Ikipe y’Ingabo z’u Rwanda APR FC iherutse kwegukana igikombe cya shampiyona ubugirarakabiri idatsinzwe umukino n’umwe, iri mu makire 10 yamaze kwemera kwitabira CECAFA Kagame Cup izabera muri Tanzania mu kwezi gutaha.

Ibi byatangajwe n’Impuzamashyirahamwe mu mupira w’amaguru y’ibihugu byo mu karere ka Afurika y’i Burasirazuba no hagati (CECAFA).

CECAFA Kagame Cup izabera i Dar es Salaam muri Tanzania kuva tariki 01 kugera 15 Kanama 2021.

Amakipe amaze kwemera kwitabira CECAFA Kagame Cup 2021 : Young Africans SC, Azam FC (Tanzania), Altabara FC (South Sudan), Le Messager Ngozi FC (Burundi), APR (Rwanda), Express FC, KCCA FC (Uganda), Tusker FC (Kenya), KMKM SC (Zanzibar), Big Bullets FC (Malawi).

Umuyobozi Nshingwabikorwa wa CECAFA, Auka Gecheo yavuze ko tombola y’uko amakipe azahura izakorwa tariki 27, ndetse iyi CECAFA ikazaba ari n’umwanya wo gufasha amakipe kwitegura amarushanwa ya CAF arimo CAF Champions League na CAF Confederation Cup.

Amwe mu makipe azitabira iyi CECAFA Kagame Cup harimo KCCA yegukanye irushanwa riheruka, hakazazamo ikipe ya Big Bullets yo muri Malawi izaza nk’umutumirwa, u Rwanda rukazahagararirwa na APR FC yegukanye shampiyona iheruka.

Ikipe y’Ingabo z’u Rwanda APR FC iheruka muri CECAFA Kagame Cup ya 2019 yabereye mu Rwanda, yasezerewe igeze muri 1/4 na AS Maniema yo muri Repubulika Iharanira Demokarasi ya Congo.