AMAKURU

UKWEZI
RPF

Kigali: Hagiye kuba igiterane kizabohokeramo imitima, kinavurirwemo ibihumbi by’abarwaye amaso ku buntu

Kigali: Hagiye kuba igiterane kizabohokeramo imitima, kinavurirwemo ibihumbi by’abarwaye amaso ku buntu
25-07-2018 saa 08:49' | By Vincent Nsengiyumva | Yasomwe n'abantu 1284 | Ibitekerezo

Umuryango w’ivugabutumwa w’Abanyamerika witwa SOS Adventure ku bufatanye n’amatorero ya Gikristo yo muri Kigali bari gutegura igiterane gikomeye kiswe SOS Adventure Kigali Festival kizabera i Nyamirambo kuri Stade Regional. Muri iki giterane hazanavurwa abarwaye amaso ku buntu, abagera ku bihumbi 6 bahabwe indorerwamo (Lunette), abatishoboye barihirwe Mituweli n’ibindi bitandukanye byo kuzamura imibereho y’abatishoboye.

Iki gitaramo kiratangira kuri uyu wa Gatatu tariki 25 Nyakanga 2018, kirabimburirwa n’urugendo rwo kwamagana ibiyobyabwenge, rutangirira ahazwi nko kuri Onatracom mu Biryogo rusorezwe kuri Stade ya Nyamirambo ari naho hazajya habera iki giterane kizamara iminsi itanu.

Ubwo abayobozi bakuru ba SOS Adventure baganiraga n’abanyamakuru kuri uyu wa Kabiri tariki ya 24 Nyakanga 2018, bavuze ko intego nyamukuru y’iki giterane ari ukubwiriza Abanyarwanda ubutumwa bwiza bagahinduka, ndetse bakanabafasha kuzamura imibereho yabo ngo kuko Roho nziza itura mu mubiri muzima.

Muri iyi minsi 5 iki giterane kizamara, hazibandwa cyane ku gukangurira urubyiruko rwabaswe n’ibiyobyabwenge ndetse n’uburaya kubireka maze bakakira agakiza. Hazanafashwa abantu mu ngeri zitandukanye nko kuvura amaso abantu, guha indorerwamo (Lunettes) abazaba bafite uburwayi bukomeye bagera ku bihumbi 6, gutangira Mituweli abatishoboye 1500 ndetse no guha abana 1000 inkweto zo kwambara.

Pasiteri Kabandana Clever,Umuvugizi w’Itorero rya Assemble de Dieu mu Rwanda akaba ari nawe muhuzabikorwa wa SOS mu Rwanda, ashimangira ko ibi biterane bizibanda ku ivugabutumwa rizanyuzwamo ubukangurambaga mu kurwanya ibiyobyabwenge n’ubusambanyi (uburaya) ababikora bakaba babireka bakakira agakiza.

Yagize ati "Tuzajya tuvuga mu nsengero aho tubwiriza ubutumwa bwiza ndetse no mu bitangazamakuru ko ibiyobyabwenge ari bibi. Ikindi ari nacyo cy’ingenzi ni ibwirizabutumwa. Ijambo ry’Imana rifite imbaraga kuko no mu nsengero dufite urubyiruko rwinshi rwamaze kureka ibiyobyabwenge kubera kubwirizwa ubutumwa bwiza."

Bishop Claver Kabandana akomeza avuga ko Roho nzima itura mu mubiri muzima, akaba ariyo mpamvu bazatanga ubwisungane mu kwivuza ku batishoboye ndetse n’indorerwamo ( lunettes) ku bantu barwaye amaso kugira ngo banabashe gusoma Ijambo ry’Imana muri Bibiliya.

Johannes Amritzer umuyobozi wa SOS Adventure ku Isi yavuze ko muri iki giterane bagiye gukorera i Kigali bazatanga ubutumwa bw’ihumure buhamagarira abantu kuba mu buzima bw’agakiza.

Yatangaje ko yishimiye cyane gukorana n’amatorero yo mu Rwanda mu kwamamaza inkuru nziza ya Yesu Kristo avuga ko ari iby’igiciro kuri we.

Johannes Amritzer avuga ko ubuzima bushaririye yanyuzemo aribwo bwatumye agira umutima w’urubyiruko rubaye mu buzima bubi.

Mu ijambo rye Johannes Amritzer yanyuzagamo agakomoza ku buhamya bwe bugaragaza ubuzima bushaririye yanyuzemo, aho yabaye umwana wo ku muhanda imyaka icyenda ari nako yanywaga ibiyobyabwenge ku rwego rwo hejuru.

Yavuze ko kubatwa n’ibiyobyabwenge, uburaya cyangwa izindi ngeso mbi akenshi biterwa n’ibikomere umuntu yatewe n’ikintu runaka, ashimangira ko icya mbere ari ukubanza kuvura ibyo bikomere binyuze mu ivugabutumwa, ngo iyo bimaze gukira biroroha kuva muri ubwo bubata.

Johannes yavuze ko ku myaka 22 aribwo yabwirijwe ubutumwa bwiza yakira agakiza, ubu akaba ari umuntu w’ikirangirire ugenda ubwiriza hirya no hino ku Isi anafasha abafite ibibazo binyuranye.

Kwinjira muri iki giterane ni ubuntu ku bantu bose. Abateguye iki giterane bateganya ko kizitabirwa n’abantu bagera ku bihumbi 30. Ngo bakoze ubukangurambaga buhagije mu matorero akorera muri Kigali ndetse mu gihe gishize hahurijwe hamwe abapasiteri bagera kuri 600 bavuye mu matorero anyuranye afite inshingano muri iki giterane.

Abahanzi bazaririmba muri iki giterane SOS Adventure Kigali Festival ni Israel Mbonyi, Aime Uwimana na Patient Bizimana, akaba ari bamwe mu bakunzwe cyane mu Rwanda muziki wo kuramya no guhimbaza Imana.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...