AMAKURU

UKWEZI
pax

Bugesera : Ababyeyi beretswe ibyiza byo kwandikisha umwana akivuka

Bugesera : Ababyeyi beretswe ibyiza byo kwandikisha umwana akivuka
11-08-2020 saa 14:00' | By UKWEZI | Yasomwe n'abantu 728 | Ibitekerezo

Ababyeyi bo mu Karere ka Bugesera, Intara y’Uburasirazuba bibukijwe ko kwandikisha umwana akiri kwa muganga byoroshya iyi serivisi kandi bituma yegerezwa abaturage kurushaho, bigafasha umubyeyi kwarama adasiragiye ajya ku murenge kwandikisha umwana nk’uko byari bisanzwe.

Ibi byatagarutsweho kuri uyu wa 10 Kanama 2020, ubwo u Rwanda rwifatanyaga n’ibindi bihugu mu kwizihiza Umunsi Nyafurika w’Irangamimerere, CRVS [Civil Registration and Vital Statistic].

Uyu munsi wizihirijwe hirya no hino aho mu Karere ka Bugesera wahuriranye n’igikorwa cyo kwandikira abana bavutse kwa muganga kimwe no kwandukuza abitabye Imana, ibyo bikaba byegerejwe abaturage kuko bizajya bikorerwa kwa muganga no ku kagari.

Insanganyamatsiko y’uyu mwaka igira iti : “Ikoranabuhanga mu Irangamimerere : Inkingi ya Serivise yihuse kandi inoze.”

Mu Rwanda hari Itegeko no 32/2016 ryo ku wa 28/08/2016 rigenga abantu n’umuryango ryashyizeho abanditsi bashya b’irangamimerere.

Ku ikubitiro mu Rwanda abanditsi 550 bo mu bigo nderabuzima, harimo n’ibyigenga bagera ku 1100 bahuguwe mu ikoranabuhanga rizakoreshwa mu kwandika umwana no kwandikura umuntu witabye Imana mu irangamimerere ku buryo bw’ikoranabuhanga. Igikorwa kiri gukorwa ku rwego rw’ibitaro n’ibigo nderabuzima.

Umukozi ushinzwe irangamimerere mu Kigo cy’Igihugu cy’Ubuzima, RBC, Ngoga Godfred yavuze ko izi serivisi hari igihe bizajya biba ngombwa ko zitangwa n’Akagari.

Yakomeje agira ati “Ku bana bazavukira cyangwa abazapfira ku bitaro cyangwa ku kigo nderabuzima azataha amaze guhabwa service ijyanye n’irangamimerere. Abavukiye kuri poste de sante cyangwa mu rugo service izatangwa n’Akagari".

Umuyobozi w’Akarere ka Bugesera Mutabazi Richard yibukije ababyeyi bari kwandikisha abana ko kwandikisha abana bakiri kwa muganga ko bifasha umubyeyi kwarama.

Ati “Byagoraga umubyeyi uri ku kiriri kwandikisha umwana mu minsi igenwa n’amategeko".

Meya Mutabazi kandi yasabye abashinzwe bwandika ko bajya borohereza abaturage bakanafasha ba bandi bafite ubumenyi buke.

Uko serivisi igezwa ku bagenerwabikorwa

Umubyeyi niwe wandikisha umwana, agahabwa nomero izajya ikoreshwa n’umwana igihe akeneye icyangombwa kijyanye n’irangamimerere.

Mu gihe umubyeyi adafite iyo nomero azakoresha indangamuntu ayerekane ku batanga serivisi za Irembo ahabwe icyangombwa yifuza.

Ubu buryo bwo kwandika abana bavutse no gusiba abapfuye mu irangamimerere rivuguruye buje bufite ubushobozi bwo guhuza irangamimerere (CRVS), iyandikwa ry’abaturage mu bubiko bw’ikoranabuhanga (National Population Registry) n’amakuru y’ubuzima.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA