konka coffee
KONKA

AMAKURU

UKWEZI

Ababyeyi b’inaha babura abana babo bagatuza, babura inkoko induru zikavuga - IP Hitayezu

Ababyeyi b’inaha babura abana babo bagatuza, babura inkoko induru zikavuga - IP Hitayezu
10-05-2018 saa 14:48' | By Chief Editor | Yasomwe n'abantu 4798 | Ibitekerezo

Hitayezu Faustin, Komanda wa sitasiyo ya Polisi ya Mushishiro mu karere ka Muhanga, avuga ko bibabaje cyane kuba abaturage bo mu mirenge ya Mushishiro, Kibangu na Rugendabari ari nayo mirenge sitasiyo ya Polisi ayobora igenzura, bigira ntibindeba mu burere n’uburezi bw’abana babo bikagera n’aho babura abana babo bakituriza nyamara baramuka babonye ijoro rije inkoko yabo itarataha, ibintu bigacika kugeza aho bazenguruka umusozi wose babaririza.

Ibi uyu mupolisi yabigarutseho ubwo yari kumwe n’itsinda ry’Intumwa za Minisiteri y’Uburezi ririmo gukora ubukangurambaga bugamije kuzamura ireme ry’uburezi. Iri tsinda ririmo kuzenguruka mu bigo bitandukanye mu karere ka Muhanga, ryagiye rigaragarizwa ibibazo bitandukanye bidindiza ireme ry’uburezi.

Mu mashuri yasuwe mu mirenge itandukanye y’akarere ka Muhanga, harimo aho abayobozi b’ibigo bagaragaje ko gahunda yo kugaburira ku ishuri abana bo mu cyiciro rusange cy’amashuri yisumbuye, ikomeje kudindira bitewe n’imyumvire ya bamwe mu babyeyi banga gutanga umusanzu mu burezi bw’abana babo, ugasanga abana bamwe barabwirirwa bakigana na bagenzi babo bariye ku ishuri.

By’umwihariko mu murenge wa Kibangu, kuri uyu wa Kabiri hasuwe ibigo bibiri birimo G.S Kibangu na G.S Murehe B. Muri G.S Kibangu, ikibazo cy’inda z’imburagihe n’icy’abana benshi bata ishuri, biri mu byatinzweho n’izo ntumwa za MINEDUC. Muri G.S Murehe B, ho byagaragaye ko hari abana bo mu mashuri yisumbuye babwirirwa bakigana na bagenzi babo bavuye ku ishuri, ndetse naho abana bata ishuri bakaba bakiri benshi.

Aha IP Hitayezu yari kumwe n’intumwa za Minisiteri y’Uburezi muri G.S Kibangu

Uruhare rw’ababyeyi batita ku burezi bw’abana babo kandi ntibanabakurikirane kugeza ubwo n’umwana ava mu ishuri cyangwa akarara mu gasozi ari mu ngeso mbi ababyeyi ntibabikurikirane, nibyo IP Faustin Hitayezu yahereyeho avuga ko inzego z’umutekano n’inzego z’ubuyobozi bw’ibanze, bazafatanya guhana ababyeyi bigira ntibindeba, kuko ngo abenshi usanga badashishikazwa no gukurikirana abana babyaye nyamara bagakurikirana amatungo yabo magufi, aho ngo umuturage abura inkoko ye induru zikavuga yabura umwana akituriza.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...