AMAKURU

UKWEZI
ubumwe

Abaminisitiri 3 basuye umupaka uhuza u Rwanda na Kongo kureba uko Ebola ikumiriwe

Abaminisitiri 3 basuye umupaka uhuza u Rwanda na Kongo kureba uko Ebola ikumiriwe
5-08-2019 saa 16:12' | By Nsanzimana Ernest | Yasomwe n'abantu 1980 | Ibitekerezo

Kuri uyu wa Mbere tariki 5 Kanama 2019 Abaminisitiri 3 b’ u Rwanda barimo uw’Ubuzima Dr Diane Gashumba uw’Ubutegetsi bw’Igihugu Prof. Shyaka Anastase n’uw’ibikorwa by’ubutabazi Germaine Kamayirese basuye umupaka uhuza u Rwanda na DRC i Rubavu, mu rwego rwo kureba ibikorwa bigamije gufasha u Rwanda gukumira icyorezo cya Ebola.

Ni mu gihe ku wa Kabili w’ icyumweru gishize aribwo mu mujyi wa Goma hongeye kugaragara umurwayi wa Ebola, ku wa Gatatu ikamuhitana agasiga yanduje umugore we n’ umukobwa we w’ umwaka 1.

Kugeza ubu nta murwayi wa Ebola uragaragara ku butaka bw’ u Rwanda nk’ uko byemezwa na Minisiteri y’ Ubuzima.

Iyi Minisiteri isaba Abanyarwanda kwirinda gukorera muri Repubulika ya Demukarasi ya Kongo ingendo zitari ngombwa no kwirinda gutumira abavugabutumwa baho mu bikorwa by’ amasengesho cyangwa ibitaramo bibera mu Rwanda.

Umuyobozi mushya w’ Ikigo cy’ Igihugu cy’ Ubuzima mu Rwanda Dr Sabin Nsanzimana kuri iki Cyumweru yasabye abafite insengero mu Rwanda kudatumira mu ibanga abavugabutumwa bavuye ahari icyorezo cya Ebola.

Kugeza ubu abantu barenga 1800 bamaze guhitanwa na Ebola muri Repubulika ya Demukarasi ya Kongo kuva muri Kamena umwaka ushize yongeye kuhagaragara.

Mu mujyi wa Goma uhana imbibi n’ u Rwanda mu karere ka Rubavu hamaze gupfa abantu batatu bazize icyorezo cya Ebola.

Gukaraba intoki n’ amazi meza n’ isabune ni bumwe mu buryo bwo kwirinda icyorezo cya Ebola kuko virusi itera iki cyorezo yicwa n’ amazi meza n’ isabune.

Kuri iki Cyumweru muri siporo rusange iba kabiri mu kwezi, Minisitiri w’ Ubuzima Dr Diane Gashumba yasabye abantu kwirinda gusuhuzanya bitari ngombwa no kwirinda ingendo zitari ngombwa muri Kongo.

Yagize ati “Kuba nta ebola iragaragara mu Rwanda ni ukubera ubufatanye bw’ inzego ariko cyane cyane abaturage bagira isuku bakaraba intoki n’ amazi meza n’ isabune, ariko cyane cyane kwirinda gukorera ingendo aho iki cyorezo cyagaragaye cyane cyane mu gihugu cy’ abaturanyi cya Repubulika ya Demukarasi ya Kongo”.

Minisitiri Gashumba akomeza agira ati “Amateraniro atari ngombwa yaba ay’ amasengesho yabo andi materaniro atari ngombwa tugomba kuyirinda. Tugomba no kugira isuku kuko iriya virusi itera ebola iyo ukabarabye intoki n’ isabune irapfa”.

Ku mupaka uhuza u Rwanda na Repubulika ya Demukarasi ya Kongo yashyizwe za ravabo zigezweho mu rwego rwo korohereza abinjira mu Rwanda baturutse muri Kongo gukaraba intoki.

Kuri uyu mupaka kandi hashyizwe kamera ebyiri zifite ubushobozi bwo gupima umuriro abinjira mu kivunge haba harimo ufite umuriro mwinshi zigatanya impuruza.




INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...