konka coffee
KONKA

AMAKURU

UKWEZI

Perezida Kagame yazamuye mu ntera abapolisi bakuru 1015 barimo abasimbukijwe amapeti

Perezida Kagame yazamuye mu ntera abapolisi bakuru 1015 barimo abasimbukijwe amapeti
12-01-2018 saa 06:31' | By Chief Editor | Yasomwe n'abantu 5871 | Ibitekerezo 2

Kuri uyu wa Kane tariki 11 Mutarama 2018, Nyakubahwa Perezida wa Repubulika y’u Rwanda, Paul Kagame, yazamuye mu ntera Aba Offisiye ba Polisi y’u Rwanda 1015 ku buryo bukurikira, mu bazamuwe hakaba harimo n’abasimbutse amapeti ukurikije uko ubusanzwe akurikirana.

Muri aba bapolisi bazamuwe mu ntera, harimo abagera ku 10 basanzwe bafite ipeti rya Assistant Commissioner of Police (ACP) bazamuwe ku ipeti rya Commissioner of Police (CP), muri abo hakaba harimo na Theos Badege usanzwe ari Umuvugizi Mukuru wa Polisi y’u Rwanda. Muri abo kandi harimo ACP Faustin Ntirushwa, ACP Jean Marie Twagirayezu, ACP Rogers Rutikanga, ACP William Kayitare, ACP Denis Basabose, ACP Vincent Sano, ACP Robert Niyonshuti, ACP Egide Ruzigamanzi na ACP Rafiki Mujiji

Hari kandi abapolisi 31 basanzwe bafite ipeti rya Chief Superintendent of Police (CSP) bazamuwe ku ipeti rya Assistant Commissioner of Police (ACP), hakabamo abapolisi 18 basanzwe bafite ipeti rya Senior Superintendent of Police (SSP) bazamuwe ku ipeti rya Chief Superintendent of Police (CSP), hakaza kandi abapolisi 43 basanzwe bafite ipeti rya Superintendent of Police (SP) bazamuwe ku ipeti rya Senior Superintendent of Police (SSP), hakaza abandi 110 basanzwe bafite ipeti rya Chief Inspector of Police (CIP) bazamuwe ku ipeti rya Superintendent (SP), hakazamo abapolisi 403 basanzwe bafite ipeti rya Inspector of Police (IP) bazamuwe ku ipeti rya Chief Inspector of Police (CIP).

Muri aba kandi hari umupolisi umwe wazamuwe mu ntera agasimbukishwa amapeti abiri yose, kuko yari Chief Sergeant agirwa Chief Inspector (CIP), bivuga ko yasimbutse irya Assistant Inspector of Police (AIP) hamwe n’irya Inspector of Police (IP). Hari abandi babiri basimbutse amapeti ane kuko bari bafite irya Sergeant bahabwa irya Chief Inspector of Police (CIP), bivuga ko basimbutse irya Senior Sergeant (SSGT), irya Chief Sergeant (CSGT), irya Assistant Inspector (AIP) n’irya Inspector (IP).

Muri aba bapolisi bazamuwe kandi harimo abapolisi 391 bari basanzwe bafite ipeti rya Assistant Inspector of Police (AIP) bazamuwe ku ipeti rya Inspector (IP), hakabamo babiri bari basanzwe bafite irya Chief Sergeant bazamuwe ku ipeti rya Assistant Inspector of Police (AIP), umwe akaba yasimbukishijwe ipeti rimwe avanwa ku ipeti rya Senior Sergeant asimbuka ipeti rya Chief Sergeant agirwa Assistant Inspector of Police (AIP), naho batatu basimbukishijwe atatu, bava ku rya Sergeant basimbuka irya Senior Sergeant (SSGT) n’irya Chief Sergeant (CSGT) bahabwa ipeti rya Assistant Inspector of Police (AIP).

Uretse aba bazamuwe, Perezida wa Repubulika y’u Rwanda yanashyize mu kiruhuko cy’izabukuru aba Ofisiye ba Polisi y’u Rwanda 111 barimo babiri bari bafite ipeti rya Assistant Commissioner of Police (ACP), bane bari bafite ipeti rya Chief Superintendent of Police (CSP), batandatu bari bafite ipeti rya Senior Superintendent of Police (SSP), abandi 17 bari bafite ipeti rya Superintendent of Police (SP), 19 bari bafite ipeti rya Chief Inspector of Police (CIP), 62 bari bafite ipeti rya Inspector of Police (IP) – 62 n’umwe wari ufite ipeti rya Assistant Inspector of Police (AIP)

Dore uko amapeti ya Polisi y’u Rwanda akurikirana n’ibirango byayo:

  • Ipeti rya mbere mu gipolisi (PC), nta kirango rigira, bivuga ko umupolisi wese ugitangira mu ishuri ry’abapolisi bato, ahita atangirana iri peti.
  • Ipeti rya kabiri mu gipolisi, ni irya Corporal (CPL) rirangwa n’ikirango cy’inyuguti za V ebyiri.
  • Ipeti rya gatatu mu gipolisi cy’u Rwanda, ni irya Sergeant (SGT), rirangwa n’ikirango cy’inyuguti eshatu za V.
  • Ipeti rya kane mu gipolisi cy’u Rwanda, ni irya Senior Sergeant (SSGT), rirangwa n’ikirango cy’inyuguti eshatu za "V" hakajyaho n’akamenyetso kari mu ishusho y’umwashi.
  • Ipeti rya gatanu mu gipolisi, ni irya Chief Sergeant (CSGT) rirangwa n’ikirango cy’inuma izengurutswe n’uruziga rwanditsemo "Rwanda Police", iri rikaba ari naryo peti rya nyuma mu bapolisi bato.
  • Ipeti rya gatandatu ari naryo rya mbere mu cyiciro cy’abapolisi b’abofisiye (officers) ni irya Assistant Inspector (AIP) rirangwa n’ikirango cy’inyenyeri imwe, cyambarwa ku ntugu zombi. Abari mu cyiciro cya ofisiye, bambara ibirango by’amapeti yabo ku ntugu zombi.
  • Ipeti rya karindwi ni irya Inspector (IP) rirangwa n’ikirango cy’inyenyeri ebyeri cyambarwa ku ntugu zombi.
  • Ipeti rya munani ni irya Chief Inspector(CIP), rirangwa n’ikirango cy’inyenyeri eshatu cyambarwa ku ntugu zombi.
  • Ipeti rya cyenda, ni irya Superintendent (SUPT) rirangwa n’ikirango gifite ishusho y’ikirangantego cy’igihugu.
  • Ipeti rya cumi, ni irya Senior Superintendent (SSP) rirangwa n’ikirango cy’ikirangantego kiri kumwe n’inyenyeri imwe.
  • Ipeti rya cumi na rimwe, ni irya Chief Superintendent (CSP) rirangwa n’ikirango kirimo ikirangantego n’inyenyeri ebyeri.
  • Ipeti rya cumi na kabiri, ni irya Assistant Commissioner (ACP) rirangwa n’ikirango kigizwe n’ikirangantego cy’igihugu n’ishusho y’uruziga rufite umuzenguruko ukoze mu ihundo, hagati hakaba harimo imishyo ibiri isobekeranye.
  • Ipeti rya cumi na gatatu, ni irya Commissioner (CP), rirangwa n’ikirango kigizwe n’ikirangantego cy’igihugu, ishusho y’uruziga rufite umuzenguruko ukozwe mu ihundo, hagati hakaba harimo imishyo ibiri isobekeranye, hanyuma hagati y’ibi birango hakaba harimo inyenyeri imwe.
  • Ipeti rya cumi na kane, ni irya Deputy Commissioner General (DCGP), rirangwa n’ikirango kigizwe n’ikirangantego cy’igihugu, ishusho y’uruziga rufite umuzenguruko ukozwe mu ihundo, hagati hakaba harimo imishyo ibiri isobekeranye, hanyuma hagati y’ibi birango hakaba harimo inyenyeri ebyiri.
  • Ipeti rya cumi na gatanu ari naryo rya nyuma mu gipolisi cy’u Rwanda, ni irya Commissioner General (CGP). Iri rirangwa n’ikirango kirimo ikirangantego cy’igihugu, ishusho y’uruziga rurimo inuma ndetse n’ishusho y’uruziga rufite umuzenguruko ukozwe mu ihundo, hagati harimo imishyo ibiri isobekeranye.

Icyitonderwa: Inspector General (IGP) na Deputy Inspector General (DIGP) si amapeti, ahubwo ni imyanya w’ubuyobozi bukuru bwa Polisi y’u Rwanda. Urugero, Inspector General (IGP) Emmanuel Gasana uyobora Polisi y’u Rwanda, afite ipeti rya nyuma mu gipolisi cy’u Rwanda, rya Commissioner General.

Ikindi ukwiye kumenya ku bijyanye n’ibirango by’amapeti y’igipolisi cy’u Rwanda, ni uko uretse ibirango byambarwa ku rutugu, guhera ku ipeti rya Chief Superintendent hatangira kwambarwa n’ibindi birango bakunda kwita ibirokoroko, byambarwa ku ikora ry’umwambaro wa Polisi.


INKURU ZA :
Tanga Igitekerezo
Ibitekerezo 2
Buchanan ismael Kuya 12-01-2018

Urakoze kunkuru yawe yo hejuru kandi usobanuye neza CyAne nizera ko nubutaha washaka andi makuru zindi ngabo ukayatanga byatanga kumenya neza uko biteye
Ikindi Ese wagereranya Ariya mapeti Naya gisirikare? Ese byaba bifitanye isano? MurakoZe

Buchanan ismael Kuya 12-01-2018

Urakoze kunkuru yawe yo hejuru kandi usobanuye neza CyAne nizera ko nubutaha washaka andi makuru zindi ngabo ukayatanga byatanga kumenya neza uko biteye
Ikindi Ese wagereranya Ariya mapeti Naya gisirikare? Ese byaba bifitanye isano? MurakoZe

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...