konka coffee
KONKA

AMAKURU

UKWEZI

Abayobozi ba RAB baherutse guhagarikwa na Minisitiri w’Intebe batawe muri yombi

Abayobozi ba RAB baherutse guhagarikwa na Minisitiri w’Intebe batawe muri yombi
6-01-2018 saa 08:45' | By Akayezu Jean de Dieu | Yasomwe n'abantu 5164 | Ibitekerezo 3

Polisi y’u Rwanda yataye muri yombi bamwe mu bayobozi bahoze bakorera Ikigo cy’Igihugu gishinzwe Ubuhinzi , RAB, bakaza guhagarikwa mu kazi na Minisitiri w’Intebe w’u Rwanda, Edouard Ngirente kubw’amakosa bikekwako bakoze muri iki kigo ajyanye no kunyereza umutungo wa Leta.

Mu mpera z’ukwezi k’Ugushyingo umwaka ushize Minisitiri w’Intebe yahagaritse ku mirimo by’agateganyo umuyobozi mukuru wungirije w’ikigo cy’igihugu gishinzwe ubuhinzi, RAB, Dr Daphrose Gahakwa hamwe n’abandi bayobozi batatu muri iki kigo ku mpamvu zitatangajwe.

Abandi bahagaritswe ni Innocent Nzeyimana wari Umuyobozi w’ishami rishinzwe ibijyanye no kuhira imyaka, Violette Nyirasangwa wari umuyobozi wari ushinzwe ibikorwa (Manager Corporate services) na Theogene Bimenya wari umuyobozi ushinzwe imari. Aba bose bari muri barindwi (7) bagize ubuyobozi bukuru (senior management) ya Rwanda Agricultural Board.

Amakuru agera ku kinyamakuru Ukwezi.com avuga ko bamwe muri aba bayobozi ukuyemo Dr Gahakwa wari umuyobozi mukuru wungirije muri iki kigo abandi bose kugeza ubu bari mu maboko ya Polisi aho bakurikiranweho ibyaha bifitanye isano n’ibyatumye Minisitiri w’Intebe, Edouard Ngirente abahagarika ku mirimo.

Aya makuru y’ifatwa ry’aba bayobozi kandi yemezwa na Polisi y’u Rwanda ndetse aba bose ngo bakaba barafashwe tariki 28 Ukuboza 2017, aho bakurikiranweho ibyaha byo kunyereza umutungo wa Leta no gukoresha inyandiko mpimbano.

ACP Theos Badege, Umuvugizi wa Polisi y’u Rwanda yabwiye Ukwezi.com ko ibi byaha aba bayobozi bakurikiranweho byo kunyereza umutungo wa Leta baregwa byakozwe mu ngengo y’imari ishize ya 2016/17 hakoreshwa inyandiko zahimbwe mu guhabwa amafaranga y’ubutumwa (mission) kandi nta butumwa bagiyemo.

ACP Badege kandi yakomeje avuga ko kunyereza umutungo wa Leta ari icyaha kivugwa n’ingingo ya 325 mu gitabo cy’amategeko ahana gihanishwa igihano kiri hagati y’imyaka itanu (5) n’irindwi(7) y’igifungo, naho kwandika cyangwa gukoresha inyandiko yahinduwe irimo ibinyoma bivugwa mu ngingo ya 614 y’iki gitabo bigahanishwa igifungo kiri hagati y’imyaka irindwi(7) n’icumi(10)

Mu Ukwakira umwaka ushize Komisiyo ishinzwe gukurikirana imikoreshereze y’imari n’umutungo by’Igihugu (PAC) mu Nteko Ishinga Amategeko RAB yisobanuye ku makosa y’imicungire y’imari ya Leta yagaragajwe na raporo y’Umugenzuzi w’Imari ya Leta.

Icyo gihe imbere ya PAC, Dr Bagabe uyobora RAB kuva mu mpera z’umwaka ushize, yavuze ko iki kigo gifite ibibazo byinshi cyane birimo kuba ntawe ubazwa ibyo ashinzwe. Yavuze ko umuntu wagize uruhare mu mikorere mibi muri iki kigo azabibazwa ndetse akavuga ko byatangiye.


INKURU ZA :
Tanga Igitekerezo
Ibitekerezo 3
elvis Ntaganda Kuya 8-01-2018

Abanyereza umutungu w’Igihugu ntibakwiye kujenjekerwa,kandi ibi bintu nyakubahwa President wa Repubulika ahora abivuga ariko ntibumva. Turashimira Polisi y’u Rwanda uburyo ihora iri maso mu guta muri yombi abanyabyaha.

john Kuya 7-01-2018

mu gitondo aba bose baraba bagizwe abere

safari Kuya 7-01-2018

Ibya RAB byo ni ubujura gusa muzajye muri Karongi murebe amasoko yatanzwe yo kugura amatungo y.imishinga ya za compation muzahasanga ibyangombwa bya feke harimo ibyo gupima amaraso,Amaherena ibyo byosemuzasanga byarakozwe kandi ntaho byanditswe muri RAB Mandi amafranga yarariwe n,abo Bose.Mubikurikirane neza muzasanga ago makuru afite ahantu ahuriye nibyo muvuga haruguru

IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...