AMAKURU

UKWEZI

‘Ndongora nitunge’, iturufu ku bagabo b’i Rubavu bigize ba ntibindeba

‘Ndongora nitunge’, iturufu ku bagabo b’i Rubavu bigize ba ntibindeba
22-11-2018 saa 22:01' | By Vincent Nsengiyumva | Yasomwe n'abantu 4792 | Ibitekerezo 5

Agahugu umuco akandi umuco! Ibi ni ukuri kuko abenegihugu badakomeye ku muco wabo bamera nk’abubaka ku musenyi, ibyabo ntibiramba. Baribagirana, bagasigara bavugwa mu bitabo by’amateka.

Umuco Nyarwanda ufata umugabo nk’imyugariro y’urugo, inkingi yarwo ya mwamba, urubirira icyuya ngo rubeho.

Umunyarwanda yaramurebye amwita umutware kuko ayobora umuryango mu cyerekezo kizima.

Nubwo umugabo atwara urugo, ibumoso bwe haba umubera umutima ariwe mugore we.

Ni igihamya kigaragaza ko rwa rugo rugereranywa n’ijuru rito rushyirwaho itafari n’amaboko yose.

Utatiriye iki gihango cyangwa isezerano ku bageze kwa pasiteri na padiri afatwa nk’udashobotse mu maso ya benshi.

Hari uwaciye umugani ko aho kwicara hamwe wagenda udafite icyerekezo kuko ushobora kugera mu nzira ugahirwa.

Ibi siko bimeze muri Rubavu! Mu bice bimwe na bimwe byo muri aka karere, usanga abagore biharira inshingano zo gutunga ingo, abagabo bakirirwa bicaye, binywera inzoga, bakina igisoro n’ibindi.

Umurenge wa Nyamyumba urihariye kuko abagabo baho bashinjwa kwigira ba ntibindeba ku nshingano z’urugo, bakimika umuco wo kurera amaboko. Ni imyumvire bivugwa ko ishingiye ku gufata umugore nk’ugomba gutunga urugo mu cyiswe ‘‘Ndongora nitunge! ”

Abatuye muri Nyamyumba baganiriye n’ikinyamakuru Ukwezi bahuriza ku kuba “Ndongora nitunge” ituma abagabo bihunza umurimo wo kubaka urugo.

Umubyeyi witwa Murorunkwere Marie Chantal utuye mu Kagari ka Kiraga mu Murenge wa Nyamyumba avuga ko “Ndongora nitunge” yaturutse ku bagabo birirwa bicaye bagategereza ko abagore bava gupagasa bagatunga umuryango.

Yagize ati “Umugabo ashobora kubyukira mu kabari, umugore akazindukira mu kiraka, akaza agahahira urugo, umugabo yiriwe yinywera ahubwo agataha abaza ibyo kurya atabivunikiye.”

Yunzemo ati “Umugabo asigaye yitwa umugabo ku izina gusa ntacyo amaze mu rugo, ari uwo kurya gusa. ”

Zaninka Marceline yavuze ko abagabo b’i Nyamyumba biyumva nk’ibitangaza, ko imirimo yose ikwiye guharirwa umugore.

Ati “Abagabo biyumva ko ari abantu bakomeye bigatuma bumva ntacyo bagomba gukora, bigize ba mafiyeri, amaboko bayahoza mu mifuka bumva ko akazi kabo ari ukwinywera inzoga gusa. ”

Uwitwa Mutabazi Innocent na we ahamya ko abasore n’abagabo bigize abasongarere.

Ati “Abagabo ba hano akazi kabo ni ukwirirwa banywa, bakina ibisoro, mbese usanga basa n’aho inshingano zo guhahira urugo zitabareba. ”

Ubuyobozi bwatangiye ubukangurambaga bugamije kwereka abagabo ko bidakwiye ko bicara barangamiye kurya ku iposho y’umugore aho guhaguruka bagakora.

Umunyamabanga Nshingwabikorwa w’Umurenge wa Nyamyumba, Ugirirabino Elizafan, yagize ati “Iyo bigaragaye ko umugore ariwe utunze urugo ntibyumvikana neza mu muco nyarwanda. Byumvikana neza iyo umugabo aca aha, umugore agaca aha bose bakaza guhuriza hamwe berekana icyo bagezeho, bigaragaza ko harimo ubufatanye. Abagabo twababwiye ko kwirirwa bicaye bategereje ko abagore bataha bakabagaburira atari umuco nyarwanda. Umuco nyarwanda uduhamagarira gukora. Twashyizeho n’amatsinda y’abagabo bahwitura bagenzi babo batarumva gahunda yo kwigira.”

“Ndongora nitunge” ni imvugo ikoreshwa mu kugaragaza abagore bahatira abagabo kubarongora babemerera ko bazatunga urugo. Umuzi wayo bivugwa ko ushinze muri Repubulika Iharanira Demokarasi ya Congo, agace gahana imbibi n’uyu murenge. Abagabo baho birirwa bicaye, abagore bakajya gushakisha ibitunga urugo.

Umuyobozi w’Ishami ry’Imiyoborere Myiza mu Karere ka Rubavu, Gahonde Gilbert, yagarutse ku ngamba zafashwe mu gukuraho “Ndongora nitunge.”

Ati “ Uriya muco navuga ko ari mubi urahari, uterwa na wa muco abantu bavana muri Congo. Burya Abanyekongo, abagore nibo bakora, abagabo bakirirwa banywa, babuguza n’ibindi. Uwo muco rero kubera abaturage ba Nyamyumba akenshi bakura ubuzima muri Congo, barawuzana noneho bigatuma abagabo babo badakora, abagore akaba aribo batunga urugo. ”

Yavuze ko ubuyobozi bw’akarere bwashyize imbaraga mu kumvisha abagabo ko bagomba kwigira, bakavana amaboko mu mifuka.

Ikibazo cy’abagabo badakora giteza ingaruka zikomeye ku muryango nk’ubuharike, urugomo, gutera abana b’abakobwa inda zitateganyijwe n’ibindi bidindiza iterambere ry’umuturage n’igihugu muri rusange.

Umunyamabanga Nshingwabikorwa w’Umurenge wa Nyamyumba, Ugirirabino Elizafan


INKURU ZA :
Tanga Igitekerezo
Ibitekerezo 5
akumiro Kuya 26-11-2018

Ubwo ariko nizere ko bahinduranya amazina umugore akitwa umugabo, umugabo akitwa umugore! Ubwo se urumva uba yararongoye undi ari nde? n’i Cyangugu ibi bintu birahavugwa cyane. Abakobwa birirwa bakoboka bakorera amafaranga yo kuzaha abasore ngo babarongore akenshi bayakacira bakaryumaho bakabihorera, ugasanga abakobwa biyahura mu kivu kubera ishavu n’igihombo ndetse n’ababyeyi baba barabimufashijemo akabona kwongera guhera kuri 0 atabishyikira

Anastase Kuya 23-11-2018

Ibi sibyiza habe nagato.

Anastase Kuya 23-11-2018

Ibi sibyiza habe nagato.

Feza Kuya 23-11-2018

Ashyireho contact ze nzamuhamagara

Ndingora Kuya 22-11-2018

Ni akaga ni akumiro. Kubona umugabo mbwa nkuwo. Kandi Ubwo kubera kwirirwa barera amaboko barongora kubi nk’ibimata! Nyakugorwa rero akemera agahebera urwaje ngo ari ku Mugabo. Ibi sibyiza ndabineguye

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...