AMAKURU

UKWEZI
cheno 2020

Hari abashobora kwandurira Coronavirus mu dupfukamunwa bagombaga kudukoresha neza bayirinda

Hari abashobora kwandurira Coronavirus mu dupfukamunwa bagombaga kudukoresha neza bayirinda
30-04-2020 saa 11:32' | By Chief Editor | Yasomwe n'abantu 2614 | Ibitekerezo 1

Minisiteri y’Ubuzima iherutse gutangaza ko Abanyarwanda bose bagomba kwambara udupfukamunwa hirindwa ikwirakwizwa ry’icyorezo cya Coronavirus (COVID-19), ariko abaturage baraburirwa kwitondera udupfukamunwa bakoresha, uko badukoresha ndetse n’uko babika utwakoreshejwe kuko hari abashobora kwandurira muri utwo dupfukamunwa bibwiraga ko ari utwo kubarinda.

Dr Charles Karangwa uyobora Ikigo cy’igihugu gishinzwe kugenzura ubuziranenge bw’imiti n’ibiribwa (Rwanda FDA), mu kiganiro yagiranye n’ikinyamakuru Ukwezi yasobanuye ko icya mbere n’ubwo izina ’agapfukamunwa’ ari ryo rimenyerewe, abaturage bakwiye kwibuka ko bagomba kukambara neza ntigapfuke umunwa gusa kuko ari ngombwa ko gapfuka n’amazuru nk’ahantu byoroshye cyane ko Coronavirus yakwandurira kuko ari indwara yo mu mwanya w’ubuhumekero.

JPEG - 26.6 kb

Dr Charles Karangwa uyobora Ikigo cy’igihugu gishinzwe kugenzura ubuziranenge bw’imiti n’ibiribwa (Rwanda FDA)

Dr Charles Karangwa akangurira abaturage kwirinda udupfukamunwa bashobora kwanduriramo bibeshya ko tuzabarinda, bakamenya ko utwemewe ari utwakozwe n’ibigo byabiherewe uburenganzira. Ibyo bigo byemerewe kudukora bibaswa ko tuba dupfunyitse neza kuburyo ukagura aba yizeye ko ntawundi waba yarakigeze kuko kukigera byatuma abantu bakwirakwiza icyorezo aho kwirinda.

Dr Karangwa akomeza agira ati: "Abaducuruza kandi nabo basabwa kuducururiza ahantu habugenewe hari isuku nko muri farumasi cyangwa ahandi hasukuye ariko bakahatubwira kugirango abagenzuzi bacu barusheho kubikurikirana."

Ku rundi ruhande ariko abemerewe gukora udupfukamunwa nabo barasaba inzego za Leta zitandukanye kubafasha kuko uretse kuba byashyira ubuzima bw’abaturage mu kaga, byanatera aba babyemerewe igihombo. Sunday Justin ayobora ikigo cyitwa Igitenge Fashion House. Avuga ko bumvikanye na Leta uko bagomba kudukora kuburyo tuba twujuje ubuziranenge kandi bakatugurisha macye, bakaba bakeneye ko hari ibyashyirwamo imbaraga.

Sunday Justin ati: "Badusabye ko tugomba kudupfunyika (packaging) kugirango umuntu atazajya akigera undi nawe mukanya akakigera, banadusaba ko dushyiramo uburyo bw’amabwiriza (etiquette) asobanurira abantu uko gakoreshwa n’ibindi bakwitondera, ibyo byose bidusaba amafaranga kandi tukaba tutagomba kurenza amafaranga 500. Ubu rero hirya iyo abantu baratudoda bakatugurisha mu kajagari bikaba byatuma twe twubahiriza amabwiriza duhomba. Ikindi ubu dusa n’abafite isoko muri Kigali gusa kuko ingendo zijya mu ntara ntizirafungurwa, kandi usanga mu ntara bambara za furari n’ibitambaro nabwo bakabikora babonye Polisi, inzego zitandukanye zidufashe tugere no mu ntara vuba kandi hubahirizwe ko abadukora batabyemerewe babihanirwa"

JPEG - 490.1 kb

Sunday Justin uyobora Igitenge Fashion House avuga ko inzego za Leta zikwiye kuba maso

Tariki 28 Mata 2020 kandi ikigo cy’igihugu gishinzwe kubungabunga Ibidukikije (REMA) cyashyize hanze amabwiriza agendanye n’uburyo bwo kubika udupfukamunwa twakoreshejwe hirindwa kwangiza ibidukikije n’ikwirakwira ry’icyorezo cya Coronavirus.

Muri aya mabwiriza REMA ivuga ko bibujijwe kuvanga udupfukamunwa kakoreshejwe n’indi myanda yo mu rugo cyangwa ahandi abantu bakorera ndetse ko bibujijwe kukajugunya aho ari ho hose cyangwa kugatwika. REMA isaba ko hateganywa ibikoresho byihariye tuzajya dushyirwamo nyuma yo gukoreshwa kandi hakaba kure n’aho abantu bagera byibuze muri metero enye.

REMA kandi muri byinshi isaba abaturage barimo kujya bajyana udupfukamunwa twakoreshejwe bakadushyira abaducuruza cyangwa se ku bigo by’ubuzima na farumasi.

Ibi nibyo REMA isaba abaturage kwitondera ku dupfukamunwa twakoreshejwe


INKURU ZA :
Tanga Igitekerezo
Ibitekerezo 1
Nsekanabo Emmy Kuya 4-05-2020

abo bashakashatsi nibakomeze ibikorwa byabo Natwe u Rwanda turebe ko twaba aba1 bavumbuye umuti WA covid19

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...