konka coffee
KONKA

AMAKURU

UKWEZI

Israel Mbonyi yakoze igitaramo cy’agatangaza abantu bataha bamwirahira-Amafoto

Israel Mbonyi  yakoze igitaramo cy’agatangaza  abantu bataha bamwirahira-Amafoto
11-12-2017 saa 09:15' | By Vincent Nsengiyumva | Yasomwe n'abantu 3145 | Ibitekerezo 1

Umuramyi ukomeye cyane Mbonyicyambu Israel [Mbonyi], yongeye gukora igitaramo cy’agatangaza ubwo yamurikaga album "Intashyo" irimo indirimbo zitanga ubutumwa bw’ihumure ndetse .Abantu ibihumbi bitabiriye iki gitaramo batahanye akanyamuneza abandi bataha bamwirahira.

Iki gitaramo cyabaye ku mugoroba wo kuri iki Cyumweru tariki 10/12/2017 Akagera Hall muri Kigali Conference & Exhibition Village, Camp Kigali, kitabirwa n’abantu benshi cyane dore aho Salle yuzuye abantu bakabura aho bajya, bamwe bakaza gutaha badakandagiye aho cyaberaga kubera ko n’amatike yashize hakiri kare.

Iki gitaramo cya Kabiri cya Israel Mbonyi cyabereye muri Salle yagutse n’ubwo nayo isa n’iyabaye ntoya kubera ubwitabire bw’abantu, nyuma yo gukora igitaramo cyo kumurika album ye ya mbere cyabereye muri Kigali Selena Hotel mu ijoro ryo ku wa 30 Kanama 2015, abantu amagana bagatahana intimba n’agahinda kubera Salle yababanye nto cyane bakabura uko binjira.

Abenshi mu bataragize amahirwe yo kwinjira mu gitaramo cye cya Mbere, bagerageje kuzinduka bikomeye mu rwego rwo kwihanagura amarira no gushira agahinda bagize ubwo baburaga amahirwe yo gutaramana nawe.

Iki gitaramo cyatangiriye ku gihe aho saa kumi n’imwe zuzuye umuhanzi wa mbere mu bari baje gufatikanya na Israelk Mbonyi yari ageze ku rubyiniriro dore ko Salle yo yari yamaze kuzura kuko abantu batangiye kuhagera saa Munani z’igicamunsi.

Mu kumurika album ye ya Kabiri , Israel Mbonyi yafashijwe n’abaramyi bakomeye cyane mu Rwanda bafite abakunzzi batari bake ndetse banafite indirimbo zigaruriye imitima ya benshi nka; Luc Buntu, Patient Bizimana, Aime Uwimana ndetse n’umuramyi ukomeye cyane w’umurundi witwa Dudu T Niyukuri.

Ubwo Israel Mbonyi yageraga ku rubyiniro yakiriwe n’amashyi y’urufaya ndetse n’impundu maze batangira kumufasha kuririmba indirimbo "Sinzibagirwa" yahereyeho mu majwi yo hejuru cyane bagaragaza urukundo n’urukumbuzi bari bamufitiye.

Uyu muhanzi yakoze igitaramo cye mu byiciro bitatu, aho yaririmbye indirimbo hafi ya zose ziri kuri album ye ya mbere, ndetse ku ya kabiri aririmbaho indirimbo enye zamaze zirimo ‘Amarembo y’ijuru, Sinzibagirwa, Hari ubuzima na Intashyo ari nayo yitiriye album ye.

Abantu bari bitabiriye iki gitaramo bagaragaje kwishima bidasanzwe aho byagaragazwaga n’amarangamutima buri wese yari afite ubwo uyu muhanzi yaririmbaga indirimbo ze zinyuranye zahembuye imitima y’ibihumbi byari byaje kumushyigikira.

Iki gitaramo cya Israel Mbonyi cyitabiriwe kandi na bamwe mu byamamare mu Rwanda b’abahanzi batandukanye baba abaririmba indirimbo zo kuramya no guhimbaza Imana barimo ; Aline Gahongayire, Tonzi, Kavutse wo muri Beauty For Ashes, Dominic Ashimwe n’abandi batandukanye ndetse n’abahanzi baririmba indirimbo zisanzwe barimo Christopher, Yvan Buravan, Bruce Melodie, Knowless na Clement, Lil G , Mani Martin, Muyoboke Alex umujyanama wa Chary na Nina n’abandi batandukane.

Israel Mbonyi wagerageje kuririmba indirimbo ze hafi ya zose, yanasogongeje abakunzi be imwe mu ndirimbo izasohoka kuri album ye ya Gatatu agiye gutangira gutegura aho azayimurika umwaka utaha yitwa "Iyo Tubyibutse".Album ya Kabiri yamuritse igizwe n’indirimbo 6.

Iki gitaramo cyari cyitabiriwe n’abahanzi batandukanye

Aime Uwimana nawe yasusurukije ibihumbi by’abari bitabiriye iki gitaramo mu ndirimbo ze zikunzwe

Salle yari yakubise yuzuye

Luc Buntu niwe wabanjirije abandi ku rubyiniriro nawe ashimisha abatari bake

Indirimbo za Mbonyi zafashije abantu ku buryo budasanzwe

Israel Mbonyi yaririmbye indirimbo ze hafi ya zose

Patient Bizimana nawe yashimishije abitabiriye iki gitaramo

Umuhanzikazi Butera Knowless nawe yari yitabiriye iki gitaramo

Israel Mbonyi yanyuzagamo akicurangira Guittar

Alexis Muyoboke nawe ntiyatanzwe muri iki gitaramo cyari cyahuruje imbaga


INKURU ZA :
Tanga Igitekerezo
Ibitekerezo 1
binel Kuya 11-12-2017

Bose yakoze kubatumira kugirango barebe ko n indirimbo zo kuramya no guhimbaza Imana nazo zikundwa. bahindure batangire nabo bahimbe izituma baniteganyiriza mu ijuru

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...