Ku mugoroba wo kuri uyu wa Gatanu tariki 16 Werurwe 2018, twasuye abahanzi barimo Safi Madiba , Queen Cha na Marina aho bari mu myiteguro idasanzwe y’ibitaramo bizabera I Musanze tariki 23 Werurwe ndetse n’ikizabera I Kigali tariki 24 Werurwe 2018, byombi bikaba bizitabirwa numuhanzi Harmonize, ufatwa nk’umwe mu bakunzwe muri iyi minsi mu gihugu cya Tanzania.

Mu bahanzi twasanze ahari kubera iyi myiteguro barimo bafashwa n’itsinda (Band) rigizwe na bamwe mu bahoze ari abanyeshuri bo mu ishuri rya musika rya Nyundo, harimo Safi Madiba, Queen Cha, Marina ndetse na Yvan Buravan nawe uri mu bazafasha aba bahanzi muri iki gitaramo cyo kumurika ku mugaragaro inzu itunganya umuziki ya ‘The Mane Music Label’.

Mupenda Ramadhan uzwi ku izina rya Badrama akaba ari nawe muyobozi mukuru w’iyi nzu itunganya umuziki izamurikwa tariki 23 na 24 Werurwe 2018, mu bitarmo bizabera I Musanze na Kigali, yabwiye Ukwezi.com ko aba bahanzi bari mu myiteguro bazaririmba umuziki ucuranze mu buryo bw’umwimerere (Live) aho mu bandi bahanzi bazafatanya nabo harimo abashobora kuzaririmba live.

Mu ndirimbo umuhanzi Safi Madiba arimo gukorera imyitozo harimo ; Fine, Kimwe Kimwe, Got it, Come Back, Nyamirambo, ndetse ngo afite n’indirimbo nshya arashyira hanze mu Cyumweru gitaha nayo ikaba iri mu ndirimbo zizatungura abantu muri iki gitaramo dore ko aribwo bwa mbere azaba ayiririmbiye abantu.

Umuhanzikazi Queen Cha uri no mu bahatanira Guma Guma nawe twamusanze ahari kubera iyi myiteguro aduhamiriza ko yiteguye kuzagaragaza itandukaniro hagati ye na Queen Cha abanyarwanda by’umwihariko abakunda umuziki we bari bazi dore ko anafite urugamba rukomeye rwo kwigaragaza nk’uhatanira kuzatwara iki gikombe cya PGGSS8.

Mu ndirimbo uyu muhanzikazi Queen Cha yarimo asubiramo harimo izakunzwe nka ; Ishusho y’Urukundo, Alone, Baby Love, n’izindi

Ku ruhande rw’umuhanzikazi Marina we yarimo akora indirimbo ze zikunzwe zirimo ; Like That, Marina, Decision, n’izindi ndirimbo ze zitandukanye.

Ibi bitaramo bizamurikirwamo inzu itunganya umuziki ya ‘The Mane Music Label’ biteganyijwe ku matariki ya 23 na 24 Werurwe 2018, aho kimwe kizabera I Musanze muri Salle ya Muhoza hakaza n’ikizaba ku munsi ukurikiyeho (azaba ari ku wa Gatandatu tariki 24) kizabera I Kigali muri Kigali Exhibition and Conference Village ahazwi nka Camp Kigali.

Ku bijyanye no kwinjira muri ibi bitarmo ni bizajya bitangira mu masaha ya saa kumi n’ebyiri z’umugoroba, aho kwinjira ahasanzwe ari 5000Frw, naho mu myanya y’icyubahiro hari abazishyura 10,000Frw bazagura amatike mbere y’igihe na 15,000Frw ku bazagurira ku muryango, hari kanndi n’abazagura imeza y’abantu 8 iriho n’icyo kunywa kuri 200,000Frw.

Marina imyiteguro ayigeze kure nawe ngo azassurutsa abanyarwanda muri muzika icuranze mu buryo bw’umwimerere ’Live’

Umuhanzikazi Queen Cha nawe ngo ariteguye kuzashimisha abazitabira iki bitaramo byiswe ’The Mane Music Label Launch’

Safi Madiba mu ndirimbo ze zikunzwe nawe ngo muri ibi nitaramo ashaka gutungura benshi

AMAFOTO : Mugabo Paccy