Kuva mu mpera z’icyumweru gishize umubare w’abandura covid-19 uri kwiyongera mu buryo buri hejuru ugereranyije n’uko biyongeraga mbere yaho.
Byatumye umubare w’abamaze kugaragaraho icyo cyorezo mu Rwanda ugera ku bantu 207, muri bo 93 bakaba bamaze gukira harimo umwe wakize uyu munsi.
Itangazo rya Minisiteri y’Ubuzima riravuga ko abarimo kuvurwa ari 114, iki cyorezo kugeza kuri uyu wa mbere kikaba ntawe kirahitana.
MINISANTE iravuga ko imibare mishya y’abandura ifitanye isano n’ubwiyongere bw’imibare y’abanduye COVID-19 mu batwara amakamyo yambukiranya imipaka n’abo bakorana.
Abarwayi bose ngo barimo kuvurirwa ahantu habugenewe kandi barimo baroroherwa, nk’uko iri tangazo rya Minisiteri y’Ubuzima ribivuga.
Muri Afurika y’Iburasirazuba
Kenya : Abanduye ni 363 abapfuye ni 14 abakize ni 114
Tanzania : Abanduye ni 299 abapfuye ni 10 abakize ni 48
DR Congo : Abanduye ni 207 abapfuye ni 8 abakize ni 19
Rwanda : Abanduye ni 207 abapfuye ni 0 abakize ni 93
Uganda : Abanduye ni 79 abapfuye ni0 abakize ni 32
Burundi : Abanduye ni 11 abapfuye ni 1 abakize 4
Sudan : Abanduye ni 6 abapfuye ni 0 abakize ni 0.