Perezida w’Ishyirahamwe ry’Umupira w’amaguru mu Rwanda, FERWAFA, yibasiwe bikomeye na bamwe mu bakinnyi bakiniye ikipe y’Igihugu Amavubi bakanayihesha kugera mu gikombe cya Afurika cy’ibihugu cya 2004 ari nacyo rukumbi u Rwanda rwabashije kujyamo. Ibi byaje nyuma y’uko uyu muyobozi atangaje ko muri 2004 atari u Rwanda rwagiyeyo ahubwo ari abanyamahanga.

Kuri uyu wa Kabiri tariki 21 Werurwe 2017 ubwo FERWAFA yerekanaga umutoza Antoine Hey ugiye gutoza ikipe y’igihugu Amavubi, Perezida w’iri shyirahamwe, Nzamwita Vincent De Gaule yavuze ko kuri we afata ko u Rwanda rutigeze rujya mu mikino ya nyuma y’igikombe cya Afurika (CAN) muri 2017 kuko ari abanyamahanga bagiyeyo.

Yagize ati : "Muzi ko twagiye muri CAN dukoresha abanyamahanga, kuri ubu bavuye mu ikipe y’igihugu. Ni nk’aho uhaye umwanya abana b’Abanyarwanda n’umurongo wo kwigaragaza kugirango bahe ingufu ikipe y’igihugu yacu, ikipe y’igihugu ni iy’abana bacu ubu... Ibyo kujya muri CAN sinjya mbitindaho kuko ni nk’aho kuri njyewe tutagiyeyo kuko twakoreshaga abanyamahanga kandi iyi gahunda turimo uyu munsi ni iya Nyakubahwa Perezida wa Repubulika yatekereje cyeera ariko kugirango ijye mu bikorwa byarananiranye..."

Aha Nzamwita Vincent De Gaule ari kumwe na Jimmy Gatete, umwe mu bakinnyi bahesheje u Rwanda kujya muri CAN ya 2004

Aya magambo ntiyashimishije bamwe mu bahoze bakinira Amavubi banajyanye iyi kipe muri CAN ya 2004 ndetse batangaje amagambo agaragaza agahinda n’uburakari batewe n’ibyavuzwe na De Gaule bafata nko gupfobya amateka y’ibigwi byiza u Rwanda rwagezeho. Karekezi Olivier na Mbonabucya Desiré nibo babigarutseho cyane babinyujije ku mbuga nkoranyambaga, aba bakaba bari no mu bakinnyi b’ingenzi iyo kipe yari yubakiyeho kandi ari Abanyarwanda.

Olivier Karekezi ati : "Nyakubahwa Perezida wa FERWAFA, ushobora kwishimira ibyiza igihugu kimaze kugeraho kuva intambara yarangira ? Ese ushingira he uvuga yuko igihugu cyabonye itike yerekeza mu gikombe cy’Africa binyuze mu banyamahanga ?Nimba ari ukujya mu kintu kigutunguye, nibyo bituma kwiyumvisha ibyo ugenda uvuga inzira zose bigenda bitungura umuntu wese usobanukiwe n’umupira ! Hanyuma 2015 badutera mpaga... bayiduteye kubera nde se ? Nimba ari uko wize ibyo korora amafi muri Congo, ngirango ninayo mpamvu ugera mu mupira bikagucanga ! Ibihugu byose byitabaza abahanga mu mupira b’abanyamahanga ni uko ari abasazi se ? Ese abakinaga 2004 uvuga ko ari abanyamahanga, ubu urusha ikinyarwanda Katawuti Ndikumana ? Njyewe reka nkugire inama... Wakomeza utakomeza kuyobora FERWAFA, nasaba ko uzanagusimbura azaza akomereza ku byiza waba waragezeho aho kuza uvuga ibidafitiye akamaro igihugu cyacu."

Olivier Karekezi ati : Nimba ari uko wize ibyo korora amafi muri Congo...

Mu butumwa burebure Desiré Mbonabucya (wari Kapiteni y’ikipe yagiye muri CAN) yanditse ku mbuga nkoranyambaga, na we yagaragaje ko yababajwe cyane n’amagambo ya Nzamwita Vincent De Gaule. Yagize ati : "Ngo u Rwanda ntirwagiye muri CAN ngo hagiyeyo abanyamahanga ! Ngo ku bwe arashaka ko rujyayo bwa mbere binyuze ku mutoza Antoine Hey !!

Nkaba ndangiza nsaba Minisiteri ya Siporo ko yashishoza neza koko niba De Gaulle ari we muntu ukenewe kuko bigaragara ko ibyo abandi bose bakoze mbere ye abisuzugura, ko ntacyo bakoze kandi yibagirwa ko ku bw’abamubanjirije habayeho Amakipe yagiye muri CAN na Coupe du Monde U17 (Igikombe cy’isi cy’abatarengeje imyaka 17). Twizere ko Minisiteri iza kugira icyo ikora kuri aya magambo asuzuguza cyangwa asebya igihugu. Njye ku bwanjye nkurikije amakosa akorwa n’imivugire idahwitse nkaba namusaba kwegura. Nkaba mbashimiye cyane bavandimwe namwe nshuti ba sportif nanditse byinshi muranyihanganira ni akababaro ko kumva umuntu usebya amateka meza y’ibyagezweho muri Siporo yacu."

Desiré Mbonabucya wari Kapiteni y’ikipe y’u Rwanda yagiye muri CAN