AMAKURU

UKWEZI
ubumwe

Abanyeshuri ba Institut Filippo Smaldone Nyamirambo bumijwe n’ibyo babonye ku rwibutso ku Gisozi

Abanyeshuri ba Institut Filippo Smaldone Nyamirambo bumijwe n’ibyo babonye ku rwibutso ku Gisozi
7-09-2019 saa 09:30' | By Chief Editor | Yasomwe n'abantu 6023 | Ibitekerezo

Kuri uyu wa Gatanu tariki 6 Nzeri 2019, abanyeshuri bo mu mwaka wa gatandatu w’amashuri abanza mu kigo giherereye i Nyamirambo kizwi nka Institut Filippo Smaldone, basuye urwibutso rwa Jenoside rwa Kigali ruherereye ku Gisozi, batangazwa n’ubugome ndengakamere Jenoside yakoranywe aho n’abana bato bicwe urw’agashinyaguro.

Institut Filippo Smaldone Nyamirambo, ubusanzwe ni ikigo cyari gisanzwe cyakira abanyeshuri bafite ubumuga bwo kutumva no kutavuga, ariko guhera muri 2014 kubera gahunda ya Leta y’uburezi budaheza, iki kigo cyatangiye kwakira n’abana badafite ubwo bumuga. Abasuye uru rwibutso, ni abana bo mu mwaka wa gatandatu bavanzemo abafite ubumuga bwo kutumva no kutavuga n’abatabufite.

Aba bana bakigera ku rwibutso babanje gusobanurirwa amwe mu mateka yaganishije u Rwanda kuri Jenoside yakorewe abatutsi

Aba bana bose bavutse nyuma ya Jenoside yakorewe abatutsi, batambajijwe ibice bitandukanye by’urwibutso rwa Jenoside rwa Kigali ruri ku Gisozi, basobanurirwa amateka ya mbere ya Jenoside, uko yateguwe, uko yashyizwe mu bikorwa n’uko yahagaritswe ndetse banerekwa uburyo igihugu cyongeye kwiyubaka nyuma ya Jenoside.

Aba banyeshuri beretswe filime ibaha ishusho y’uko Jenoside yakozwe

Aba bana batangaje bikomeye bagejejwe mu gice cyagenewe abana aho beretswe uko abana bishwe urw’agashinyaguro, buri umwe muri aba akajya abaza ati: "Ubuse n’uyu mwana muto mwiza gutya baramwishe?". Basobanuriwe ubugome ndengakamere Jenoside yakoranywe biyemeza kurwanya ingengabitekerezo yayo aho iva ikagera.

Bibukijwe ko kuba barimo abana bafite ubumuga bwo kutumva no kutabona, igihe kimwe kiramutse gishatse gutsemba ikindi, urugero bakibasira abafite ubumuga, nayo yaba ari Jenoside ibakorewe. Aba bana barahiye ko bazarwanya icyazana amacakubiri ayo ari yo yose.

Bashyize indabo ahashyinguwe ibihumbi by’inzirakarengane zishwe muri Jenoside

Soeur Uwayisaba Marie Jeanne uyobora iki kigo, yatangaje ko batekereje iki gikorwa mu rwego rwo kurushaho gufasha abana kumenya amateka yaranze igihugu cyabo bityo bikabafasha kurushaho kumenya uko bakwiye kuba umusemburo w’iterambere rizira ivangura iryo ari ryo ryose. Avuga ko mu kigo ayobora, abana basanzwe batozwa kutavangura bagenzi babo bahereye ku bafite ubumuga bigana n’abatabufite.

Ifoto y’urwibutso bafatiye muri uru rwibutso rwa Gisozi

Aha batangaga inkunga yabo ku rwibutso rwa Gisozi


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...