konka coffee
KONKA

AMAKURU

UKWEZI

Kizito Mihigo yafunzwe amaze kubona umukunzi, ngo wenda aba yararongoye baranabyaye

Kizito Mihigo yafunzwe amaze kubona umukunzi, ngo wenda aba yararongoye baranabyaye
21-09-2018 saa 17:14' | By Chief Editor | Yasomwe n'abantu 11061 | Ibitekerezo

Umuhanzi Kizito Mihigo umaze iminsi micye afunguwe ku bw’imbabazi za Perezida Paul Kagame, yatangaje ko yafunzwe mu mwaka wa 2014 amaze kubona umukunzi yabonaga ko yamubera umugore, akanashimangira ko iyo adafungwa wenda ubu aba yararongoye ndetse wenda bakaba baranamaze kubyara, gusa ngo n’ubundi gushaka umugore ni kimwe mu byo atekerezaho cyane ko azakora mu gihe cya vuba

Kuri uyu wa Kane tariki 20 Nzeri 2018, nibwo Kizito Mihigo yatangarije Ijwi ry’Amerika mu kiganiro Murisanga, byinshi ku buzima yabayemo muri gereza ndetse n’imigambi ye nyuma yo gufungurwa ku bw’imbabazi za Perezida Kagame. Mu byo yagarutseho, uyu muhanzi yavuze ko yafunzwe amaze kubona umukunzi bendaga kurushinga bityo akaba ashaka gusubukura uwo mugambi we.

Kizito Mihigo ati: "Murabona ndi umusore ufite imyaka 37, nafunzwe mfite imyaka 33, ubu wenda wasanga iyo ntafungwa mba nararongoye mfite n’abana. Ariko birumvikana nyine narakererewe, icyo nzagerageza rero kugirango nsiganwe n’uko gukererwa, ni ukugenda ngerageza kubana n’abantu neza wenda Imana vuba aha izamfasha mpure n’umuntu wa ngombwa ndebe ko nanjye nashinga urugo. Cyane cyane iyo bavuze gukererwa ku buzima bwite bwanjye ni icyo ntekereza kuko nari ntangiye kubitekereza igihe nafungwaga"

Kizito Mihigo akomeza agira ati: "Ubundi mfungwa, abanyamakuru bakundaga bati ariko Kizito ko utatwereka umukunzi wawe? Kandi koko ntawe nari nakabona, nari ngishakisha, mu by’ukuri njye nagize igihe gikomeye cyane mvuye i Burayi, muzi ko nize mu Burayi nkanahakora igihe gito, noneho nkaza gutaha mu Rwanda. Ntashye mu Rwanda rero nagize success (ibihe byiza byo gutera imbere) mu gihe gito, noneho ngira abantu bavuga ko bankunda benshi, kuburyo byarangoye guhita mfata icyemezo cyo kumenya umuntu unkunda by’ukuri cyangwa nanjye uwo nahitamo kugirango tubane, noneho nkajya nirirwa mbwira abanyamakuru nti ntabwo araboneka... ariko nza kumva nanjye numva birarambiranye"

Kizito Mihigo wafunzwe muri 2014, ngo icyo gihe nibwo yari amaze kubona umukunzi yabonaga ko bashobora kubana ndetse yari yatangiye kubibwira abanyamakuru ariko aza gufungwa bimera nk’aho inzozi yari afite icyo gihe zicitsemo kabiri.

Kizito ati: "Noneho muri Mata 2014, nari maze guhura n’umuntu numva rwose nishimiye kuburyo n’abanyamakuru bamwe ba hano mu Rwanda nari namaze kubibabwira nti uwo muntu arahari ariko sindageza igihe cyo kumubabwira kuko sindabivugana na we, noneho mu gihe nkiri muri ibyo mba ndafunzwe. Ibyo rero ni nk’inzozi zaciwemo kabiri kuburyo muri iyi minsi numva... Kandi noneho nageze muri gereza nsanga burya ni ikintu umuntu agomba gutekerezaho, kuko umuntu ashobora gufungwa burundu, ugafungwa burundu mwana usize, nta mugore; mbese ibyo mu Kinyarwanda bita guhambanwa ikara, ugasanga rwose ugiye ntacyo usize, nta n’umuntu usize ugukomokaho, njye rwose nasanze ari ibintu byababa bibabaje. Ugasanga umuntu afunzwe imyaka 20, akazavamo ari umusaza yarataye icyo gihe cyose."

Kizito ariko ashimangira ko ibyo guhitamo uwo muzarushinga bigorana cyane iyo uri umuhanzi w’icyamamare kubera umubare munini w’ababa bakubwira ko bagukunda kandi bitoroshye kumenya ukuri kubarimo.

Aha yagize ati: "Umurimo wacu ugushyira imbere y’abantu benshi, urakumurika cyane kuburyo n’abantu bahora badukurura buri umwe akurura yishyira baba benshi cyane, kuburyo kubicunga biragora... Hari ibyo abantu bashobora kugukoresha utabiteganyije, ibyo rero birinjira bikagera no muri uwo mushinga wo guhitamo uwo muzashakana, ugasanga wenda bitwaye igihe kurusha abandi kuko usanga abantu bose bakubwira ko bagukunda ariko ukibaza niba ari byo koko, niba ari ukugukunda cyangwa ari ukugufana, cyangwa niba ari no kugushakamo inyungu nabyo bibaho..."

UMVA HANO IBINTU BYOSE KIZITO MIHIGO YATANGAJE:


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...