AMAKURU

UKWEZI

Minisitiri Dr Richard Sezibera yavuze kuri Kayumba Nyamwasa, ku Burundi no kuri Uganda

Minisitiri Dr Richard Sezibera yavuze kuri Kayumba Nyamwasa, ku Burundi no kuri Uganda
20-11-2018 saa 16:40' | By Vincent Nsengiyumva | Yasomwe n'abantu 6384 | Ibitekerezo 2

Minisitiri w’Ububanyi n’Amahanga Dr Sezibera Richard yavuze ko atazi gahunda za Kayumba Nyamwasa uvugwaho gushaka kugirana ibiganiro n’ubuyobozi bw’u Rwanda, anakomoza ku mubano w’u Rwanda n’ibihugu nk’u Burundi na Uganda udahagaze neza.

Minisitiri Dr Sezibera yabigarutseho mu kiganiro kirambuye yagiranye n’abanyamakuru kuri uyu wa 20 Ugushyingo 2018.

Ubwo yabazwaga ku makuru avugwa y’uko Kayumba Nyamwasa yifuza ibiganiro n’abayobozi bakuru b’igihugu, Minisitiri Dr Sezibera yavuze ko nta makuru abifiteho, avuga ko gahunda ihari ari ibiganiro biri gutegurwa hagati y’igihugu cy’u Rwanda na Afurika y’Epfo.

Yavuze kandi ko ibivugwa ko ishyaka rya RNC rya Kayumba Nyamwasa, PS Imberakuri hamwe n’andi atavuga rumwe n’ubutegetsi yasabye ibiganiro n’u Rwanda, ibyo ngo atabizi atanabyumva kuko ishyaka azi rya PS Imberakuri rihagarariwe mu Nteko Ishinga amategeko, andi yo akaba ntaho yanditse mu Rwanda. Yashimangiye ko abashaka ibiganiro bazitabira Umushyikirano cyangwa bagashaka abandi banyarwanda mu bihugu barimo bakaganira.

REBA VIDEO UKO ABISOBANURA HANO:

Yagize ati “Ibya Kayumba Nyamwasa simbizi. Ibimuvugwaho ntabyo nzi.”. Yanahakanye amakuru avuga ko Leta y’u Rwanda yagiranye ibiganiro na Afurika y’Epfo, avuga ko ahubwo ari gahunda iri gutegurwa igomba kuzaba vuba ibiganiro bikabaho ibihugu bigatsura umubano.

Yagize ati “Nta biganiro byabaye hagati y’u Rwanda na Afurika y’Epfo. Abakuru b’ibihugu barahuye bavugana ko Abaminisitiri b’Ububanyi n’amahanga bazahura bakagirana ibiganiro ku bibazo biri hagati y’ibihugu byombi. Ibyo tugomba gukora twebwe abashinzwe ububanyi n’amahanga ni uguhura tugatsura umubano wacu hagati y’u Rwanda na Afurika y’Epfo.”

Dr Sezibera yanavuze ko umubano hagati y’u Rwanda n’u Burundi ndetse na Uganda utameze neza, ashimangira ko u Rwanda rugerageza uko rushoboye kugira ngo umubano ugaruke ariko ibi bihugu bigakomeza kwinangira.

Ku kijyanye n’u Burundi Min. Sezibera yavuze ko igihari ari uko iki gihugu gihora gishaka kwinjiza u Rwanda mu bibazo byacyo, gusa yongeraho ko u Rwanda ruhora rwiteguye kugarura umubano mwiza hagati y’ibihugu byombi.

Yagize ati “Umubano hagati y’u Rwanda n’u Burundi ntabwo umeze neza. u Burundi bufite ibibazo byabwo bushaka gushyiramo u Rwanda. Umubano ntabwo umeze neza ku mpamvu z’u Burundi. Nibushaka ko tubana neza twe nta kibazo dufite tuzabana neza.”

Yunzemo ati “Ni ibibazo bihari twifuza ko byakemuka umubano ugakomeza kugenda neza. Ibyo bibazo ntabwo ari twe biturukaho. Uzakomanga ku Rwanda azasanga amarembo afunguye rwose.”

Dr Sezibera yashimangiye ko u Rwanda rushaka umubano mwiza hagati y’ibihugu byose, ariko ko bitavuze ko iyo ushatse kubana neza n’umuntu akabyanga wakoresha igitugu. Ati “Ukomanze bakanga kugukingurira ntabwo ujya gusatura umuryango w’uwanze kugufungurira.”

Ku bijyanye na Uganda nabwo yavuze ko ibibazo bihari ari ibiterwa na Uganda bityo u Rwanda rukaba rwiteguye ko iki gihugu nigishaka umubano mwiza n’u Rwanda kizasanga amarembo akinguye.

Minisitiri Sezibera yemeza ko hari imishinga myinshi yari ihuriweho na bimwe mu bihugu by’ibituranyi yagiye idindira kubera agatotsi kagenda kagaragara mu mubano n’ibi bihugu.


INKURU ZA :
Tanga Igitekerezo
Ibitekerezo 2
richard Kuya 22-11-2018

ndumiwe pe ngo": ibibazo by’urwanda n’uburundi biva k’ UBURUNDI. ibibazo by’urwanda na congo, biza kuri CONGO. ibibazo by’urwanda n’ubugannde biva ku BUGANDE.....urwanda rwo ntacyibazo ruteza ahandi!!!!!

j.claude niyonkuru Kuya 20-11-2018

nibarabe baje hamwe reta y’ uburundi ikure intsinga mu mutwe urwanda n’ uburund turavukana kand reta y’ uburundi ikure ingoran zose zir mugihugu twibere mu gihugu c’amata n’ ubuki .

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...