konka coffee
KONKA

AMAKURU

UKWEZI
Minijust

Urujijo ku bakoresha Tap &Go, baribaza uko amafaranga bashyira ku makarita acungwa

Urujijo ku bakoresha Tap &Go, baribaza uko amafaranga bashyira ku makarita acungwa
26-02-2019 saa 17:52' | By Vincent Nsengiyumva | Yasomwe n'abantu 3775 | Ibitekerezo 1

Abagenzi bakoresha amakarita y’ingendo mu Mujyi wa Kigali azwi nka Tap &Go baribaza uburyo amafaranga bashyiraho acungwa, ngo kuko n’iyo amakarita yabo atakaye yariho amafaranga batabona aho babariza uko bayagaruza.

Ibi abagenzi baganiriye n’ikinyamakuru Ukwezi babigarutseho mu gihe hari hamaze iminsi hagaragazwa ibibazo bitandukanye birimo kwibwa amafaranga n’abakozi (Agents) ba AC Group, gahunda yo kudakorezanyaho amakarita ndetse n’ibindi bagaragaza ko bitabanyura muri serivisi bagombwa nk’abagenzi.

Aba bagenzi baganirije Ukwezi bavuga ko batumva neza mu by’ukuri uko amafaranga bashyira ku makarita acungwa mu gihe aya makarita atabandikwaho ngo bayagireho uburenganzira busesuye ndetse n’amafaranga bashyiraho agire umutekano usesuye.

Uwitwa Celestin utega imodoka zo kuri Ligne yo mu Mujyi – Kimironko avuga ko atarasobanukirwa imikorere y’iriya karita ngo kuko abona nta burenganzira aba agifite ku mafaranga mu gihe yamaze kuyashyiraho ndetse ngo n’iyo ikarita itakaye ayahomba akabura aho abariza .

Yagize ati “Nk’abagenzi dukoresha aya makarita hari ibyo tukibona nk’imbogamizi zikomeye. Ubu mperutse gushyira amafaranga ibihumbi 5 ku ikarita nkojejeho rimwe ihita itakara mba mpombye gutyo. Ubu mba nibaza aho ayo mafaranga yarengeye. Uretse no kutamenya uko amafaranga yacu acungwa hari n’ikibazo cy’ubujura dukunze guhura nacyo aho abadushyiriraho amafaranga batwiba kandi duhora tubigaragaza.”

Undi witwa Emmanuel twahuriye muri Gare ya Nyabugogo avuga ko nyuma yo gutakaza amakarita arenga atatu ariho amafaranga akabura aho abaza ngo ntazongera kugura indi ukundi.

Ati “Njye najyaga ngura ikarita ngashyiraho amafaranga nzakoresha nk’ibyumweru bibiri kuko ntega buri munsi, ariko ngahura n’ikibazo cyo kuzitakaza ngahomba simbone aho mbariza kuko aya makarita ataba atwanditseho. Nyuma yo kubona nkomeje guhomba nafashe icyemezo cyo kutazongera kugura ikarita kuko ubu duha abashoferi amafaranga mu ntoki bakayakira.”

Umurerwa twasanze muri gare yo mu Mujyi utega imodoka ijya Kimironko yagize ati “Ubujura mu gushyira amafaranga kuri Tap&Go bumaze kuba karande. Twarabivuze twarananiwe. Mperutse kujya gushyirishaho amafaranga 1000 nkojejeho rimwe ntashye, bucyeye ngiye kugaruka mu Mujyi bambwira ko nta kintu kiriho. Ikibazo dufite ni uko nta n’ahantu tubariza abashoferi batubwira ko ibyo bibazo bitabareba. Twumva abayobora izi modoka zidutwara bakagombye gukurikirana iki kibazo kuko kiraturambiye.”

Uwimana Esther, umwe mu bagenzi bakoresha “Tap&Go” avuga ko hari igihe iyo karita ishyirwaho amafaranga yayikoza ku cyuma gishinzwe gukuraho amafaranga y’urugendo, ikanga gukora.

Agira ati “Nageze mu mujyi nshyiraho amafaranga ariko natunguwe no kugera mu modoka ijya i Remera ikarita yanjye ikanga, kandi kujyaho amafranga byari byemeye ndetse bigaragara ko yagiyeho.”

Umuvugizi wa sosiyete itwara abagenzi mu Rwanda RFTC ‘Jali Holidings’ Kihangire Bishop yemeza ko abagenzi babagezzaho ibibazo bijyanye na serivisi zitabanogera za Tap&Go ashimangira ko bagiye gufatanya n’umufatanyabikorwa bagikemure byihuse.

Yagize ati “ Nka RFTC dufite umufatanyabiukorwa dufitanye amasezerano mu gutanga iyo serivisi ariwe AC Group.Icyo tugiye gukora ni uko dufatanyije na AC Group tugiye kugikurikirana kugira ngo turebe uko kimeze noneho dufate ingamba zo kugikemura."

Avuga ko ubundi umugenzi mu gihe atakaje ikarita agomba guhabwa indi iriho amafaranga yari kuyatakaye nk’uko bikorwa ku batakaje za Sim Card zibitseho amafaranga.

Yanakomoje ku kibazo cy’abagenzi bishyura amafaranga mu ntoki aho gukoresha amakarita, avuga ko biteza ibihombo kuri kampani anashimangira ko iki kibazo bakigejeje ku nzego za leta zibifite mu nshingano kugira ngo gikemuke.

Ati “ Nka Kampani natwe duhura n’ibihombo bikomeye biterwa n’abagenzi bishyura amafaranga mu ntoki aho gukoresha ikarita. Iyo umugenzi yishyuye umushoferi twe tuba duhombye. Iki kibazo twamaze kukigeza ku nzego zibishinzwe ngo gifatirwe ingamba zikakaye.”

Umukozi ushinzwe imari n’ubutegetsi muri KBS Ltd, Uwamahoro Nadine, avuga ko n’ubwo nta mibare ifatika igaragaza igihombo bashobora kugira mu gihe runaka kubera ko abantu bamwe batakojeje amakarita ku mashini zabugenewe ariko bifuza ko byacika burundu.

Atanga urugero ati “Ku munsi usanga tubara abagenzi bakojejeho bagera ku bihumbi 52 bose baramutse bafite amakarita bishobora no kurenga ibihumbi 53.”

Yagize ati “Twe dushishikariza abantu kugura amakarita kugira ngo duce uwo muco wo kwakira ibiceri mu ntoki! Ikindi kandi mu rwego rwo guca intege iryo tangwa ry’amafranga mu ntoki RURA iherutse gutangiza uburyo bwo gutegereza iminota itanu ku mugenzi wifuza gukoreza ikarita mugenzi we ku cyuma nabyo ni uburyo bwo kongera imbaraga mu kugura amakarita.”

Umuyobozi wa Tap&Go muri AC Group, Benimana Edden avuga ko iyo umugenzi ataye ikarita iriho amafaranga agomba guhita ahamagara umukozi wa AC Group maze agahita akorerwa swap ya mafaranga yari ku ikarita yatakaye agasubizwaho.

Yagize ati “Mu gihe ikarita yatakaye icyo umugenzi asabwa ni ukuduhamagara afite nimero y’ikarita ye tugakora swap amafaranga ye akayasubirana. Mu gihe atabashije guhamagara yakegera abakozi ba AC Group bakamukorera iyo Swap."

Benimana asaba buri wese ko yafata mu mutwe nimero y’ikarita ye kugira ngo mu gihe itakare byorohe kongera kuyibona.

Akomeza kuvuga ko abafite amafaranga ku makarita yabo batagomba kugira impungenge z’uburyo acungwa kuko ngo aba arebererwa na Banki ndetse n’amakampani yose ayafiteho uburenganzira.

Twagerageje kuvugana n’Umuvugizi wa RURA ku murongo wa telephone ngo tumubaze ibiri gukorwa mu gukemura ibibazo abagenzi bagaragaza ko bahuriramo nabyo muri servisi z’ingendo ariko ntibyadukundiye.


INKURU ZA :
Tanga Igitekerezo
Ibitekerezo 1
dolla Kuya 1-03-2019

iyo amakarita yacu agize ikibazo akavunika ntitubona uko twagaruza amafaranga yarariho

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...