konka coffee
KONKA

AMAKURU

UKWEZI
ubumwe

Ubuhamya bw’umwana watewe inda na Se wabo afite imyaka 16 bwateye benshi ikiniga

Ubuhamya bw’umwana watewe inda na Se wabo afite imyaka 16 bwateye benshi ikiniga
11-12-2018 saa 08:10' | By Vincent Nsengiyumva | Yasomwe n'abantu 3307 | Ibitekerezo 2

Mukanoheli Aline (izina ryahinduwe) ni umubyeyi w’imyaka 18 uvuka mu Murenge wa Karama mu Karere ka Nyagatare, yatanze ubuhamya bw’uko yafashwe ku ngufu na Se wabo (murumuna wa Se) afite imyaka 16 akamutera inda, bikamugiraho ingaruka zikomeye zirimo n’ubumuga bwatewe n’uko yabazwe akiri muto.

Ni ubuhamya yatanze ubwo urubyiruko rwibumbiye mu muryango wa AJPRODHO Jijukirwa rwasozaga iminsi 16 y’ ubukangurambaga bwo kurwanya ihohoterwa rikorerwa abakobwa n’abagore.

Ni ubukangurambaga bwakorwaga hibandwa ku kwamagana isambanywa ry’abana b’abakobwa.

Ni igikorwa cyasojwe n’urugendo rwakozwe n’urubyiruko rwaturutse mu bice binyuranye by’igihugu, rwatangiriye kuri Stade Amahoro i Remera rusorezwa ku Gishushu kuri Lemigo Hotel.

Mu biganiro byatangiye muri uwo muhango wo gusoza ubukangurambaga bwari bumaze iminsi, abana banyuranye batangiye ubuhamya imbere ya bagenzi babo, kugira ngo bagire isomo babakuraho.

Mu buryo butari bworoheye Mukanoheli kubera ikiniga n’agahinda byamutangaga imbere ubwo yavugaga ubuhamya bw’ibyamubayeho, yavuze uko yafashwe ku ngufu akanaterwa inda n’uwakagombye kumuba hafi akamenya ibibazo bye nk’umubyeyi we.

Mukanoheli yavuze ko yafashwe ku ngufu yiga mu mwaka wa 3 w’amashuri yisumbuye, ubwo yari yagiye gusura nyirakuru ubyara Se utuye mu Rukomo. Yagezeyo asanga nyirakuru ntariyo, murumuna wa Se yari asanze mu rugo niwe wahise amufata ku ngufu.

Intambara nyinshi kuri Mukanoheli zatangiye ubwo, kubivuga bimubera ikibazo, kubiceceka nabyo birushaho kumushengura umutima.

Yagize ati “Nageze kwa nyogokuru nsanga ntawuhari. Nasanze ari data wacu uriyo aranyakira mu nzu, ibyo nari nzanye ansaba kubijyana mu cyumba, nkinjiramo ansangamo angwa gitumo amfata ku ngufu. Byarangoye, byarambabaje, byambereye umusaraba kuba nakegera ababyeyi ngo mbabwire ko ntwite inda ya data wacu.”

Yunzemo ati “Narwanye intambara yo kugira ngo nshake uko mbivuga birananirana. Nahoraga nibaza nzabihera he. Nahamagaye umuhungu mubwira ibibazo natangiye guhura nabyo, ansaba kuyikuramo, byampira nkaba amahoro, yampotora ngapfa nk’abandi bose!”

Mukanoheli yakomeje guhisha uwamuteye inda, nyina aza kumwirukana amubwira ko nta bagore babiri baba mu nzu imwe. Yabuze aho yerekeza amara icyumweru arara mu bihuru.

Se na we wari waragiye muri Uganda, akigera mu rugo akamenyako umukobwa we atwite ngo yahise yishyira mu mugozi ngo yiyahure cyakora abantu batabara basanga atarapfa.

Avuga ko Se akimara guhembuka yagiye kumushakisha amukura mu bihuru aho yari yaragize icumbi.

Uyu mukobwa ngo yakomeje kwihangana abana n’ibikomere bidasanzwe, araceceka yanga kuvuga uwamuteye inda, kuko yumvaga atazi uko abandi bazabyakira, aza kubigaragaza umwana afite umwaka n’amezi 9.

Mukanoheli avuga ko mu murenge baje gushakisha abana b’abakobwa batewe inda, abayobozi aba ariwe basaba gutanga ubuhamya bw’ibyamubayeho mu nteko y’abaturage.

Yagize ati “Byambereye imbogamizi, kubivugira imbere y’abaturage byarangoye kugeza aho mpakanira abayobozi babinsabaga barimo na Visi Meya. Bakomeje kunyinginga banyihanganisha nza kuvuga ibyambayeho ariko byarangoye cyane. Kuva icyo gihe nateranyije imiryango. Ubu mama ntavugana na nyogokuru.”

Avuga ko kuva icyo gihe imiryango yateranye yemeranya ko izita ku mwana, cyane ko na Se umubyara yari yamwihakanye avuga ko adatera inda.

Mukanoheli avuga ko uyu Se wabo yaje kwemera ko umwana ari uwe, yemera ko azajya amwishyurira mituweli, ariko birangirira aho kuko ntacyo yigeze amufasha.

Yavuze ko hari igihe yigeze kubura ubushobozi bwo kurihira umwana we umusanzu wo kwivuza, ahitamo kwiyahura, ariko na we bamutabara atarapfa.

Mukanoheli avuga ko ibyamubayeho byamugizeho ingaruka zzikomeye zirimo kuba yaramugaye ngo kuko yabyaye abazwe kandi atari afite ubushobozi bwo kuibyara.

Ati “ Ubu nsa n’ufite ubumuga kuko nabyaye mbazwe nkiri muto. Ntabwo kubyara nari mbishoboye. Ubu sinshobora guterura ibintu birengeje ibiro 30 kuko iyo mbiteruye mbabara cyane.”

Yasabye bagenzi be guhora bari maso, bakirinda kwizera uwo ari we wese ngo kuko n’umwe bita umuvandimwe ashobora kubahohotera.

Ati “Ntimukarebe so, so wanyu cyangwa inshuti y’umuryango ngo mumwizere kuko nanjye ibi nabikorewe na data wacu. Nshishikariza abana bato kwirinda imibonano mpuzabitsina bakiri bato, kuko arri inzira yo gutara ubumuga.”

Mukanoheli yahinduye ubuzima yiga kuboha udukapu tugezweho tw’abagore, ubu afite icyerekezo

Avuga ko yaje kwegera mama wabo uboha ibikapu bigezweho by’abagore n’abakobwa, amwishyura ibihumbi 50 maze arabimwigisha, ubu nawe asigaye yikorera.

Yagize ati “ Ubu natangiye kwikorerra umurimo wo kuboha ibikapu, imipira n’ingofero by’abagore n’abakobwa. Ntabwo biratera imbere kubera kutagira isoko, ariko ubu sinabura amafaranga yo kugurira umwana mituweli, ibyo kurya n’iubyo kwambara.”

Avuga ko ubu mu kwezi yinjiza amafaranga agera ku bihumbi 50, ariko ngo afite inzozi z’uko isoko rye rizaguka akabona abaguzi benshi ndetse akajya yinjiza amafaranga atubutse.

Murebwayire Shafiga ukuriye ibijyanye n’ihohotera rishingiye ku gitsina (GBV) mu Rwego rw’Ubugenzajyaha RIB yavuze ko igikenewe cyane ari uko abantu bahohoterwa batanga amakuru ku gihe kuko bifasha kurenganura uwahohotewe ndetse bikaba byanatuma bamurinda kuba yasama iyo nda cyangwa kwandura ibindi birwara.

Yavuze ko abantu bagomba kureka imyumvire yo kumva ko gupima DNA bihenze cyane bikaba byabaca intege yo gukurikirana ibibazo byabo, abizeza ko ari serivisi isigaye yoroshye cyane kuko bisigaye bikorerwa imberre mu gihugu.

Umunyamabanga Nshingwabikorwa wa AJPRODHO-Jijukirwa Busingye Anthony yavuze ko bashyize ingufu nyinshi mu kwigisha urubyiruko ibyijyanye n’ihohotera kuko arirwo ruzahindura abandi ndetse n’ababyeyi babo.

JPEG - 97 kb

Umunyamabanga Nshingwabikorwa wa AJPRODHO-Jijukirwa Busingye Anthony avuga ko bashyize ingufu nyinshi mu kwigisha urubyiruko ibyijyanye n’ihohotera

Urubyirruko rwibumbiye muri AJPRODHO rwakoze urugendo rwamagana ihohoterwa rishingiye ku gitsina rikorerwa abakobwa n’abagore

Ni urugendo rwaturukaga kuri Stade i Remera rwerekeza ku Gishushu

Bose intero yari twamaganye abahohotera abana, abakobwa n’abagore


INKURU ZA :
Tanga Igitekerezo
Ibitekerezo 2
Uwamahoro Yvonne Kuya 11-12-2018

Mbega inkuru ibabaje nkuyemo isomo rikomeye ryo kutizera umuntu uwariwe wese meme naso wakubyaye nukujya umuntu yicungira kdi akagira amakenga

Uwamahoro Yvonne Kuya 11-12-2018

Mbega inkuru ibabaje nkuyemo isomo rikomeye ryo kutizera umuntu uwariwe wese meme naso wakubyaye nukujya umuntu yicungira kdi akagira amakenga

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...