Twebwe muri Angilikani nta tegeko tugira ribuza gusezeranya umukobwa utwite, turabasezeranya. Uba ugize Imana akarongorwa akaba agukuriye ikimwaro mu nzira, ariko ubundi hari andi matorero atabyemera, kandi ibyo ni disipurine (discipline) yabo”.

Hari bamwe mu bangiwe gushyingirwa n’amatorero n’amadini basengeragamo kubera ko umukobwa atwite, bavuga ko kugira ngo basezerane imbere y’Imana byagiye bibasaba kujya gushaka abapasiteri bigenga bakaba ari bo babasezeranya.

Umushumba wa ADEPR mu karere ka Ruhango ntacyo aratangaza kuri iyi ngingo gusa ikizwi ni uko iri dini ryasabye abakiristo baryo kutitabira imihango wo gusaba no gukwa mu bukwe bwa Uyisenga na Banamwana, ngo ujyayo azahezwa mu migenzo y’ idini.


INKURU ZA :
Tanga Igitekerezo
Ibitekerezo 7
fabianus Kuya 16-07-2019

murabeshya mwese ikosa nuko uyu musore yahemukira uyumukobwa ubundi se ibyo gusezerana byanditsehe muri bibiliya? MARIYA NA YOZEFU barashyingiwe cyangwa bagiye kwandikwa mubuyobozi? irindi kosa ADEPER yakoze ni ukubuza abakirisitu kujya mubirori byo gusaba no gukwa

Er Kuya 13-07-2019

Muraho neza, mu by’ukuri abantu baba ari abakristo cg atari bo baba bakwiriye Kuba inyangamugayo ubundi kuki abantu bumva intege nke zabo zatumye bagwa mu cyaha cy’ubusambanyi Imana yo mu ijuru yanga urunuka bumva zigomba kwemerwa zigashyigikirwa ku buryo n’imbere y’Imana mu rusengero ruyitirirwa tujyaho tukabeshya ko umusore n’inkumi dushyingiye babaye indashyikirwa, birinze kugeza ku bukwe, babaye urugero rwiza nyamara bizwi na buri wese ko harimo ibinyoma n’uburyarya nk’ubw’abafarisayo, abasadukayo n’abanditsi nkumva uwagwiriye no gusambana akwiriye kugirwa inama no gufashwa kubivamo kuko birashoboka mu bakoze ubukwe badasambanye uretse iby’inda ndimo dushobozwa na Kristo uduha imbaraga zo kunesha irari rya kamere ryose twe kugira fanatisme kubera ko ari mwene wacu nshyigikire ikinyoma ntibikwiriye kd iyo umuntu yiyakiriye agatwara uwo yihaye mu rwihisho igihe kiragera agahabwa isezerano bikaba biciye mu mucyo naho kwibaza kuri ADEPR cg irindi dini sicyo kibazo cg igisubizo tumenye ukuri kuzatubohora kd ukuri ni ijambo ry’Imana bikwiye gucibwa intege kugira ngo tujye dushyingira abantu bari mu kuri turi imbere y’Imana ahandi ho nta kibazo kubeshya no kwibeshyera ariko Bibiliya iravuga ngo byose bizatuma Imana ishyira abantu mu rubanza. God bless you indeed

Jean Kuya 13-07-2019

Buriya rero buri tsinda ry’abantu bishyize hamwe cg idini rigomba kugira amahame n’amategeko arigenga. Iyo uyaciye ku ruhande, urabihanirwa. Simbona impamvu uwanditse iyi nkuru asa nugaragaza ko hakozwe ishyano. Ati si ubwa mbere muri iri torero banga gusezeranya abatwite...! Niko bimeze, numva umuntu ujya mu idini iri niri abanza kwemera amategeko yaryo no kwiyemeza kuyubahiriza. Njya numva ko ngo muri Islam ho babakubita inkoni runaka nk’icyiru bakabona kubabarirwa! Ahubwo uwo musore sinumva impamvu yashatse ko bamusezeranya azi ko yateye inda. No muri Leta basanze mufitanye isano ya hafi ntibabasezeranya. Amategeko n’amabwiriza ni ngombwa kubahirizwa ahantu hose

Mugabekazi2003@yahoo.fr Kuya 13-07-2019

Ndumva ntakosa itorero rifite kdi n’umusore amaze imyaka myinshi ahasengera ari n’umuririmbye waho bivuze ko yarasanzwe abizi ko badasezeranya abantu batwite bihanganye igihe kirekire none ukwezi 1 kurabananiye mwihangane ntakundi agahugu umuco akandi uwundi, gusa Imana izabubakire urugo rwiza

inumakazungu Kuya 12-07-2019

OK...nibyo...buri dini rigira anahame yaryo,...ariko uyu mutype aranyimije,...ngo bazibanira nyuma azage gusaba imbabazi Mu itorero...hhhh...ibaze...none itorero rigusebeje ...urarishakaho iki,? wagiye murindi...klizia ni imwe,..itunganyr...Gatoli...

Kundwaamani Kuya 12-07-2019

Ibyo bakoze ndabishyigikiye rwose,nonese bo baribayobeweko bitemewe mwitorero ryabo?ikindi murikigihe amadini yabaye meshi Mandi yose abafite gahunda agenderaho mugihe rero wunva utabishoboye wajyahandi,nahubundi Adler ntakosa yakize rwose

Clémence Kuya 12-07-2019

Njyewe ndumva Adpr nta kosa ifite.Niba ifite amategeko igenderaho,uyisengeramo agomba kuyubahiriza.yumvise atanyuzwe,akajya gusengera ahandi.Murakoze!

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...