Kuri iki Cyumweru tariki 5 Mata 2020 abantu bane bakize coronavirus mu Rwanda basezewe mu kigo cya Kanyinya nyuma yo gukira coronavirus.

Mu Rwanda kugeza ubu abanduye coronavirus ni 102, bivuze ko nyuma yo gukira kw’ aba bane abaasigaranye iyi virus ari 98. Abasezerewe bahawe icyemezo cy’ uko bakize coronavirus basohoka mu kigo bameze neza kandi bishimiye ko basubiye mu miryango yabo nyuma y’ ibyumweru bibiri bari mu kato.

Tariki 14 Werurwe 2020 nibwo mu Rwanda habonetse umurwayi wa mbere wa coronavirus mu gihe iyi virusi yabonetse bwa mbere mu Bushinwa mu Ukuboza 2019 ariko ikamenyekana cyane muri Mutarama 2020.

Uwo murwayi yari umuhinde ntabwo ari mubasezerewe uyu munsi. Mbere yo kubasezerera bakorewe ibizamini na muganga asanga nta coronavirus ikiri mu mubiri wabo.

Kuva mu Rwanda haboneka umurwayi wa mbere ufite iyi virusi guverinoma yafashe ingamba n’amabwiriza byo kwirinda ikwirakwira ryayo.

Abaturwanda basabwa kwirinda ingendo zitari ngombwa, gukaraba intoki kenshi n’amazi meza n’isabune no gushyira intera ya metero hagati y’umuntu n’undi.