Mu mukino w’umunsi wa14 wa shampiyona y’igihugu y’umupira w’amaguru, Rayon Sports yari yakiriye Marine FC kuri Sitade ya Kigali i Nyamirambo, yitwaye neza ko umukino warangiye ari ibitego 2 bya Rayon Sports ku basa bwa Marine FC. Uyu mukino ubaye mbere y’uko Rayon Sports yarekeza muri Afurika y’epfo gucakirana na Mamelodi Sundowns.

Ni umukino wabaye kuri iki Cyumweru tariki 11 Werurwe 2018. Amakipe yombi yatangiye ubona arimo kwigana ariko Rayon Sports igacishamo igasatira Marine FC ariko ntibone igitego. Igice cya mbere cyarangiye ari ubusa ku busa. Wari umukino ukomeye cyane ko Rayon Sports isanzwe igorwa cyane na Marine FC.

Mu gice cya kabiri, umutoza wa Rayon Sports yakoze impinduka Muhire Kevin asimbura Mugisha Francois, ikipe itangira gusatira bigaragara cyane. Umutoza yongeye imbaraga mu busatirizi Boniface Kalebu asimbura Mugume maze ikipe irushaho gusatira, ku munota wa 64 Kwizera Pierrot atsindira igitego cya mbere Rayon Sports.

Rayon Sports yakomeje gusatira cyane ikomeza no guhusha ibitego byari byabazwe. Muhire Kevin wagiyemo asimbuye, ku munota wa 79 yatsindiye Rayon Sports igitego cya kabiri abafana batangira kwizera instinzi. Umukino warangiye ari ibitego 2 ku busa bwa Marine FC yaturutse i Gisenyi ije guhangana n’ikipe isa n’abakeba kuko bikunze kuvugwa ko Marine FC y’ingabo zirwanira mu mazi iba irwanira ishyaka APR FC nk’ikipe y’ingabo muri rusange.

Uyu mukino wa Rayon Sports na Marine FC watumye iyi kipe ikomeza kuza mu zihatanira igikombe zigaragaza ubushobozi bwo kuguma mu myanya y’imbere, gusa sigiye Bakame imvune yo mu ivi izatuma agaruka mu kibuga nyuma y’iminsi 3.

Rayon Sports irimo kwitegura umukino wo kwishyura izacakiranamo na Mamelodi Sundowns, ndetse uyu mukino wa shampiyona warebwe na Perezida wa CAF, Ahmed Muhammed uri mu ruzinduko rw’akazi mu Rwanda yirebera imikinire y’ikipe iherutse kwihagararaho imbere y’igihangange Mamelodi.

Aherekejwe n’abayobozi ba FERWAFA mu Rwanda, Perezida wa CAF yari yaje kureba umukino wa Rayon Sports na Marine FC

Abakinnyi 11 babanjemo ku mpande zombi

Rayon Sports : Ndayishimiye Eric ‘Bakame’ (1) (C), Mutsinzi Ange (5), Usengimana Faustin (15), Manzi Thierry (4), Mugisha Francois ‘Master’ (25), Yannick Mukunzi (6), Nyandwi Saddam (16), Rutanga Eric (3), Kwizera Pierrot (23), Mugume Yassin (18) na Christ Mbondi (9).

Marines FC : Dukuzeyezu Pascal, Nsabimana Hussein (C), Ishimwe Christian, Ndayishimiye Thierry, Mutunzi Clement, Yamin Salum, Niyitegeka Idrissa, Bahame Arafat, Kalisa Hamuri, Tuyishime Bejamin, Birimungu Omar

Uko indi mikino yagenze

Kuwa Gatandatu tariki 10 Werurwe

Bugesera 2-0 Mukura VS
Etincelles 3-0 Gicumbi FC

Ku Cyumweru tariki 11 Werurwe

Kirehe FC 1-0 Police FC
Miroplast FC 1-2 Sunrise FC
Kiyovu Sports 2-0 Amagaju FC

Kuwa Mbere tariki 12 Werurwe hateganyijwe umukino uzahuza ikipe ya AC Kigali na Musanze FC ukazabera kuri Sitade ya Kigali i Nyamirambo ku isaha ya 15 :30. Hari kandi umukino wa APR FC na Espoir FC wari uteganyijwe kuwa Kabiri ariko uyu warasubitswe.

Amafoto yaranze umukino/Muhizi Olivier

Perezida wa CAF yarebye uyu mukino ariko yahereye mu gice cya kabiri.

Mugume yitwaye neza mu gice cyambere nubwo nta gitego yatsinze muri uyu mukino.

Muhire Kevin yishimira igitego cya kabiri nyuma yo gucenga umuzamu wa Marine.

Nyandwi Sadam nawe yitwaye neza cyane muri uyu mukino.

Rutanga Eric yamaze gufatisha cyane nyuma yo kuva muri APR FC

wari umukino urimo ihangana rikomeye ku mpande zombi.