konka coffee
KONKA

AMAKURU

UKWEZI

Ubuhamya bwa Jeanne wasambanyijwe n’interahamwe agatemagurwa akanajugunywa mu Kiyaga

Ubuhamya bwa Jeanne wasambanyijwe n’interahamwe agatemagurwa akanajugunywa mu Kiyaga
21-05-2018 saa 13:18' | By Vincent Nsengiyumva | Yasomwe n'abantu 6822 | Ibitekerezo 5

Musabyimana Jeanne d’Arc wiciwe abavandimwe 12 ndetse n’ababyeyi be bombi areba, akaba ariwe wenyine urokoka, yatanze ubuhamya bw’inzira y’umusaraba yanyuzezmo n’uburyo nawe atariyumvisha neza uko yarokotse Jenoside yakorewe Abatutsi muri Mata 1994.

Umuryango wa Musabyimana Jeanne d’Arc, Jenoside yakorewe Abatutsi yabaye batuye mu Kagali ka Nyabitare Umurenge wa Nyarubuye mu Karere ka Kirehe mu Ntara y’Uburasirazuba.

Ubwo hibukwaga imiryango yazimye muri Jenoside yakorewe Abatutsi mu 1994, mu muhango wabereye kuri Paruwasi ya Nyarubuye mu ijoro ryo kuwa Gatandatu tariki ya 19 Gicurasi 2018, nibwo Musabyimana Jeanne d’Arc yatanze ubuhamya bw’ibyamubayeho,byateye intimba abari bitabiriye uyu muhango.

Musabyimana Jeanne d’Arc yavuze ko basaza be 11 abana babo bose ndetse n’ababyeyi be bishwe urw’agashinyaguro batemagujwe amashoka, imihoro n’amacumu, aho bose interahamwe zabiciraga mu maso ye.

Yavuze ko uko bazaga kwica abavandimwe be ari nako bamusimburanwagaho bamusambanya, maze bakamubwira ko we bazamwica bamaze kumuhaga.

Ati “ Barambwiraga ngo wowe kuko wavutse uri umukobwa wenyine tuzajya tugukoresha icyo dushaka hanyuma tuzakwica nitwumva tumaze kuguhaga.Turashaka ko umuryango wa Calixte uzima.”

Abavandimwe be bose uko ari 11 ndetse n’abana babo barabishe barabamara, hasigara ubwana 3 bw’ubukobwa bwa musaza we ndetse na muramukazi we umwe, interahamwe zikajya zibasambanya bombi.

Ati “ Barazaga bakaduhambiranya hagati y’insina njye na muramukazi wanjye maze bagakora icyabazanye barangiza bakavuga ngo tuzagaruka kandi tuzabica tumaze kubahaga.”

Ntibyaje gutinda kuko na muramukazi we bari basigaranye, interahamwe zaje kumutemagura mu mutwe, zikajya zimusambanya ameze nk’ugiye kwipfira, maze nyuma ziza kugaruka ziramurangiriza.

Yakomeje avuga ko hari umunsi interahamwe zaje kumusambanya zirangije umwe muri zo amubwira ko ashaka kumuruhura akamwica, amurasa imyambi ibiri yombi ntiyamufata, maze ahita amureka .

Ati “Igitero cyongeye kugaruka, maze interahamwe zirambwira ziti, tuzi ko abahungu twabamazemo ariko tugaruwe no kugira ngo tubasambanye tubahage ubundi tuzabicire igihe dushakaiye. Harimo umugabo umwe twari duturanye arambwira ngo ngiye kukugirira neza nkwice nimara kukwica uruhuke.Yafashe umuheto andasa umwambi wa mbere arampusha, uwa kabiri nawo urampusha maze arambwira ngo genda uzicwa n’abandi.”

Uko igitero cyagendaga yajyaga kureba mu mirambo y’bavandimwe be niba ntawe ukirimo akuka, ahubwo agasanga imibiri yabo yaratangiye kwangirika.

Yavuze ko impamvu abo mu muryango we bishwe by’agashinyaguro karenze ukwemera, ndetse bakajya banavuga ko mu muryango we nta n’uwo kubara inkuru bazasiga, ngo ni uko hari basaza be 3 bari baragiye barabura, hanyuma interahamwe zikaba zaravugaga ko bagiye mu Nkotanyi.

Yakomeje avuga ko hari umunsi interahamwe yitwa Rutakura yaje aho babaga bamusize mze aravuga ngo twahaze kwica, Nyarubuye twarishe twararambiwe, reka mwe musigaye tubajyane mu Kiyaga tubaruhure.

Ati “ Haje umugabo witwa Rutakura aravuga ngo twahaze kwica, Nyarubuye twarishe twararambiwe, reka mwe musigaye tubajyane mu Kiyaga kituruhure. Baranshorera n’abana b’abakobwa ba musaza wanjye, banshorerana n’abandi bantu 13, maze twerekeza ku Kiyaga, tugeze ku musozi abana batangira kuvuga ko inzara ibishe, interahamwe zibabwira ko bagomba kwihangana kuko benda kutugeza ku kiyaga.”

Bageze ku kiyaga bahambirijweho amabuye maze babajugunyamo, abandi bose barapfa Musabyimana Jeanne yisanga ahantu hafi y’inkombe akiri muzima za nterahamwe zibonye ko atapfuye zimukuramo maze zimuhuriraho bamwe bamutemaguza imihoro mu mutwe, undi amutera icyuma mu musaya, bamutema mu mugongo undi amutera icumu munsi y’umukondo, bagira ngo yapfuye maze baramuterura bajugunya mu kiyaga.

Bukeye bwaho Musabyimana Jeanne yisanze ahandi hantu akiri muzima, yumva ubwenge buragarutse maze yumva ijwi rimubwira riti ‘taha usubire mu rugo’. Yahise yumva akabaraga kamujemo maze arahaguruka ava mu mazi azamuka yerekeza mu rugo ageze haruguru yumva umugore abwiye igitero cyari kuri bariyeri ati ba bantu mwajugunye mu kiyaga hari umwe utarapfuye uvuyemo.

Yagize ati “ Nkimara kuva mu mazi, numvise ijwi ry’umugore rihamagara interahamwe azibwira ko hari umuntu utarapfuye uvuye mu kiyaga, maze zihita zimanuka ziza kundeba, nihisha mu masaka yari hafi aho maze zihageze zirambura zisubirayo.”

Yakomeje urugendo yerekeza mu rugo kuko bwari bumaze kwira, ahageze ahita ajya ku baturanyi maze arabakomangira, bamubonye batangira kumusaba ko yashaka aho ajya ngo kuko bazi ko yapfuye bityo ko bahamusanze byabagwa nabi.

Muri urwo rugo hahise haza umugore wamubyaraga muri Batisimu, maze arahamusanga ahita yiyemeza kumujyana akamuhisha. Yaramujyanye amuhisha hafi y’iwe kuko umugabo we yari umwicanyi ruharwa yirinze kumujyana mu nzu. Yamushyiraga ibiryo, Jeanne akagorwa no kubirya kuko yari amerewe nabi cyane, dore ko yari yaratangiye no kwinukira kubera ibisebe by’imihoro n’amacumu yari yaratemagujwe.

Nyuma y’iminsi 2 ari mu gihuru uwo mugore yamuhishemo, Jeanne yabonye amerewe nabi maze afata umwanzuro wo kujya mu rugo rw’uwo mugore kuko yatekerezaga ko umugabo we yagiye kwica, arazamuka ahageze asanga umwana wabo ari kumva Radio, maze yumva barimo kuvuga ko Inkotanyi zageze Nyarubuye zikabura Abatutsi zitabara, basaba ababa bihishe ko bakiyerekana.

Ati “Nkimara kumva ibyo kuri Radio Muhabura, nahise nzamuka nerekeza aho bari bavuze ko Inkotanyi ziherereye, maze ngenda nihishahisha, ngeze imbere mpura n’abasirikare ndikanga ariko mbura uko nihisha kuko nabo bari bambonye, bahita banyegera maze babonye uko meze bahita bamfata bambwira ko kuva uwo munsi ndokotse, ubwo mpita menya ko ari Inkotanyi.”

Ubwo Inkotanyi zahise zimujyana zitangira kumuvuza ibikomere yari afite, dore ko ibisebe byari byaratangiye kubora bisigaye bivamo inyo.

Musabyimana Jeanne warokotse mu buryo nawe atariyumvisha neza, nyuma yo gutabarwa n’Inkotanyi yahuye n’ingaruka zikomeye yatewe n’ibyo yakorewe, ku buryo byamuviriyemo uburwayi bukomeye, ndetse bigera n’aho ajya asaba Imana ko yakipfira.

Yavuze ko kuva Jenoside yarangira, yabashije kuvuga inzira yanyuzemo muri uyu mwaka wa 2018, ubwo hasozwaga icyumweru cyo kwibuka, cyane ko ari nabwo byasaga n’aho atangiye kugarura ibitekerezo neza.Yavuze ko yatunguwe no kumva ko Abanyarwanda bari kwibuka ku nshuro ya 24 Jenoside yakorewe abatutsi.

N’ubwo Musabyimana Jeanne yahuye n’ibyo bigeragezo byose, ngo yaje kumva ijwi rimusaba kubabarira abamusambanyije bose, abamwiciye abavandimwe n’ababyeyi be, maze arabababarira n’ubwo byari bigoranye.

Musabyimana Jeanne d’Arc atanga ubuhamya bw’inzira y’umusaraba yanyuzemo


INKURU ZA :
Tanga Igitekerezo
Ibitekerezo 5
Magn Kuya 31-05-2018

Humura Imana iragukunda kuba utarapfuye,n umugambi wayo,ndababaye kubw ubuhamya bwawe, Imana ikomore ibikomere byo mu mutima watewe n abagome,komera uhumure.

Nkundabaza joseph Kuya 25-05-2018

Izina ryimana yacu rihabwe icyubahiro mwisi no mwijuru gusa mama icyo nakwisabira nuko niba utarakakira yesu krist nkumwami numukiza wawe wabikora ukarokoka byukuri,mana iguhe ymugusha

gqg Kuya 23-05-2018

Ntacyo nabona mvuga, gusa gutanga imbabazi ndabyemera ariko iyaba nibura muri izo nterahamwe habonekagamo nibura nke 2 maze nazo zikabazwa ibyo zakoreye uriya muryango. Uwo mubyeyi wa batisimu yagize neza, uwamuvugirije induru nizere ko ubutabera buzabimubaza kuko bigaragara ko agihari, kuko uyu JEANNE ariho akigarura ubwenge. Nasaba inzego zibishinzwe kumufasha bakareba niba ntacyo bamumarira mu ngeri zose, kuvuzwa byimbitse, no gufashwa muri byose. BIRABABAJE CYANE;

Ndahiro frank Kuya 22-05-2018

Jean humura ibyabaye ntibizasubira ukundi kuko dufite ubuyobozi bwiza kd kongera kubaho nibwo butwari

Ndahiro frank Kuya 22-05-2018

Jean humura ibyabaye ntibizasubira ukundi kuko dufite ubuyobozi bwiza kd kongera kubaho nibwo butwari

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...