U Rwanda rwashyizwe mu bihugu 10 bya mbere ku isi bikomeje kwitwara neza mu guhangana n’icyorezo cya COVID-19 rukaba ruri ku mwanya wa Gatandatu mu gihe muri ibi 10 ntakindi gihugu cyo muri Africa kirimo.

Bikubiye mu Isesengura ryakozwe n’Ikigo Lowy Institute cyo muri Australia gisanzwe gikora ubushakashatsi n’isengura mu ngeri zinyuranye.

Iki kigo cyakoze isesengura ku bihugu 98, kigaragaza ko ibihugu bifite abaturage bacye ari byo bikomeje kwitwara neza mu rugamba rwo guhangana na COVID-19.

Uru rutonde rw’Ibihugu 10 bikomeje kwitwara neza, ruyobowe na New Zealand ikurikirwa na Vietnam, ku mwanya wa gatatu hakaza Taiwan ikurikirwa Thailand, ku mwanya wa gatanu hakaza Cyprus ikurikirwa n’u Rwanda.

Ku mwanya wa karindwi haza Iceland ikurikirwa na Austalia, ku mwanya wa cyenda hakaza Latvia mu gihe ku mwanya wa 10 haza Sri Lanka.

Iri sesengura kandi rigaragaza ko ibihugu bifite abaturage benshi ari byo bitari kwitwara neza muri uru rugamba kuko nka Brazil iza ku mwanya wa nyuma (98) w’uru rutonde mu gihe Leta Zunze Ubumwe za America ziri ku mwanya wa 94.

Iri sesengura rije mu gihe imibare y’abandura n’abahitanwa na COVID-19 ikomeje kwiyongera dore ko nko muri iki cyumweru ari ubwa mbere habonetse abarwayi bashya bagera muri 500 mu masaaha 24 gusa.

Iri zamuka kandi ryatumye ingamba zo kwirinda ikwirakwira ry’icyorezo cya COVID-19 zikazwa kuko ubu Umujyi wa Kigali uri mu cyumweru cya kabiri cya Guma mu rugo naho mu bindi bice bakaba bari muri gahunda yo kutarenga uturere.

IBIHUGU 10 BYA MBERE N’ 10 BYA NYUMA

UKWEZI.RW