Kuwa 15 Ukwakira 2022, Rwanda Forensic Laboratory yakomereje ubukangurambaga kuri Serivisi zayo bwiswe ’Menya RFL’ mu Murenge wa Bugarama ho mu Karere ka Rusizi, ahari hitabiriye abaturage babarirwa mu bihumbi bitanu bari baje kumva gahunda zayo.

Abayobozi n’abandi bakozi ba RFL bafatanyije n’ibyamamare mu myidagaduro mu gusobanura Serivisi zitangwa n’iki kigo, abaturage bataha bahize kuyoboka Serivisi zacyo mu rwego rwo guhosha amakimbirane. Ubutumwa bwatambutswaga bukurikiranye no kwidagadura mu muziki, ahari itsinda ribyina bigezweho rya Afro Hit, hari Tom Close na Senderi Hit basanzwe ari ibyamamare muri muzika Nyarwanda ndetse na MC Anitha Pendo ukunzwe mu bayobora ibirori bakomeye.

Hasobanukwe ko RFL ipima Uturemangingo Ndangasano (ADN), Ingano ya Alukolo mu maraso, Ibiyobyabwenge n’ibinyabutabire, Inyandiko zigibwaho impaka n’ibikumwe, Ibimenyetso bishingiye ku ikoranabuhanga, Inkomere n’imibiri y’abapfuye, Ibyahumanijwe na Mikolobe ndetse n’ibimenyetso by’imbunda n’amasasu.

DR Karangwa Charles uyobora RFL, yashimiye abaturage b’ i Rusizi ko bitabiriye ubu bukangurambaga ku rugero rushimishije, asaba abaturage kwitabira gahunda z’iki kigo anibutsa ko mu bitaro bya Gihundwe biri mu muri aka Karere hapimirwa ADN.

Yatangiye agira ati "Twishimiye ubwitabire buhagije bwagaragaye kuko haje abantu barenga ibihumbi bitanu. Hari byinshi twabonye muri Raporo zagiye zitugeraho, aho usanga hari abana bataye amashuri kubera inda zitateganijwe, hari iby’amarozi ndetse n’ibijyanye n’inyandiko zigibwaho impaka, niyo mpamvu twaje kumenyesha abo muri aka karere Serivisi dutanga zishobora kuba zakemura amakimbirane".

Yakomeje agira ati : "Ubutumwa bw’umwihariko naha abaturage, ni uko bakwiriye kumenya Serivisi zitangwa na RFL kugira ngo batugane tubafashe. Ndanibutsa ko ku bitaro bya Gihundwe hashyizwe Serivisi zo gupima uturemangingo ndangasano (ADN) bityo bahagana, abaganga bakabafasha muri iyo Serivisi."

Laboratwari y’u Rwanda y’ibimenyetso bishingiye ku bumenyi n’ubuhanga byifashishwa mu butabera, Rwanda Forensic Laboratory, RFL, yifashishwa mu gutahura inyandiko mpimbano n’izindi zagibwaho impaka, kumenya isano abantu bafitanye, guhuza ibimenyetso by’ahakorewe icyaha n’abagikoze, ikaba iganwa n’inzego za Leta n’abandi bantu ku giti cyabo baba bashaka ibimenyetso bishingiye ku bumenyi bwa gihanga.