konka coffee
KONKA

AMAKURU

UKWEZI

Iby’ingenzi wamenya kuri Kizito Mihigo wizihiriza isabukuru y’imyaka 37 muri gereza

Iby’ingenzi wamenya kuri Kizito Mihigo wizihiriza isabukuru y’imyaka 37 muri gereza
24-07-2018 saa 17:30' | By Chief Editor | Yasomwe n'abantu 14006 | Ibitekerezo 2

Kizito Mihigo ufungiye muri Gereza ya Nyarugenge iri i Mageragere, kuri uyu wa Gatatu tariki 25 Nyakanga 2018 arizihiriza muri gereza isabukuru y’imyaka 37 amaze avutse. Kizito Mihigo, ari mu Banyarwanda bavuzwe cyane mu myaka ishize, akaba yarabanje kuvugwa kubera ibikorwa byiza yamenyekanyeho ariko akaza no kuvugwa cyanekuva yatangira gukurikiranwaho ibyaha birimo no gucura umugambi wo kwica umukuru w’igihugu, ibyaha agikurikiranyweho kugeza n’ubu

Umuhanzi Kizito Mihigo yavutse kuwa Gatandatu, tariki ya 25 Nyakanga 1981, avukira i Kibeho, umwe mu mirenge y’akarere ka Nyaruguru, mu cyahoze ari perefegitura ya Gikongoro, ubu ni mu Ntara y’Amajyepfo y’u Rwanda.

Ni umwana wa gatatu mu muryango w’abana batandatu. Ababyeyi be Buguzi Augustin na Ilibagiza Placidie, bamureze mu bukristu gaturika. Ubwo yari afite imyaka 9 y’amavuko, Kizito Mihigo yatangiye guhimba uturirimbo tw’abana, maze nyuma y’imyaka itanu, aza kuvamo umuhanzi w’indirimbo za Kiriziya Gaturika wamamaye mu Rwanda. Mu mwaka w’1994, Se umubyara (Buguzi Augustin) yishwe muri Jenoside yakorewe abatutsi. Kizito Mihigo yagiye avuga kenshi ko Jenoside yakorewe abatutsi iri mu byamuhaye inganzo y’ubutumwa yaje kujya aririmba.

JPEG - 102.6 kb

Ku myaka 14, ubwo yigaga mu mwaka wa mbere wa Seminari Nto ya Karubanda i Butare, yahimbye indirimbo nyinshi ziririmbwa muri Kiliziya Gaturika mu Rwanda kugeza n’uyu munsi. Mu mwaka wa 2000, (ubwo yari afite imyaka 19), Kizito Mihigo yari afite indirimbo zirenga 200 za Misa.

Abifashijwemo n’ubuyobozi bukuru bw’igihugu, mu mwaka wa 2003 yagiye kwiga muzika i Burayi, maze mu kwezi kwa Nzeri 2008, aza kubona impamyabumenyi DFE « Diplôme de Fin d’Etudes», mu ishuri rya Conservatoire de Musique de Paris.

JPEG - 51.1 kb

Yigishije muzika mu ishuri ryisumbuye « Institut provincial » ryo mu Bubiligi, kuva mu mwaka wa 2008 kugeza muri 2010. Kuva yagera ku mugabane w’u Burayi, uyu muhanzi yatangiye guhimba n’izindi ndirimbo zitari iza Kiliziya, ahubwo zitanga ubutumwa bwubaka umuryango nyarwanda, bwunga kandi bubasaba kwihesha agaciro.

Umuhanzi Kizito Mihigo yashinze kandi Umuryango KMP (Fondation Kizito Mihigo pour la Paix / Kizito Mihigo for Peace Foundation) aha uyu muryango intego yo guharanira amahoro n’ubumuntu mu bantu hakoreshejwe impano n’ubugeni bya gihanzi.

JPEG - 190.7 kb

Mu mwaka wa 2011, Umuryango Imbuto Foundation wa Madamu Jeannette Kagame, wamuhaye igihembo nk’umunyarwanda ukiri muto wabashije gukora ibikorwa by’ubuhanzi byagize uruhare mu kwimakaza amahoro, ubumwe n’ubwiyunge.

JPEG - 101.6 kb

Paji y’ubuzima bwa Kizito Mihigo yaje guhinduka kandi bitungura benshi muri Mata 2014, ubwo byatangiraga kuvugwa ko uyu musore yaba yarafatanyije n’abarwanya Leta y’u Rwanda, mu gucura umugambi wo kwica bamwe mu bayobozi bakuru b’u Rwanda barimo na Perezida Paul Kagame. Icyaje kurushaho gutungurana, ni uko Kizito Mihigo yiyemereye ibi byaha.

Ubwo Kizito Mihigo yagezwaga bwa mbere imbere y’urukiko, yahise yemera ibyaha byose aregwa ndetse aboneraho no gusaba imbabazi umukuru w’igihugu. Icyo gihe yagize ati: “Nsabye imbabazi. Nzi ko igihugu cyacu kiyoborwa n’abantu bafite umutima ntabwo kiyoborwa n’ibikoko, bababariye kugeza no kubishe abandi muri Jenoside. Nongera gusaba imbabazi mpereye ku buyobozi bw’igihugu, Perezida wa Repubulika musaba imbabazi mubwira ko nta kibi mwifuriza. Mbizeza ko nkiri wa wundi n’ubwo icyaha cyaje kikankubita hasi, nimbona imbabazi, nzereka Abanyarwanda imigambi yanjye no kurushaho gushimangira ibyiza nakoze mbere.”

JPEG - 33.6 kb

Kizito yiyemereye ibyaha ataruhanyije anasaba ko yahabwa imbabazi n’umukuru w’igihugu agasubira mu muryango nyarwanda kwerekana ko yahindutse

Ubwo yasabirwaga gufungwa burundu, Kizito Mihigo yongeye kugaragaza ko agisaba imbabazi Perezida wa Repubulika n’umufasha we ku magambo mabi yabavuzeho, asaba imbabazi abacitse ku icumu rya Jenoside bose, ndetse anisegura ku buyobozi bw’igihugu n’Abanyarwanda muri rusange, aho yasabaga ko yahabwa amahirwe agasubira mu muryango nyarwanda gukosora amakosa yakoze.

JPEG - 145.3 kb

Kuwa Gatanu tariki 27 Gashyantare 2015, nibwo urubanza ubushinjacyaha bwaregagamo Kizito Mihigo na bagenzi be rwasomwe, abo bakaba ari Agnes Niyibizi, Ntamuhanga Cassien na Dukuzumuremyi Jean Paul, bakaba bose bari bakurikiranweho ibyaha by’ubugambanyi bwo kugirira nabi ubutegetsi buriho cyangwa umukuru w’igihugu, gucura umugambi w’ibikorwa by’iterabwoba no gufasha kurema umutwe w’abagizi ba nabi. Nyuma yo guhamwa na bimwe muri ibi byaha Kizito Mihigo akaba yarahise akatirwa igifungo cy’imyaka 10. Gusa yahise ajurira, kugeza ubu agikomeje kugaragaza ibyatuma agabanyirizwa igihano cyangwa akaba umwere imbere y’urukiko rw’ikirenga aburanishwa kuri ibi byaha, gusa igihe azongera kuburanira cyo ntabwo kiramenyekanga.

Kuwa Mbere tariki ya 14 Gicurasi 2018, nibwo Kizito Mihigo yageze bwa mbere imbere y’urukiko rw’Ikirenga aburana mu bujurire ariko icyo gihe umucamanza yagaragaje imbogamizi zo kuba Dukuzumuremyi Jean Paul bareganwa adafite umwunganizi kandi mu rukiko itegeko riteganya ko adashobora kubura atunganiwe, ndetse no kuba Ntamuhanga nawe wajuriye yaratorotse ubutabera.

Kizito Mihigo yasabye ko dosiye ye yatandukanywa n’iy’aba bantu kuko nta sano rinini bafitanye mu byaha bakoze ndetse we ko anaburana yemera ibyaha abandi bo bakaba babihakana. Urukiko rwahise rwafashe icyemezo cyo kwimurira urubanza ku wa 11 Kamena 2018 kugira ngo Dukuzumuremyi ashakirwe umwunganizi mu mategeko ariko ibyo gutandukanya imanza byo biterwa utwatsi.

Kuwa Mbere tariki 11 Kamena 2018 urubanza rwarasubukuwe, ariko urubanza ntirwabaye ndetse n’igihe ruzasubukurirwa ntikizwi ku mpamvu z’uko we n’abandi baburanyi bari baje mu rukiko bamenyeshejwe ko hari itangazo risubika imanza zabo hashingiwe ku mavugurura aherutse kubaho mu bucamanza.

Ubwanditsi bw’Urukiko rw’Ikirenga butangaza ko nyuma y’amavugurura y’inkiko uru rubanza kimwe n’izindi manza zari mu rw’Ikirenga ubu zitakiri mu bubasha bwarwo kuko haherutse gusohoka itegeko rishyiraho urukiko rw’ubujurire.

Uru ni urukiko ruherutse gushyirwaho n’Itegeko Ngenga ryo muri Mata (ryasohotse mu igazeti mu mpera za Gicurasi 2018) , rukazajya ruburanisha imanza z’ubujurire aho kugira ngo zigere mu rw’Ikirenga.

Kizito Mihigo wizihiza isabukuru y’imyaka 37 kuri uyu wa Gatatu tariki 25 Nyakanga 2017, byari biteganyijwe ko iyo atajurira, yari kuzarangiza igihano cye muri 2024, ni ukuvuga igihe azaba afite imyaka isaga 43 y’amavuko. Gusa ibi byaba mu gihe nta nsimburagifungo, insubikagifungo cyangwa imbabazi yaba yahawe. Yabanje gufungirwa muri Gereza ya Kigali izwi nka 1930 ariko hamwe na bagenzi be aza kwimurirwa muri gereza ya Mageragere.


INKURU ZA :
Tanga Igitekerezo
Ibitekerezo 2
sofiya Kuya 26-07-2018

Ese nimumbwire uwo muhungu we ko naherutse asaba imbabazi, yazihabwa yazimwa bimeze bite?
haaaa ntibyoroshye imbabazi z’iki gihe..

sofiya Kuya 26-07-2018

Ese nimumbwire uwo muhungu we ko naherutse asaba imbabazi, yazihabwa yazimwa bimeze bite?
haaaa ntibyoroshye imbabazi z’iki gihe..

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...