AMAKURU

UKWEZI

Umuyobozi wa Skol ku isi yashimye imiyoborere y’u Rwanda yiyemeza kuzarwitura ibyo rwamukoreye

Umuyobozi wa Skol ku isi yashimye imiyoborere y’u Rwanda yiyemeza kuzarwitura ibyo rwamukoreye
15-04-2018 saa 09:17' | By Chief Editor | Yasomwe n'abantu 5518 | Ibitekerezo 2

Thibault Relecom, umuyobozi uyobora uruganda rwa Skol ku isi yose, yashimye imiyoborere myiza y’u Rwanda ishyira imbere imibereho myiza y’abaturage, aniyemeza ko azakora ibishoboka byose akitura igihugu n’abagituye ibyiza yakorewe n’ubuyobozi bw’u Rwanda. Ibi yabitangaje anagaragaza ku mugaragaro inkunga yageneye abatishoboye ihamije kuzamura imibereho yabo.

Kuri uyu wa Gatandatu tariki 14 Mata 2018, ubuyobozi bukuru bw’uruganda rwa Skol bwagaragaje inkunga bwatangiye gutera imiryango itishoboye yo mu murenge wa Nyamirambo mu karere ka Nyarugenge mu mujyi wa Kigali, bufatanyije n’umuryango mpuzamahanga utegamiye kuri Leta witwa FXB (François-Xavier Bagnoud) usanzwe ufite imishinga igamije gutera inkunga no gufasha abaturage kwikura mu bukene.

Aba ni bamwe mu babyeyi bafashwa na FXB ibitewemo inkunga na Skol

Muri ibi birori, umushyitsi mukuru yari Thibault Relecom uyobora uruganda rwa Skol ku isi yose, uyu akaba yari yavuye mu Bubiligi aje muri iki gikorwa cyo gufasha abatishoboye. Thibault Relecom, ayobora ikompanyi y’umuryango we yitwa UNIBRA, afatanyije na nyina Maïté Relecom, iyi kompanyi ikaba yarashinzwe na Se wa Thibault witwaga Michel Relecom, hari mu myaka y’1960. Iyi kompanyi niyo ifite inganda zikora ikinyobwa cya Skol hirya no hino ku isi ariko cyane cyane muri Afurika, ikanagira ibindi bikorwa birimo iby’ubucuruzi bw’amazu n’ibindi bijyanye n’ubwubatsi.

Ubwo Thibault Relecom yagezaga ijambo ku baturage n’abafatanyabikorwa ba FXB bitabiriye umuhango wo gushyikiriza inkunga abatishoboye, yavuze ko yashinze uruganda rwa Skol mu Rwanda akishimira uburyo yakiriwe n’ubuyobozi, ndetse akanashima muri rusange imiyoborere u Rwanda rufite ituma amahanga yose arutangarira. Yavuze ko u Rwanda rwamukoreye ibyiza bityo nawe atazahwema kurwitura afatanya n’ubuyobozi mu bikorwa bizamura imibereho y’abaturage.

Thibault yasuye aba baturage mu duce batuyemo mu bice bigaragara nk’icyaro mu kagari ka Rugarama muri Nyamirambo

Habyarimana Emmanuel uyobora FXB mu Rwanda, yashimye cyane ubufasha bwa Skol

Umuryango FXB, guhera muri 2017, ku nkunga ya Skol watangiye ibikorwa byo gufasha abantu 415 bo mu murenge wa Nyamirambo, bakaba bagomba guhabwa ubufasha mu gihe cy’imyaka 3 bukazabafasha kubaho neza no kwikura mu bukene. Muri abo bafashwa, harimo abana 146 biga mu mashuri abanza, abana 45 biga mu mashuri yisumbuye n’abandi biga mu mashuri y’imyuga n’ubumenyi ngiro, bafashwa kubona amafaranga y’ishuri, ibikoresho n’ibindi bibafasha kwiga neza. Mu gikorwa cyabaye kuri uyu wa Gatandatu, abana batsinze neza banahawe ibihembo by’umwihariko.

q

Iyi miryango yose, yashyikirijwe inkunga y’amafaranga azabafasha gukora imishinga ibyara inyungu, ikazabafasha kwikura mu bukene. Kugirango iyo nkunga batazayikoresha bikenura, FXB ibitewemo inkunga na Skol, bagenera buri muryango amafaranga 14.500 buri kwezi abafasha kunoza ifunguro ryabo, ibi bakazabikorerwa mu mezi 9 mu gihe bazaba bakirwana no kubyaza umusaruro imishinga batewemo inkunga.

Abanyeshuri batsinze neza bagenewe ibihembo

Aba bantu bose uko ari 415 kandi, muri Kamena uyu mwaka bazahabwa ubwisungane mu kwivuza, hanyuma mu mwaka uzakurikiraho bazagenerwa 75% bitangire 25% kuko bakangurirwa kubyaza umusaruro imishinga yabo bakikura mu bukene, hanyuma mu mwaka wa gatatu bwo bazitangira 50% kugeza ubwo bazava mu bukene bakazabasha noneho kujya bitangira ubwisangane mu kwivuza.

Mu bufasha bahabwa kandi butuma barushaho kugira ubuzima bwiza, harimo kuba barahawe ibikoresho by’isuku, Skol na FXB bikaba biteganya no kubafasha kwipimisha agakoko gatera SIDA bakamenya uko bahagaze ndetse ababana batarasezeranye byemewe n’amategeko barategurirwa ibirori by’ubukwe bose bakazasezerana bashyigikiwe na Skol na FXB.

Thibault Relecom na Tite Gatabazi, umwe mu bayobozi bakuru ba Skol mu Rwanda

Inkunga uruganda rwa Skol rwageneye FXB muri ibi bikorwa bigamije gukura abaturage bayishoboye mu bukene, ingana n’amayeru 185.000 azatangwa mu myaka itatu, ni ukuvuga ko uyashyize mu mafaranga y’u Rwanda yakabakaba miliyoni 200.


INKURU ZA :
Tanga Igitekerezo
Ibitekerezo 2
Jean Cousin Kuya 17-04-2018

Iyi nkunga yo rwose niyo ikwiye, uretse kuba uyu mugabo afite inyungu mu bikorwa akorera mu Rwanda biranagaragara ko afite umutima wa kimuntu n’ubushake bwo gukemura ibibazo mu buryo bukwiye. Imana imuhe umugisha

Alice Uwimana Kuya 15-04-2018

Mwiriwe inkuru mwanduhaye yo gufasha irashimishije . Nkabanyamakuru muzatubarize amadeni yaba rokore impavu bandakora nkibi . Ahubwo bakarata amamodoka aheze na mazu babamwo. Ahubwo leta yarikwiye gukuraho icacumi , ntibakora ariko babayeho neza abobabwiriza bashoje. Ikindi ifashano bakura haze bitwaje abayoboke bafite ntabwo zibageraho . Mukomere

English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...