konka coffee
KONKA

AMAKURU

UKWEZI

Ubuhamya bwa Mukabalisa n’uburyo ababyeyi n’abavandimwe be bishwe urw’agashinyaguro

Ubuhamya bwa Mukabalisa n’uburyo ababyeyi n’abavandimwe be bishwe urw’agashinyaguro
12-04-2018 saa 12:55' | By Chief Editor | Yasomwe n'abantu 8990 | Ibitekerezo 11

Nitwa Immaculee Mukabalisa Shema, navutse mu mwaka w’1987, mvuka mu cyahoze ari komini Kigoma; ubu ni mu murenge wa Mukingo mu karere ka Nyanza, gusa ubu mba muri Leta Zunze Ubumwe za Amerika. Ababyeyi banjye ni KAGERUKA Aphrodice (Mwarimu) na Mukakizima Evaste.

Iwacu twavutse turi abana 7, nkaba ari nanjye wari mutoya. Ndibuka ko Inkotanyi ziza mu Rwanda njye nari i Kigali kwa mukuru wanjye, tujya ku muhanda aho imodoka (bus) zanyuraga zigiye muri CND (ahakorera Inteko Ishinga Amategeko) ariko iwabo wa mama bose bari barahungiye i Bugande cyera.

Ubwo bidatinze naratashye, ngeze iwacu mucyaro hari murumuna wa mama witwaga Olive, yaje kudusura aturutse i Bugande ariko baramufunga tumubona hashize iminsi gusa sinzi aho yari afungiye ariko muri icyo gihe iwacu bajyaga baza kudusaka imbunda n’ibyitso bavuga ko boherejwe n’uwari burugumestre wa Kigoma.

Jenoside ijya gutangira rero narabyutse mu gitongo nsanga papa na mama n’abo tuvukana (Bane nanjye wa 5 kuko 2 bari barashatse) baricaye ari mugitondo bose barimo kumva radiyo, ariko nk’umwana njye sinari nzi ibyo aribyo. Ni uko mukuru wanjye witwaga Mignone ni we wambwiye ati “intambara igiye gutera Perezida yapfuye”.

Ubwo uwo munsi twiriwe aho ariko mbona iwacu byahindutse, bigeze ku mugoroba tujya kurara mu masaka twumva imbwa zirara zimoka ariko bwenda gucya turataha. Musaza wanjye na mukuru wanjye bigaga mu mashuri yisumbuye nibo bakuru twari dusigaranye, sinzi aho babohereje muri icyo gihe. Papa we yakomezaga yumva amakuru kuri radiyo, byabaye iminsi twirirwa mu rugo tukarara mu masaka.

Bidatinze, ndibuka ko nasanze mama ari mu muryango arimo kurira kuko abavaga i Kigali bahunze bazanye amakuru ko mukuru wanjye bamutaye muri Nyabarongo n’umugabo we n’umwana bahunga baza iwacu, bakavuga ko undi mukuru wanjye wari utwit bishe umugabo we hanyuma uwo mukuru wanjye bakamusatura ngo kuko yari atwite Inyenzi.

Mama yari afite agahinda kenshi gusa mukuru wanjye twakurikiranaga ni we wambwiye ibyo byose, mubaza impamvu babishe ansobanurira ko intambara yateye ko abahutu barimo kwica abatutsi, njye sinari nzi umuhutu cyangwa umututsi kuko njye n’aho nigaga ntawabimbajije kuko papa yari umwarimu buriya bari babizi niyo mpamvu batabimbajije.

Ubwo rero ibintu byabaye bibi batangira gusahura amazu, barasenya, inka batangira kuzirya ariko mama wanjye ku ikubitiro bahise bamwica bamukuye aho yari yihishe, gusa ikintu kinkomeretsa umutima ni uburyo mama bamwishe bamwambuye ubusa bamutera igisongo mu nda ibyara bamurambika mu muhanda kandi ari umubyeyi.

Ubwo twe aho twari twihishe na papa n’abo tuva inda imwe, amakuru twarayamenye ariko papa atubuza kurira gusa icyo yakoze amafaranga yari afite yahise ayaduha arayatugabanya ariko ngirango yadusezeragaho atubwira ko uzajya kutwica tuzayamuha gusa sinakubwira ngo yari angahe sinyibuka.

Ubwo aho twari turi twahise tuhava papa aravuga ngo tujye gupfira aho abandi bari, tujya ku musozi wari hakurya y’iwacu ariko twarebaga ibibera ku musozi w’iwacu. Twari abantu benshi twicaye inyuma y’urubingo. Ubwo interahamwe zamenye aho abantu bari, ni uko twagiye kubona tubona zirimo ziramanuka ziza ku musozi twariho, umugabo witwa Munyaburanga niwe wari uziri imbere n’ubu ifoto ye ( yambaye imyenda y’ama training ya orange) mpora nyibona kuko yari umuturanyi wacu.

Ubwo twagerageje kwiruka gusa papa we yarajijishije yinjira mu kabari ariko sinzi uwabatungiye agatoki bamusohoyemo baramutemagura bagenda bazi ko yapfuye, icyo gihe hapfuye abantu benshi cyane. Twe rero twirukaga tutazi n’iyo tujya, nkanjye nakurikiraga bakuru banjye babiri twari kumwe ariko iby’abana nyine twaragarutse tujya kureba papa dusubira iwacu dusanga papa bamutemaguye avirirana amaraso, ubwo bafashe ikanzu nari nambaye bahita bayimuzirika mu mutwe dusubira mu matongo.

Nihuse rero twasubiye mu matongo, icyo gihe bavugaga ko abagore n’abakobwa batazongera kubica, ubwo hari ba masenge babiri twari kumwe bageragezaga gukanda papa bamuvura bya Kinyarwanda, bidatinze rero amakuru yaramenyekanye ko papa akiriho, maze baragaruka baramutemagura kuko atabyukaga rero batemaga nk’abatema igiti, uko bamutema agataka bigeze aho rero gutaka byarahagaze, twumvaga bavuga ko atakinyagambura bahita bagenda.

Aho twari twicaye rero amarira yari yarakamye ahubwo twaririmbaga indirimbo z’Imana. Bakigenda mukuru wanjye Mignone (wigaga mu mwaka wa 5 w’amashuri abanza), ni nawe wari mukuru twasaga n’aho dusigaranye, aragenda na masenge witwaga Eveliyana barebye papa batubwira ko akiri muzima, mu byukuri ntiyagaragaraga mu maso ahantu hose yari amaraso kandi ntiyanavugaga yewe n’umusambi yari aryamyeho wari amaraso gusa, n’ibikuta byari byatarukiyeho amaraso kubera uburyo bamutemaga.

Gusa ba masenge bagerageje kumurwanaho yewe bamusabiraga mu baturanyi inyama z’inka zabatutsi babaga batemye bagatogosa inyama bakamusuka isupu mukanwa arongera arahembuka ntiyavugaga ariko yamenyaga umuntu.

Inshuro ya 3 ho baje ari simusiga n’umujinya mwinshi noneho bafata ishoka bahereza umugabo twari duturanye w’umututsi we bari baramuretse bavuga ko azipfusha, maze bati “Nutamwica nawe turakwic”. Yari umugabo unanutse cyane kandi muremure, yateruye ishoka yikubitana nayo hasi, ni uko bafata ya shoka umutwe barawasa nk’abasa inkwi, bamusize yabaye amagufwa gusa kuko nta n’ubwo noneho wabashaga kubona ko ari umuntu ahubwo ba masenge abo na Mignone wabaye magorwa ari umwana nibo bazinze ikirago bari bamwashirijeho njye na mukuru wanjye wundi bahimbaga Mbegeti twarariraga, data yaratemwe, araswa, arakubitwa gusa Imana ibababarire.

Ubwo twabaye imfubyi gutyo na musaza wacu aho yari yihishe baje kumwica; abagore n’abakobwa twese badushyize hamwe batubwira ko tugomba kujya kwitaba kuri komine Kigoma tugenda tunyura ku mirambo y’abantu, ukumva baravuze bati ni kanaka. Njye abenshi sinari mbazi gusa amazina narayumvaga. Twageze kuri komine, abasiririkare n’abapolisi batangira kubohoza (gusambanya) abagore n’abakobwa twabaga turi kumwe bagenda bakuramo umwe agenda akongera akagaruka, twarahiriwe ku mugoroba bati musubire iyo mwaturutse. Ubwo twaratashye ariko tuhageze badushyira ahantu hamwe, ni uko interahamwe yitwaga Gahindigiri iraza ifite ama grenade itangira kubaza aho mukuru wacu yagiye (umwe iwacu bohereje intambara igitangira akajya ku nshuti y’iwacu) tumubwira ko tutahazi akavuga ko nta kintu bakoze ko agiye kutwicira mu ishyamba ryuwitwa Karambizi. Baradushoreye ariko dutanga amafaranga baraturekura n’abo ba masenge.

Icyo gihe abakobwa n’abagore barabohozwaga (bakabajyana kubasambanya) bamwe bakabatera amacumu mubirenge, n’izo mbabazi wumva kwari ukubica urw’agashinyaguro gusa. Ku kandi gasozi duturanye abagore n’abakobwa bari babataye mu misarane bamaramo n’iminsi bamwe batarashiramo umwuka baririmba. Muri icyo gihe rero njye amatariki sinyibuka ariko hari haciyeho iminsi.

Ubwo umunsi wo kutwica warageze rero, ni uko twese abagore n’abakobwa ari ninjoro ngirango hari nka saa moya cyangwa saa mbiri, baradushorera twese batwicaza hirya y’iwacu gatoya batangira kujya mungo basaba amatoroshi n’imihoro, baba baradushoreye bamwe imbere abandi inyuma natwe turi hagati ariko njye mbwira bakuru banjye babiri twari kumwe nti muze twiruke kuko nabonaga badutwaye mu ishyamba kandi ari ninjoro, nuko bati turatanga amafaranga kuko n’ubundi byajyaga bibaho bakadushorera mugatanga ayo mufite bakabarekura mukagenda ariko byabaga kumanywa. Ni uko njye nkomeza kubabwira ariko njye numvaga mfite ubwoba bw’iryo shyamba.

Nagiye inyuma y’igishyitsi nk’ugiye kunyara, nari gatoya rero ngirango ntibambonye barakomeje umurongo wose urarangira bageze imbere gatoya bahise babicira aho batangira gutaka mbumva, umukobwa umwe witwaga Venantie niwe waharokotse bamuha imbabazi ariko nawe bari baramugize ikimuga kubera kwirirwa bamusambanya byanamuviriyemo gupfa nyuma ya Jenoside.

Gusa ni Imana iba ifite umugambi wayo ku muntu, nanjye rwose ni yo yabankijije kuko mugitondo nasubiye kureba aho babiciye numva ijwi rya Mignone ataka ngo bamuhe amazi barimo babataba mu byobo ariko we bamutaba itaka ryose rigahita rimuvaho kuko yarahumekega cyane asaba amazi, bamukubise ipiki mu mutwe mvuza induru muri iryo shyamba baba baranyirukankanye, mu kwiruka rero nahuye n’umusore arantangira, ni umusore wari uzi iwacu, icyo gihe igitero cyari kinyirukankanye nagendaga ntazi iyo njya maze uwo mugiraneza ati: “Nturi umwana wo kwa mwarimu?” Ndamwikiriza maze ati ngwino, anjyana mu nzu maze abanyirukankagaho ntibamenya aho ndengeye. Kubera kudasinzira, nahise nsinzira n’ibigori byokeje yampaye sinabiriye.

Nakangutse barimo batukana ngo navane inyenzi mu rugo, yatangiye knjya anjyana ku marondo akantwara anzingiye mu musambi akandaza mu bishyimbo cyangwa munzu ya mukuru we yari itaruzura yari aho hafi y’irondo, aho yanyitayeho Imana imuhe iruhuko ridashira yitwaga Feresiyani. Byaranze abantu baza kubimenya anjyana ku rundi rugo rwa se kuko se yari afite abagore babiri, naho baranyirukana anshyira undi mugenzi we naho nahabaye iminsi naho baza kunyirukana uwo mugenziwe adahari ntangira kuzerera gutyo ntazi iyo mva ariko kuko hagati aho twigeze kujyana iwacu kuzana imyenda mu babisahuye kuko nta myenda nari mfite uretse iyo nari nambaye; inzira twanyuze narayibukaga ndagenda ariko nenda kuhagera mpura n’umugore wa Kaniziyo, yari n’inshuti ya mama ambonye ararira cyane ati “Koko ubu urajya hehe?... Birirwa bagushakisha barakubuze none urizanye?”.

Ubwo yanjyanye mu nzu, imvura yahise igwa ari nyinshi, bambera abantu beza kuko banjyanye muri iyo mvura bampa ikote ry’umuhungu wabo, umugabo we arantwara n’amaguru anjyana ku wundi musozi duturanye ku muntu wari inshuti na papa. Niho inkotanyi zansanze gusa Jenoside irangiye nza guhura n’abavandimwe banjye basigaye, kuri ubu dusigaye turi batatu gusa Imana yangiriye neza irandokora ni ubuntu yangiriye. Ndahumuriza imfubyi zose nzibutsa ko Yesu ari we se w’impfubyi. Jenoside irangiye ubuzima bwabaye bubi ariko Imana yagiye ibidutambutsamo iradukomeza iratwubakira kandi iranatwubaka yageretseho no kuduha abana.

Imana yambereye umubyeyi iramfasha ndiga, ingirira ubuntu injyana kwiga no muri Amerika Kaminuza ndayirangiza. Ubu ndubatse mfite umugabo n’abana babiri, n’ubwo abana banjye batagira nyirakuru cyangwa sekuru ariko turabyara inshuti n’abavandimwe bakaduhemba.

Ikindi nshimira Imana ni uko yanshoboje abo twanyuranye mur iyo nzira y’umusaraba nkabashyingura, imva yabo nabashije kuyubakisha no kuyisukura mu bushobozi bwanjye bucye, ndumva hashyinguye 64 ni bo babasha kwibukwa abandi ntawubibuka ariko numva bavuga ko bashobora kuba barenga. Ibyo mbishimira Imana cyane ko n’aho baruhukiye njye wabavuyemo ngasigara ariko ntabatereranye ababikoze njye narababariye n’ Imana ibabarire ariko kandi rero ntabwo nibagiwe.


INKURU ZA :
Tanga Igitekerezo
Ibitekerezo 11
kanyamibwa Kuya 30-04-2018

Nibutse disi Kageruka ukuntu yatwigishije ,adukunda ariko abishi ntibamugiriye Impuhwe,Ihangane Muvandimwe ntabwo tuzazima

CHACHA Kuya 19-04-2018

MBEGA NDARIZE PE CYAKORA BIRABABAJE

claudine Kuya 18-04-2018

Nshuti yanjye komera, kndi humura lmana iri muruhande rwawe iyakurinze iracyahari, gusa abasigaye duharanire kugirango bitazongera kubaho,gusa birababaje.

vava Kuya 18-04-2018

sha rwose uyu mutegarugori yahuritse akiri umwana.nihanganishije abantu bose babuze ababo bitewe n’aya mahano ya genocide yakorewe abatutsi.ubu koko ibi byava muntekerezo z’abantu babyiboneye n’amaso??.yewe birarenze pe! sinabona icyo ndenzaho .

sisi Kuya 15-04-2018

jenoside ntizongere ukundi pole kandi mama

-xxxx- Kuya 15-04-2018

Immaculee,Imana ni Se w’imfubyi Humura nturi wenyine

Emmanuel K Kuya 13-04-2018

Ihangane Immaculee. Humura Ntituzazima. Imana yacu Itubereye maso. Nibaruhukire mu mahoro

alb Kuya 13-04-2018

Uri intwali mamawe ubuhamya bwawe bwanditse neza knd burerekana ko ufite ikizere humura uzabaho knd neza gusa abahutu baraduhemukiye nubwo atari bose uzaharanire kugira umuryango mwiza abaguhekuye nyacyo bakurusha uburo bwinshi ntibugira umusururu .

UMWIZA DEBORA Kuya 13-04-2018

IMANA IHIMBAZWE YO YAKUROKOYE .BIJYA BIRENGA UBWENGE BWANJYE,NKUMVA KUMIRA AMACANDWE BYANZE NKUMVA NANIWE KUNYEGANYEGA IYO NTEKEREJE KURI GENOCIDE YAKOREWE ABABYEYI BACU,BAKURU BACU BASAZA BACU BABATUTSI.ARIKO MANA YANJYE MUREMYI WARI URI HEHE KOKO?ESE KO BINGORA KO NABABARIRA KANDI NTARABIBONYE KOKO MANA ...

gqg Kuya 12-04-2018

Ces imbéciles, sha IMANA izabica 3. Ariko ngirango hari hakwiye kuzabaho igihe ababa bicanyi bajya bakusanywa, nk’abo mu Kagari kamwe bamaze gufungurwa, abihannye, abasabye imbabazi, maze bakicara, akaba aribo babwira imbaga y’abaturage n’urubyiruko uko bishe bantu. Ntakibazo, n’ipfunwe rinshi, no kubika umutwe, n’ibimwaro, niba abantu nkaba bashobora kugira ikimwaro. Kwica, ukica n’umuntu wamaze kugira ikimuga. MWARIMU ko IMANA yari yamuhagazeho , buriya iyo bamureka koko. UBUGIRA KANGAHE? Nshimye uriya musaza , yiyunze n’IMANA MURI biriya bigeragezo bari bamushyizemo. Yanga kwica umuntu; Agwa hasi disi. Sha wa mwana we, wahuye n’akaga. Ariko wari uzi n’ubwenge. Warababwiye ntibabyumva. Buriya ubwo mwavaga kuri KOMINI KIGOMA niho babatangiye. Ntimwabimenya kuko babeshye ngo ntibazongera kwica igitsina gore. BAZAHORA ARI IMBWA NTAKINDI. None abazungu barimo kubafungura. MWIBAZE.

mukeshimana ruth Kuya 12-04-2018

igitekerero nge natanga ni ugukomere kd ukiragiza imana kd ugaharanira gutera imbire kd nkurubyiruko duharanire ko bitazongera ukundi

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...