Ishyirahamwe ry’Umukino w’Amagare mu Rwanda (FERWACY) ryasubitse Shampiyona y’uyu mukino yari iteganyijwe kuba hagati ya tariki 19 na 20 Kamena 2021 kubera ingamba nshya zo kwirinda COVID-19.

Itangazo ry’Ishyirahamwe ry’Umukino w’Amagare (FERWACY) ryasohotse kuri uyu wa Kane tariki 17 Kamena 2021, rivuga ko iyi shampiyona yasubitswe mu kugira ngo hubahirizwe ingamba zo kwirinda ikwirakwira ry’icyorezo cya COVID-9.

Rivuga ko izo ngamba zatumye hari ibice bimwe by’Igihugu bishyirirwaho umwihariko mu ngamba zo kwirinda iki cyorezo cya COVID-19.

FERWACY ivuga ko iki cyemezo cyafashwe nyuma yo kuganira n’inzego z’ubuyobozi bw’Igihugu byabaye ngombwa ko iyi shampiyona isubikwa.

Iyi shamiyona yo gusiganwa ku magare isanzwe ikorwa mu mihanda yambukiranya uturere n’intara n’Umujyi wa Kigali mu gihe hari Uturere twashyiriweho umwihariko mu mabwiriza yo kwirinda icyorezo cya COVID-19.

Nka Rubavu kuva kuri uyu wa 17 Kamena 2021, yatangiye kubahiriza gahunda ya guma mu Karere ku buryo ntawemerewe gusohoka muri kariya Karere cyangwa kukajyamo uretse ababyemerewe gusa nk’abatarwa ibicuruzwa.

UKWEZI.RW