Polisi ikorera mu Karere ka Musanze yafashe abantu 94 barenze ku mabwiriza yo kwirinda ikwirakwira ry’icyorezo cya COVID-19 barimo 89 bariho basengera mu nzu y’umuturage banateye ameza y’ubwiriza.

Aba bantu 94 bafatiwe mu murenge wa Nkotsi muri kariya Karere ka Musanze, barimo bariya 89 basengeraga mu nzu y’umuturage witwa Uwitije Alphonsine w’imyaka 24 mu gihe abandi batanu (5) bafatiwe mu y’umuturage Uwamungu Jean Claude na we w’imyaka 24 y’amavuko.

Aba bantu bafashwe ku Cyumweru cy’icyumweru gishize, biganjemo abo mu itorera rya ADEPR na AER hakabamo n’abitwa Abashumba ba Kristu.

Umuvugizi wa Polisi mu Ntara y’Amajyaruguru, Chief Inspector of Police (CIP) Alex avuga ko bariya bantu bose bahuriye ku kurenga ku mabwiriza yo kwirinda ikwirakwira ry’icyorezo cya COVID-19.

Yagize ati “Bariya bantu icyo bahuriyeho ni ukutubahiriza amabwiriza y’inama y’Abaminisitiri iherutse guterana igahagarika ibikorwa bijyanye no gusenga ndetse n’andi makoraniro ahuza abantu benshi.”

CIP Rugigana yakomeje avuga ko igiteye impungenge ari uko bariya abantu bari baturutse mu mirenge itandukanye igize Akarere ka Musanze bityo hakaba hari impungenge z’uko hari ababa bari banduye bakaba bakwanduza abandi.

Yagize ati “Aka Karere ka Musanze ka kunze kujya kagaragaramo imibare myinshi y’abantu banduye COVID-19, kuba rero abantu nka bariya barenga ku mabwiriza bagahurira ahantu hamwe kandi bavuye ahantu hatandukanye batanapimwe, biteye impungenge.

Uyu muvugizi kandi avuga ko bariya bantu bafashwe biganjemo urubyiruko dore ko n’inzu bafatiwemo ari iz’abantu bakiri bato kandi ko bombi atari ubwa mbere bafashwe.

Aba bantu bose bahise bajyanwa muri sitade Ubworoherane, baraganirizwa ubundi bacibwa n’amande.

UKWEZI.RW