konka coffee
KONKA

AMAKURU

UKWEZI

Abayobozi n’abanyeshuli ba UR ishami rya Rukara bibutse Abatutsi bishwe bajugunywa muri Muhazi

Abayobozi n’abanyeshuli ba UR ishami rya Rukara bibutse Abatutsi bishwe bajugunywa muri Muhazi
13-04-2018 saa 14:20' | By Muhire Aime Placide | Yasomwe n'abantu 853 | Ibitekerezo 1

Kuwa Kane Taliki ya 13 Mata 2018, Ubuyobozi bukuru bwa Kaminuza y’u Rwanda, Abanyeshuli n’abayobozi b’Ishami rya Rukara ndetse n’abaturage begereye iki kigo bibukaga Jenoside yakorewe Abatutsi by’umwihariko abaguye muri iki kigo no mu Kiyaga cya Muhazi, urubyiruko rw’Abanyarwanda rusabwa kuba urumuri rw’isi.

Iki gikorwa cyo kwibuka no kuzirikana Abatutsi bazize Jenoside cyabanjirijwe n’urugendo rwo Kwibuka (Walk to remember) rusozwa n’umugoroba wo kwibuka wabereye muri Campus ya Rukara.

Abitabiriye urugendo rwo kwibuka barutangiriye kuri Campus ya Rukara bagarukira ku Kiyaga cya Muhazi, aho babanje kunamira no gushyira indabo abahiciwe bakajugunywa mu mazi mu rwego rwo kubaha icyubahiro.

Mu buhamya bw’umwe mu babyeyi barokokeye kuri iki kiyaga cya Muhazi, yasobanuye uburyo ivangura ryatangiriye mu mashuli aho Abahutu batandukanywaga n’Abatutsi.

Uyu mubyeyi yanagarutse ku nzira y’umusaraba abahigwaga banyuzemo, yibuka bamwe mu nshuti ze bapfuye abareba adasize na Nyirasenge wari umunyamasengesho, akicanwa n’abari bamuhungiyeho baziko baribuhakirire.

Nyuma y’urugendo rwo kwibuka, umuhango wakomereje mu mugoroba wo kwibuka wabereye muri Campus ya Rukara.

Bishop Birindabagabo Alexis , uhagarariye Peace Plan yabwiye abari aho ko uretse kuba Jenoside imunga ubusabane bw’umuntu n’Imana, ngo ni n’icyaha gituma wagikoze ahigwa ku isi hose ndetse n’ingaruka zikagera no ku rubyaro rwe.

Yagize ati “Ubu hari abana ubaza ababyeyi babo bakagira ipfunwe ryo kuvuga amazina yabo bitewe n’ibyo bakoze. Jenoside igira ingaruka zikomeye cyane haba ku bayikoze n’abayikorewe.”

Yakomeje kwibutsa Abanyarwanda bose ko bagomba gufana urunana bagasigasira ibyagezweho anasabira iguhugu cy’u Rwanda imigisha n’urukundo kugira ngo ibyabaye bitazongera kubaho ukundi.

Mu buhamya bwatanzwe na Mudaheranwa nawe yavuze ukuntu umubyeyi we yatwikiwe mu nzu amureba, grenades zijugunywa mu Kiliziya arimo ariko arakoka, arara mu rufunzo imisundwe yinjira mu misare y’ibisebe yari afite bitewe n’inzira y’umusaraba yanyuzemo.

Yagize ati “Imodoka zazanaga Interahamwe zifite amahiri zikica hakurikijwe lisiti yari yarakozwe kera. Abaturanyi, abo nasengereye inzoga nibo bampize bukware!Gusa sinabura gushimira ingabo zahoze ari iza RPA zanyitayeho; zikamvura ibikomere nkagarura ubuzima ubu nkaba ntekanye.”

Vice-Chansellor wa Kaminuza y’u Rwanda yabwiye abari aho bose ko anezezwa no kuba urubyiruko rw’Abanyarwanda bafata igihe bakumva amateka y’igihugu cyahoze kiri mu mwijima.

Yagize ati “Muri urumuri rw’isi, mukomeze mumurike. Mwubake amateka meza; Jenoside ntizongere kubaho ukundi.”

Umuyobozi w’Umurenge wa Gahini Rukeribuga Joseph nawe yibukije abari aho bose ko ibyabaye bidakwiriye kuzongera kubaho ukundi.

Yagize ati “Ibyabaye biteye ubwoba gusa nanone turishimira intambwe igihugu kimaze gutera haba mu butabera, ubumwe n’ubwiyunge bw’Abanyarwanda ndetse n’iterambere ry’abaturage muri rusange.”

Gitifu Rukeribuga Joseph yibukije abari aho ko aho igihugu kigeze ari heza ariko ko urugendo rugikomeje ngo kuko hari abagishaka ko igihugu cyacu cyasubira mu mateka mabi cyavuyemo.

Yagize ati "Mujya mwumva abapfoya, bagahakana ko Jenoside yabayeho kandi bararebaga ibyagaho. Umugabo arigira yakwibura agapfa, twe ubwacu Abanyarwanda nitwe tugomba kwiyubakira igihugu.”

Bunamiye imbaga y’Abatutsi bishwe bakajugunywa mu kiyaga cya Muhazi


INKURU ZA :
Tanga Igitekerezo
Ibitekerezo 1
-xxxx- Kuya 14-04-2018

ningombwa rwose nkabanyarwanda!!

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...