Umuhanzi ukomeye cyane muri Uganda wanamenyekanye cyane muri Politike kubera kugaragaza ibitekerezo bitavuga rumwe na Guverinoma ya Uganda, Robert Kyagulanyi uzwi ku izina rya Bobi Wine na bagenzi be bareganwa barekuwe by’agateganyo n’Urukiko Rukuru rwa Gulu kuri uyu wa Mbere tariki ya 27 Kanama 2018.

Depite Bobi Wine wari uherutse gufunganwa na bagenzi be 32 bakurikiranweho ibyaha birimo gushaka kugirira nabi umukuru w’igihugu, yarekuwe by’agateganyo hamwe na bagenzi be 7 nyuma yo kwemera gutanga ingwate.

Nyuma y’uko Urukiko rwumvise impamvu zatanzwe na buri wese , rwemeye ko Bobi Wine n’itsinda ry’abantu umunani bafunzwe ku itariki ya 13 Kanama 2018 barekurwa by’agateganyo bagakurikiranwa bari hanze.

Aba bafunguwe by’agateganyo ni Hon Robert Kyagulanyi [Bobi Wine] , Kassiano Wadri, Gerald Karuhanga, Paul Mwiru, na Mike Mabikke wahoze ari umudepite wa Makindye n’abandi.

Ikinyamakuru Chimpreports dukesha iyi nkuru cyatangaje ko Robert Kyagulanyi[Bobi Wine] kugira ngo arekurwe yatanze abamwishingira babiri aribo Gen Mugisha Muntu na Hon depite Barnabas Tikansimire babanje gutanga ingwate ingana n’amashilingi ya Uganda miliyoni 5.

Urukiko kandi rwategetse aba barekuwe ko tariki 30 Kanama 2018 bazagaruka kwiregura ku byaha bari gukurikiranwaho, birimo guteza imvururu mu gihugu no gushaka kugirira nabi umukuru w’igihugu.

Hon.Casiano Wadri nawe wari ufunganwe na Depite Bobi Wine yategetswe n’Urukiko kudakandagiza ikirenge cye mu gace ka Arua mu gihe cy’amezi atatu.

Abaregwa hafi ya bose bagaragaye mu rukiko bacumbagira abandi bagendera ku mbago nk’ibimenyetso bishimangira ko bakorewe iyicwarubozo nk’uko Bobi Wine yakunze kubigarukaho yamagana ibyo bari gukorerwa aho bari bafungiye.