konka coffee
KONKA

AMAKURU

UKWEZI

Umuvugabutumwa Kwizera yatangije umuryango ‘LA KUNDA FOUNDATION’ uzajya ufasha abababaye

Umuvugabutumwa Kwizera yatangije umuryango ‘LA KUNDA FOUNDATION’ uzajya ufasha abababaye
6-08-2018 saa 20:12' | By Vincent Nsengiyumva | Yasomwe n'abantu 1598 | Ibitekerezo

Umuvugabutumwa wamenyekanye cyane mu Rwanda witwa Kwizera Emmanuel yatangije umuryango yise ‘LA KUNDA FOUNDATION’ wo gukora ibikorwa binyuranye by’ubufasha, mu rwego rwo kwibuka umugore we witwa KUNDA Therese umaze umwaka yitabye Imana.

Iki gikorwa cyakoze ku mitima ya benshi, Kwizera Emmanuel yagitangirije mu rusengero rwa Evangelical Restoration Church ku Kimisagara, kuri uyu wa 05 Kanama 2018 aho cyari kitabiriwe n’imbaga y’abakirisitu bari baje kumushyigikira.

Mu rwego rwo gukomeza kuzirikana imirimo myiza yaranze Kunda Therese, wari usanzwe akorera umurimo w’Imana muri Evangelical Restoration Church, umugabo we akaba n’umuvugabutumwa muri Ministry ya AEE, Kwizera Emmanuel yatangije uyu muryango yise ‘LA KUNDA FOUNDATION’ aho yavuze ko uzibanda ku bikorwa byo gufasha abakene, gufasha abubatse ingo kubana neza, kwamamaza ubutumwa mu mahanga no gusengera abo butarageraho.

Ubwo yatangizaga uyu muryango ku mugaragaro Kwizera Emmanuel yavuze ko igitekerezo cyo kuwushinga cyaturutse ku bikorwa byiza nyakwigendera Therese yasize akoreye ku Isi, ashimangira ko ibikorwa byiza biherekeza nyir’ukubikora n’iyo avuye mu mubiri.

Yagize ati “ Kubaho si ukuba uhumuke gusa, ushobora kubaho kandi utakiriho. Imirimo y’abakiranutsi irabaherekeza iyo barangije igihe cyabo mu isi. Igitekerezo cyo gushinga iyi Foundation cyaturutse mu bikorwa by’indashyikirwa byaranze umugore wanjye akiriho ndetse n’uruhare rwiza yagize mu rugo rwacu mu myaka icumi twamaranye.”

Aba hafi ya Kwizera Emmanuel, bahuriza ku kuba banezezwa n’imbaraga bamubonamo ziva muri Kristo, aho ngo baziboneye mu bihe bibi yanyuzemo bishaririye byo kubura urubavu rwe akiri muto, ariko bikaba bitaramuciye intege ngo abe yatana mu gukomeza gukora umurimo w’Imana.

Kugeza magingo aya Kwizera Emmanuel aracyakorera umurimo w’Imana mu Muryango Nyafurika w’Ivugabutumwa (AEE) mu gihugu cya Kenya,akaba ari naho akunze kuba ari igihe kinini.

‘LA KUNDA FOUNDATION’ izibanda kandi ku bikorwa byo gutera inkunga yo kwiga abana bavuka mu miryango ikennye cyane , izafasha abashakanye mu kubaka ingo zabo neza ndetse hazajya hakorwa n’amasengesho yo gusengera ibihugu bitarageramo ubutumwa bwiza.

Umuvugabutumwa Kwizera Emmanuel, avuga ko ibi byose uyu muryango uzibandaho ari nk’amasomo yasigaranye yigishijwe n’umugore we Kunda Therese, ngo kuko ari bimwe mu bikorwa byamuranze mu buzima bwe hano mu isi.

JPEG - 212.2 kb

Iki gikorwa cyitabiriwe n’imbaga y’abakirisitu bari baje gushyigikira Umuvugabutumwa Kwizera Emmanuel

JPEG - 224.3 kb

Kwizera yashimangiye ko n’ubwo umugore we batakiri kumwe amufata nk’aho akiriho kubera ibikorwa yasize

Kwizera ari kumwe n’umwe mu bana be nyakwigendera yasize ari bato

JPEG - 205.8 kb

Kwizera Emmanuel (iburyo) ari mu bavugabutumwa bakomeye mu Rwanda

JPEG - 159.3 kb

INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...