konka coffee
KONKA

AMAKURU

UKWEZI
Minijust

Umuturage agiye kujya arwanya isuri mu murima we Leta ibimuhembere

Umuturage agiye kujya arwanya isuri mu murima we Leta ibimuhembere
13-03-2019 saa 07:26' | By Nsanzimana Ernest | Yasomwe n'abantu 2614 | Ibitekerezo 4

Leta y’ u Rwanda binyuze muri Minisiteri y’ Ibidukikije irateganya gutangiza uburyo bushya bwo kurwanya isuri n’ imyuzure aho umuturage azajya akora igikorwa cyo kubirwanya Leta ikajya imugenera amafaranga runaka kubera icyo gikorwa yakoze.

Umuyobozi w’Ishami rishinzwe Umutungo Kamere w’amazi mu Kigo gishinzwe Amazi n’Amashyamba, Tetero Francois yabitangaje kuri uyu wa 12 Werurwe 2019, ubwo yaganirizaga abanyamakuru kuri gahunda zo kurwanya isuri n’ imyuzure.

Yagize ati “Bitandukanye nuko twabigenzaga tugahamagara ba rwiyemezamirimo bagakora ibikorwa tukabishyura, turashaka gushyiraho uburyo ugirana amasezerano na ba nyiri imirima ukababwira ngo nimukora ibi muzabona aka gahimbazamusyi. Mukumvikana amafaranga”

Yongeyeho ati “Tuvuge niba wowe nk’ umuturage twabonye ko hariya ufite umurima kugira ngo ikibazo cy’ isuri gikemurika ari ukuhatera ishyamba ryawe. Niwemera ukarihatera Numara kuritera tuzaguha aya, nirimara kugera kuri santimetero 50 tuzaguha aya, nirigera kuri metero tuzaguha.”

Ibi ngo ntibizakorwa ku mashyamba gusa ahubwo bizakorwa no kubindi bikorwa byose byo kurwanya isuri, birimo guca amaterasi y’ indinganire, gucukura imirwanyasuri n’ ibindi.


Tetero Francois

Tetero yavuze ko abaturage bakwiye gusobanurirwa ko rimwe na rimwe iyo bamaze icyumweru nta mazi ya WASAC abageraho baba babifitemo uruhare.

Ati “Iyo isuri imanutse ari nyinshi ikajya mu mazi hari ikigero bigeraho WASAC ikaba idashobora kuyatunganya ngo iyahe abaturage igategereza igihe isura izagabanukira”

Iyi gahunda yo guha umuturage agahimbazamusyi kuko barwanyije isuri izatangirira muri Ngororero ahitwa Secoko ahari isuri nyinshi irunda itaka mu mazi ya Nyabarongo. Aha hantu hakorerwa ubucukuzi bw’ amabuye y’ agaciro ahanini niyo mvano y’ iyo suri.

Tetero asobanura ko n’ abacukura amabuye y’ agaciro mu bice bitandukanye baramutse bagaragarije Leta ko bafite umushinga wo kugabanya isuri aho bakorera ibikorwa byabo Leta yajya ibagenera agahimbazamusyi kuri ibyo bikorwa bakoze.

Kurwanya umwuzure mu mujyi wa Kigali

Tetero Francois na Mugabo Jean Pierre ushinzwe amashyamba bavuga ko mu rwego rwo kurwanya umwuzure wa Nyabugogo, Leta iteganya gucukura ibyobo bifatira amazi ku misozi ya Rebero na Mont Kigali.

Ibi byobobo ngo bizajya bifata amazi bige biyarekura gace gace bitumye Nyabugogo ituzura. Ikindi ni ugusaba abaturage bagafata amazi amanuka ku bisenge by’ amazu yabo no gutera imigano iribwa.

Ukwezi kwa Gatatu ni ukwezi kuba guteganyijwemo ibikorwa byinshi byo kurengera ibidukikije kuko tariki 21 Werurwe ari umunsi w’ amashyamba, tariki 22 Werurwe ni umunsi w’ amazi naho tariki 23 Werurwe ni umunsi mpuzamahanga w’ Ubumenyi bw’ Ikirere.


INKURU ZA :
Tanga Igitekerezo
Ibitekerezo 4
Don Kuya 13-03-2019

iyi approach ni nziza pe,izatuma umuturage aba responsible kandi abone n’amafaranga yo gukemura ibindi bibazo

Gruec Kuya 13-03-2019

Ntabwo ari bishya, ababaga mu Rwanda mbere ya genocide niko byakorwaga .

HAVUGIMANA VINCENT Kuya 13-03-2019

Imigano iribwa imera ite?
Iribwa gute?
Munyamakuru ahubwo gira inama Leta ishake yuko yakorohereza abaturage kugiciro gito binyuze munkunga cg inguzanyo abanyarwanda benshi babashe kubona ibigega ba plastics byo gufata Amazi ava kumazu bityo anabagirire akamaro na REG yoye guhangwa Amazi igihe kumavomero amazi yabuze. Mubyukuri hari abaturarwanda benshi bifuza ibigega nka za Afritanks ibi bigega byadufasha gufata Amazi avuye kumazu yacu akaba yanatugirira akamaro.
Let’s yagakwiye kutworohere kubigura kugiciro gito cg se ikagirana amasezerano n’ibigo bibicuruza tukabifata kunguzanyo itunguka kandi yishyurwa make make kubera ubushobozi bityo nabyo byayorohereza mu mishinga itandukanye yiritwa ishyiramo imbaraga ntishoboke ago mafaranga y’izo campaign agashorwa muruyu mushinga w’ibigega kungo nge mfata naho Waba ari sure deal.

HAVUGIMANA VINCENT Kuya 13-03-2019

Imigano iribwa imera ite?
Iribwa gute?
Munyamakuru ahubwo gira inama Leta ishake yuko yakorohereza abaturage kugiciro gito binyuze munkunga cg inguzanyo abanyarwanda benshi babashe kubona ibigega ba plastics byo gufata Amazi ava kumazu bityo anabagirire akamaro na REG yoye guhangwa Amazi igihe kumavomero amazi yabuze. Mubyukuri hari abaturarwanda benshi bifuza ibigega nka za Afritanks ibi bigega byadufasha gufata Amazi avuye kumazu yacu akaba yanatugirira akamaro.
Let’s yagakwiye kutworohere kubigura kugiciro gito cg se ikagirana amasezerano n’ibigo bibicuruza tukabifata kunguzanyo itunguka kandi yishyurwa make make kubera ubushobozi bityo nabyo byayorohereza mu mishinga itandukanye yiritwa ishyiramo imbaraga ntishoboke ago mafaranga y’izo campaign agashorwa muruyu mushinga w’ibigega kungo nge mfata naho Waba ari sure deal.

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...