AMAKURU

UKWEZI
cheno 2020

Hari ahakenewe udupfukamunwa cyane kurusha ahandi bakigowe no kutubona

Hari ahakenewe udupfukamunwa cyane kurusha ahandi bakigowe no kutubona
26-04-2020 saa 17:09' | By Chief Editor | Yasomwe n'abantu 863 | Ibitekerezo

Nyuma y’uko Minisiteri y’Ubuzima mu Rwanda itangaje ko gukoresha agapfukamunwa bigomba kuba itegeko ku munyarwanda wese, ndetse mu butumwa butangwa buri munsi uko hatangwa amakuru mashya ajyanye n’ubwandu bw’iki cyorezo ibi bikaba bikomeza gushimangirwa, hari ahantu henshi bigaragara ko dukenewe cyane ariko kutubona no kudukoresha bikaba bikiri imbogamizi ibangamiye amabwiriza yo kwirinda Coronavirus.

Ubwo yasobanuraga iby’agapfukamunwa ku kigo cy’igihugu cy’itangazamakuru RBA, Dr Daniel Ngamije, Minisitiri w’Ubuzima mu Rwanda yagize ati: “Ni icyemezo cyafashwe ko abantu bagomba kukambara bose, murabona ko nanjye naje nkambaye, twese tugomba kujya tukambara igihe turi mu ngo n’igihe dusohotse..."

Dr Ngamije yavuze ko udupfukamunwa tugabanya ibyago byo kwanduzanya kuko iyo ukambaye avuga amacandwe atamuva mu kanwa ngo abe yatarukira ku muntu bari kuvugana bityo akirinda akarinda n’uwo bari kumwe. Ati “Twese tukambaye rero ni imwe mu ngamba ikomeye izatuma dukomeza gukumira ikwirakwira ry’iki cyorezo, bikazadufasha mu minsi iri imbere ku zindi ngamba twafata”

N’ubwo ibyavuzwe na Minisitiri w’Ubuzima bushimangira ko ahateraniye abantu benshi ari hamwe mu hakenewe cyane udupfukamunwa kurusha ahandi, hari aho bigaragara ko ibi kubishyira mu bikorwa bikiri imbogamizi cyane. Ubwo ikinyamakuru Ukwezi cyageraga mu murenge wa Runda mu karere ka Kamonyi, mu kagari ka Gihara aharemye isoko kuwa Gatandatu tariki 25 Mata 2020, abariremye bari batwambaye bari mbarwa.

Muri uyu murenge kandi ahitwa Bishenyi naho haremye isoko kuri iki cyumweru, nabwo abaturage barirembye bari benshi ariko abambaye udupfukamunwa bari bacye cyane, kuburyo ureba n’amaso ushobora kumara umwanya munini ureba mu baremye isoko utarabona uwambaye agapfukamunwa.

Abaturage baremye aya masoko yombi batangarije ikinyamakuru Ukwezi ko nta bushobozi babona bwo kugura udupfukamunwa kuko ubuzima muri ibi bihe bubakomereye, no kubona ibyo kurya bikaba ari ihurizo rikomeye.

Umwe mu bo twaganiriye ni umugore wari waje guhaha i Gihara, uwo yagize ati: "Baravuga ngo agapfukamunwa ntigahenze ariko bakibagirwa ko nta na macye turimo kwinjiza, ubu maze iminsi nsaba ibyo kurya abaturanyi banjye ntabwo nasaba ibiryo ngo nsabe n’udupfukamunwa. Nkanjye se ko nacaga inshuro ubu nkaba ntabona aho nkora, ubwo nabona gute ayo ngura udupfukamunwa mpa abana banjye bose uko ari batanu? Leta izadufashe ituduhe ku buntu."

Hari umugabo twaganiriye kandi avuga ko asanzwe afashwa na Leta agahabwa ubwisungane mu kwivuza hamwe n’inzitiramubu imurinda malariya hamwe n’umuryango we, akaba n’ubundi ategereje ko azafashwa akagurirwa udupfukamunwa kuko na mbere hose Leta yamufashaga kwita ku buzima bwe izi neza ko we atishoboye.

Uwamahoro Prisca, Umuyobozi wungirije w’akarere ka Kamonyi ushinzwe imibereho myiza y’abaturage, yatangarije ikinyamakuru Ukwezi ko nta bufasha Leta yateganyije bwo kugurira abatishoboye udupfukamunwa. Avuga ko abatishoboye bari mu cyiciro cya mbere cy’ubudehe basanzwe bahabwa ubwisungane mu kwivuza na Leta bakanagenerwa inkunga y’ingoboka hamwe n’imirimo ihemberwa, bagakwiye kumva ko ibyo bafashwa bihagije ngo nabo baharanire kwishakiramo ibisubizo cyangwa ko inkunga bagenerwa yo itahagaze muri ibi bihe.

Avuga ko gahunda ihari ubu ari uko abaturage baguma mu rugo, uwiyemeje kujya mu isoko cyangwa ahandi akaba akwiye gushaka n’aho akura agapfukamunwa kuko katanahenze kuko ngo agahendutse gashobora kugera ku mafaranga y’u Rwanda 300


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...