AMAKURU

UKWEZI

“Hari abitiranya indwara yo ‘kuvura kw’amaraso’ n’amarozi kubera ubukana n’ibimenyetso byayo”

“Hari abitiranya indwara yo ‘kuvura kw’amaraso’ n’amarozi kubera ubukana n’ibimenyetso byayo”
19-10-2018 saa 11:29' | By Vincent Nsengiyumva | Yasomwe n'abantu 2063 | Ibitekerezo

Abahanga mu buvuzi bw’indwara yo kuvura kw’amaraso (Blood Clots) bavuga ko hari abantu benshi bayirwara ntibayimenye kubera ibimenyetso byayo, ahubwo bakayitiranya n’amarozi.

Aba baganga b’inzobere bavuga ko ari byiza ko abantu bayimenya kuko ari indwara yica vuba ariko kandi ikaba ikira neza iyo uyirwaye abimenye akajya kwa muganga.

Ibi byagarutsweho mu mpera z’icyumweru gishize ubwo u Rwanda rwifatanyaga n’isi mu kuzirikana ububi n’ubukana bw’iyi ndwara ihitana abantu kubera kutayimenya ngo bayivuze.

Inzobere z’abaganga zatangaje ko iyi ndwara yibasira cyane abagore batwite mu gihe cyo kubyara, abantu bamaze igihe kinini baryamye mu bitaro, yibasira kandi ababazwe nyuma yo gukora impanuka bakavunika amagufa manini, abicara amasaha menshi, abafite umubyibuho ukabije gusa ngo biranashokoka ko yafata umuntu wese ntacyo ishingiyeho.

Iyi ndwara ngo ni ikibumbe cy’amaraso kijya mu mutsi waba ujyana cyangwa uvana amaraso mu mutima kakawufunga ntiyongere gutembera ajya mu bihaha, akenshi kikaba gikunze gufata mu maguru ku muntu wabazwe, ku bagore bagiye kubyara cyangwa ababazwe mbere yo kubyara, akaguru kakabyimba cyane.

Iyo umuntu yamaze kurwara iyi ndwara, uretse kubyima amaguru, atangira no kunanirwa guhumeka neza, akababara cyane, umutima ugatera cyane kubera kugenda gake kw’amaraso biba byatewe n’uko umuyoboro ujyana amaraso mu bihaha uyavana mu mutima uba yafunze.

Prof. Emile Rwamasirabo uri mu bavura indwara yo kuvura kw’amaraso avuga ko indwara zitandura zirimo n’iyi yo kuvura kw’amaraso ziri kugenda ziyongera kubera guhindura imibereho.

Ati “Kera abantu ntabwo bayirwaraga kubera imibereho y’icyo gihe. Abantu bose bagendaga n’amaguru,waba ufite ubushobozi ukagenda ku igare bigatuma umubiri utagira ibindi bintu bitari ngombwa.”

Avuga ko indwara zo kuvura kw’amaraso zigenda ziba nyinshi gusa hakaba hari ikibazo cy’uko abantu batarayimenya.

Inzobere z’abaganga zagaragaje ko indwaya yo kuvura kw’amaraso ivurwa igakira

Abahamga benshi mu by’ubuvuzi bw’indwara zo kuvura kw’amaraso bavuga ko abantu batarayimenya bityo bikaba bituma bayitiranya n’amarozi kubera ibinyeyetso n’ubukana bwayo.

Asiimwe Christine wakize iyi ndwara akaza no gushinga umuryango w’abarwaye iyo ndwara nyuma yo kumenya ububi bwayo ndetse n’uko ivurwa igakira, avuga ko hari gukorwa ubukangurambaga bwo gusobanurira abanyarwanda iyi ndwara, kugira ngo bayimenye maze abazajya bagaragaraho ibimenyetso byayo bihutire kwa muganga hakiri kare.

Christine avuga ko umuntu umwe mu bantu bane afite ibyago byo kwicwa n’indwara yo kuvura kw’amaraso.

Umuyobozi Mukuru w’Ikigo cy’Igihugu cyita ku buzima (RBC), Prof Condo Jeannine, avuga ko iyo ndwara ishobora kwirindwa.

Yagize atiti “Abantu bagize siporo umuco, bakirinda kumara amasaha menshi bicaye, ugize ikibazo akareba umuganga byihuse, babasha kwirinda iyo ndwara kandi nta mafaranga bisaba. Tugiye gukomeza ubukangurambaga ngo abantu bamenye ibiyiranga kuko ivurwa igakira”.

Abaganga bavuga ko hari abataramenya iyi ndwara bayitiranya n’amarozi kubera ibimenyetso byayo birimo kubyimba zimwe mu ngingo z’umubiri


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...