AMAKURU

UKWEZI
Canal+ christmax

INKURU NZIZA : U Rwanda rwujuje Miliyoni y’abamaze gukingirwa COVID-19

INKURU NZIZA : U Rwanda rwujuje Miliyoni y’abamaze gukingirwa COVID-19
23-08-2021 saa 10:21' | By Martin | Yasomwe n'abantu 429 | Ibitekerezo

Imibare y’abamaze guhabwa urukingo rw’icyorezo cya COVID-19 mu Rwanda, yageze muri Miliyoni imwe. Inkuru nziza itanga icyizere yo kurandura icyorezo cya COVID-19 bizanaca inzira yo gutuma abaturarwanda basubira mu buzima busanzwe.

Imibare yatangajwe na Minisiteri y’Ubuzima kuri iki Cyumweru tariki 22 Kanama 2021, igaragaza ko kugeza ubu mu Rwanda hamaze gukingirwa abantu 1 048 640.

Uyu mubare ni uw’abamaze guhabwa nibura dose ya mbere mu gihe abamaze guhabwa doze zombi ari 424 768. Ejo ku cyumweru abahawe doze ya mbere bari 36 609.

Biteganyijwe ko iyi mibare ishobora kwiyongera cyane kuko kuri uyu wa Mbere tariki 23 Kanama 2021 hateganyijwe gutangira igikorwa cyo gukingira abujuje imyaka nibura 18 y’amavuko gitangirira mu Mujyi wa Kigali ariko kikazakomereza no mu bindi bice by’Igihugu.

Ishami ry’Umuryango w’Abibumbye ryita ku bana UNICEF ni umwe mu miryango mpuzamahanga yishimiye iyi ntambwe ishimije u Rwanda rwagezeho yo kuba rwujuje miliyoni imwe y’abamaze gukingirwa COVID-19.

Mu butumwa iri shami ryanyujije kuri Twitter, bugira buti “Turagushimira Rwanda kuba wujuje miliyoni imwe y’abaturage bamaze gukingirwa. Uburyo igihugu kitwara mu gukoresha inkingo haba mu buro bwo kuzibika no kuzigeza mu bice bitandukanye, buranoze.”

Ubuyobozi bw’uyu muryango Mpuzamahanga, bukomeza bugira buti “UNICEF-Rwanda izakomeza gushyigikira intego ya Guverinoma y’u Rwanda yo kuba nibura uyu mwaka wa 2021 uzarangira hamaze gukingirwa abaturage 30% ndetse na 60% mu mwaka utaha wa 2022.”

U Rwanda kandi rukomeje guhabwa inkunga y’inkingo za COVID-19 n’imiryango mpuzamahanga n’Ibihugu binyuranye birimo n’ibikomeye bya mbere ku Isi aho mu cyumweru gishize rwakiriye inkingo ibihumbi 700 zirimo ibihumbi 500 zatanzwe na Leta Zunze Ubumwe za America ndetse n’ibihumbi 200 zatanzwe n’u Bushinwa.

UKWEZI.RW


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA