konka coffee
KONKA

AMAKURU

UKWEZI

Abakekwaho ubutekamutwe bwo kwambura abantu bakoresheje Facebook na Instagram bafashwe

Abakekwaho ubutekamutwe bwo kwambura abantu bakoresheje Facebook na Instagram bafashwe
6-08-2018 saa 12:54' | By Vincent Nsengiyumva | Yasomwe n'abantu 3463 | Ibitekerezo 2

Urwego rw’igihugu rw’Ubugenzacyaha RIB(Rwanda Investigation Bureau) rwerekanye bamwe mu batekamutwe bakekwaho kwambura abantu utwabo bakoresheje imbuga nkoranyambaga nka Facebook na Instagram.

Abatawe muri yombi ni umusore witwa Usanase Muhamed w’imyaka 21 n’umugabo witwa Mwana Abdullahakim bakaba beretswe itangazamakuru kuri uyu wa Mbere tariki ya 6 Kanama 2018.

Usanase Muhamed mu kiganiro yahaye itangazamakuru yiyemereye ko yambuye abantu benshi biganjemo abahanzi bo mu Rwanda, aho ngo yinjira mu ma konte yabo ku mbuga nkoranyambaga nka Facebook na Instagram maze akabatekera umutwe bakamuha amafaranga.

Yavuze ko mubo yinjiriye (guhakinga) harimo Ama G The Black, Bruce Melody, Jay Polly, Urban Boyz, Arthur Rutura w’umunyakakuru kuri Kiss FM, Luckman nawe w’umunyamakuru kuri Televiziyo Rwanda n’abandi batandukanye.

Avuga ko aba bose yagiye abarya amafaranga mu buryo bunyuranye nk’aho yamaraga kwinjira muri konti y’umuntu maze akamusaba ko amwishyura kugira ngo ayimusubize.

Avuga ko yabonye numero za telephoni zo mu bwongereza atangira kuzikoresha yarigize Umwongereza ari naho yigaruriraga benshi ababeshya kuzabashakira Visa maze akanabajyana mu biraka birimo ibitaramo mu Bwongereza.

Yagize ati “Hari umuntu nari narinjiriye wo mu Bwongereza nganira nawe ariko ntabwo yari azi ko arinjye. Namusabye nimero yo mu Bwongereza nzajya nkoresha kuri WhatsApp arayimpa, ubwo niyo nakoreshaga ntekera umutwe abantu.”

Yanavuze ko hari abo yamaraga gushimuta konti zabo maze akabahamagara abasaba amafaranga kugira ngo azibasubize.

Yagize ati “Murabyumva cyane abahanzi bavuga ko babinjiriye mu ma konti ya za Facebook na Instagram. Hari igihe Ama G yigeze gutangaza kuri Instagrama ye ko hari umuhanzi bafitanye ikibazo mu Rwanda. Icyo gihe ninjiye muri Instagram ye nyigira iyanjye maze mfata ifoto ya Nizzo [wo muri Urban Boyz] nyishyira ku rukuta rw’iyo Instagram ya Ama G nari nashimuse hanyuma nandikaho ngo wa muhanzi wantwaye amafaranga ni uyu nguyu. Icyo gihe hari uwamubwiye [Ama G ] ko bamwinjiriye muri Konti maze arampamagara musaba ko kugira ngo nyimusubize agomba kunyoherereza ibihumbi 200.Icyo gihe yayampaye mu byiciro bibiri njya namusubiza konti ye.”

Yavuze ko iyo abonye passport y’umuntu cyangwa irangamuntu ye bihita bimworohera kwinjira muro konti ye ya Facebook cyangwa ya Instagram.

Usanase akomeza uvuga ko amaze imyaka igera kuri ibiri akora ubu bwambuzi bukorerwa ku ikoranabuhanga. Avuga ko byibura amaze kwambura abantu amafaranga agera kuri miliyoni 3.

Uwitwa Mwana Abdullahakim nawe ufunganwe na Usanase, akurikiranweho ubufatanyacyaha. Uyu mugabo yohererejwe amadorali 1000 na Usanase, yari amaze kwambura umunyamahanga amutekeye umutwe binyuze kuri Facebook.

Mwana Abdullahakim utuye mu Karere ka Ngoma, uvuga ko ariwe wareraga Usanase kuva mu buto bwe, ariko ubwo yageraga mumwaka wa gatanu w’amashuli yisumbuye ngo yaje kuva mu ishuri ngo kuko yari amaze gutangira ubutekamutwe bw’ikoranabuhanga. Kuva icyo gihe ngo babaye nk’ababurana kuko Usanase yahise ajya kwibana, ngo bongeye kuvugana ubwo yamubwiraga ko hari amafaranga agiye kunyuza kuri konti ye anamuha nimero z’undi muntu ahita aoherereza.

Mwana Abdullahakim we ashinjwa ubufatanyacyaha kuko bamunyujijeho amafaranga bambuye umunyamahanga

Yemera ko ayo mafaranga yayohererejwe , ariko akavuga ko atigeze amenya ko ari amibano, cyane ko ngo nawe yageze kuri konti ye agahita ayoherereza kuri konti y’undi muntu Usanase yari yamuhaye.

Umuvugizi w’Urwego rw’Ubugenzacyaha mu Rwanda, Mbabazi Modeste yavuze ko ibyaha bikorerwa ku ikoranabuhanga, by’ubwambuzi bushukana bimaze iminsi bikorwa kandi ko bigenda biba byinshi.

Yasabye ko buri Munyarwanda wese yakagombye gushakisha uburyo bwose bwo kwirinda ibyaha bikorerwa ku mbuga nkoranyambaga by’ubutekamutwe, nko guhita bamenyesha inzego zishinzwe kubirwanya zo muri RIB , mbere y’uko ibyo byaha bikorwa.

Yagize ati “Turasaba Abanyarwanda bose gushishoza, bakirinda ba bantu babahamagara nbababwira ngo batsindiye amafaranga, bakabasaba ko ngo babanza kubaha amafaranga runaka, umuntu agatwarwa n’ayo mafaranga bamubeshye ko yatsindiye , akaboherereza ayo mafaranga bamusabye kandi bataranabonana.”

Yakomeje agira ati “ Abantu bagiye batekereza ko n’uwo bariho bavugana yifuje kubanza bakabonana bakaganira kubyo bari gupanga bari kumwe, batabivuganye ku mbuga nkoranyambaga cyangwa kuri telefoni, byagira icyo bimara kuko akanamenya ko uwo muntu bari gukorana icyo ari umuntu nyawe cyangwa se niba ari umujura.”

Yavuze ko ibyaha by’ubwambuzi bushukana bukorerwa ku mbuga nkoranyambaga ari bimwe mu byaha bikomeye, bifite ibihano kuva ku gifungo cy’imyaka 5 kugeza kuri 7 n’ihazabu yo kuva ku mafaranga y’u Rwanda miliyoni kugeza kuri miliyoni 5.

Umuvugizi wa RIB mu Rwanda, Mbabazi Modeste abwira abanyamakuru ingamba zafashwe ku kibazo cy’abatekera abantu imitwe bakoresheje imbuga nkoranyambaga


INKURU ZA :
Tanga Igitekerezo
Ibitekerezo 2
Tuto Kuya 6-08-2018

Bakunda kumpamagara nkabihorera kuko narabamenye ,Ariko bageze no kuri email none mutubwire uko umuntu yajya abatanga kuri Rib hakiri Kare!

Tuto Kuya 6-08-2018

Bakunda kumpamagara nkabihorera kuko narabamenye ,Ariko bageze no kuri email none mutubwire uko umuntu yajya abatanga kuri Rib hakiri Kare!

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...