AMAKURU

UKWEZI

Rubavu: Uwanze guhekera umuturanyi warwaje umuntu ahanishwa gucibwa inzoga

Rubavu:  Uwanze guhekera umuturanyi warwaje umuntu ahanishwa gucibwa inzoga
21-11-2018 saa 09:31' | By Vincent Nsengiyumva | Yasomwe n'abantu 2248 | Ibitekerezo

Umuco wo gutabarana ufite umuzi kera kuva ku ngoma z’abami. Uwabaga atunguwe yatabarwaga n’abaturanyi bakamuha ubufasha bwo kumuhekera.

Mu myaka yo hambere, ingobyi yafatwaga nk’intwaro y’ubutabazi ku barwayi barembeye mu rugo bakeneye kugezwa kwa muganga.

Uyu muco hari aho wasigaye na nubu aho usanga mu bice by’icyaro abarwayi bagihekwa mu ngobyi kuko batagerwaho n’imbangukiragutabara.

Urugero rwa hafi ni mu Murenge wa Busasamana mu Karere ka Rubavu aho uyu muco ukomeje kwimakazwa.

Abaturage bo muri aka gace mu kubumbatira umuco wo gutabarana barakeburana mu gihe hari bagenzi babo banze guhekera ukeneye kugeza umurwayi kwa muganga.

Aba batsimbaraye ku ndangagaciro zisigasira umuco nko gufashanya, gusabana no gutabarana.

Abo mu Murenge wa Busasamana babwiye Ukwezi.com ko gufashanya babigize intego n’uwarwaje umuntu atari hafi y’imbangukiragutabara bitabaza abaturanyi bakamuhekera bakoresheje ingobyi gakondo.

Nta byera ngo de! Hari bamwe mu bagabo bigize ba ntibindeba bitabazwa ngo bahekere abaturanyi bakabatera utwatsi.

Sindikubwabo Augustin utuye mu Kagari ka Makoro mu Murenge wa Busasamana yavuze ko mu gufashanya hari abagenda biguru ntege mu gihe bitabajwe.

Yagize ati “ Ubu nk’iwacu dufite ingobyi gakondo y’abarwayi, iyo umuntu arwaye nijoro imbangukiragutabara itari hafi, duhita tumuheka kuko ari nk’ishyirahamwe mu mudugudu. Uwitabajwe akanga guheka kandi afite ubushobozi n’imbaraga zo kubikora, turamuhana tukamuca ijerekani y’ikigage cyangwa abiri kugira ngo n’abandi barebereho.”

Uwitwa Nzayisenga François wo mu Mudugudu wa Kidadi mu Kagari ka Makoro na we yavuze ko abigira ba ntibindeba ntibafatanye n’abandi bahanirwa muri rusange.

Ati “ Umuco wo gutabarana twe turacyawukomeyeho. Iyo hari utabajwe akananirwa gutabara, bashyiraho umwanya wo kumuhanira mu ruhame, bakamuca amafaranga ibihumbi bitanu cyangwa amajerekani abiri y’inzoga cyangwa ikigage abantu bakakinywa.”

Umunyamabanga Nshingwabikorwa w’Akagari ka Kageshi, Gacamena Jean Nepo, ashimangira ko umuco wo gufashanya no gutabarana ukomeye cyane muri Busasamana, n’ubwo hakiri abigira ibigande ntibatabare bagenzi babo aho rukomeye.

Yagize ati “Umuco wo gufashanya no gutabarana uhagaze neza mu murenge wacu. Buri kagari gafite ingobyi gakondo ebyiri zo guhekamo abagize ikibazo. Mu mudugudu kandi dufitemo kavuzampanda utabariza uwagize ikibazo abantu bakabimenya bakamutabara bwangu, bakamuheka bakamugeza kwa muganga. Utabajwe ntahagere ngo afashe abandi guheka, acibwa ijerekani rimwe cyangwa abiri y’ikigage cyangwa urwagwa.”

Gacamena avuga ko gusigasira umuco nyarwanda bimaze kubageza kuri byinshi mu murenge wabo, ngo kuko bibafasha mu bikorwa biteza imbere umuryango nyarwanda n’igihugu muri rusange.

Kuva mu myaka yo hambere wasangaga Abanyarwanda barangwa n’umuco wo gufashanya, gutabarana, gusabana, kubana n’ibindi bigaragaza ubumwe butajegajega, byabafashije kubaka imibanire hagati yabo.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...